ޖަމުޢިއްޔަތުލް ފަލާޙްގެ ކީރިތި ޤުރުއާން ކިޔެވުމުގެ ރަންޔޫބީލް މުބާރާތުގެ އިނާމު ދިނުމުގެ ރަސްމިއްޔާތު،ބާއްވައިފިއެވެ. މިރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ. މި ރަސްމިއްޔާތު އޮތީ މިރޭ، އިސްލާމީ މަރުކަޒުގެ ޖަލްސާކުރާ މާލަމުގައެވެ.
މި ރަސްމިއްޔާތުގައި، ޖަމުޢިއްޔަތުލް ފަލާޙްގެ ކީރިތި ޤުރުއާން ކިޔެވުމުގެ ރަންޔޫބީލް މުބާރާތުގެ ހަނދާނީ ފިލާ އެމަނިކުފާނަށް ވަނީ އަރުވާފައެވެ. އަދި މުޅި މުބާރާތުން ވަނަވަނައަށް އައި ދަރިވަރުންނަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާއެވެ.
ޖަމުޢިއްޔަތުލް ފަލާޙަކީ ކީރިތި ޤުރުއާނުގެ ޢިލްމު ފެތުރުމާއި، ތަޢުލީމު އުނގަންނައިދިނުމުގެ ފަޚުރުވެރި ތާރީޚެއް އޮންނަ ޖަމުޢިއްޔާއެކެވެ. ޖަމިއްޔަތުލް ފަލާޙްއަކީ 10 މާޗް 1961ގައި ރަޖިސްޓްރީކުރެވުނު ޖަމިއްޔާއެކެވެ. އެޖަމިއްޔާގެ ބާނީ އަކީ އަލްމަރްޙޫ އަބޫބަކުރު އިބްރާހީމެވެ. ދީނީ ، ތައުލީމީ އަދި އިޖުތިމާއީ ޚިދުމަތްތަކެއް ކޮށްފައިވާ ޖަމްޢިއްޔަތުލް ފަލާޙުން ކީރިތި ޤުރްއާން މުބާރާތް ބާއްވަމުންގެންދާތާ 50 އަހަރު ވެއްޖެއެވެ. ޖަމިއްޔަތުލް ފަލާހުން ކޮންމެ އަހަރަކު ރަމަޟާން މަހު ކުރިއަށް ގެންދާ ކީރިތި ޤުރުއާން ކިޔެވުމުގެ މުބާރާތުގެ ރަންޔޫބީލް މުބާރާތުގެ އިނާމް ދިނުމުގެ ޖަލްސާގައި މުޅި މުބާރާތުން ވަނަތައް ހާސިލްކުރެއްވި 13 ދަރިވަރަކަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ.
