މާލީ މުޢާމަލާތްތައް ކުރުމުގައި އިސްލާމީ ޝަރީޢަތާ އެއްގޮތަށް ޢަމަލު ކުރުމަށް މިއަދު ރާއްޖޭގެ ހުރިހާ ރަށެއްގައި ކުރި ހުކުރު ނަމާދުގެ ޚުޠުބާގައި ގޮވާލައްވައިފިއެވެ. މިއަދުގެ ޚުޠުބާގައި ވިދާޅުވީ މީގެ ކުރީން މަޖުބޫރު ޙާލަތެއްގައި ތިބެ ރިބާގެ ލޯންތަކާއި އިންސުއުރެންސް ނަގަން ޖެހުނު ކަމުގައި ވިޔަސް މިއަދު މިވަނީ މާތްﷲގެ ރަޙުމަތާއި އެކު އިސްލާމީ އުޞޫލުން ޚިދުމަތްދޭ ބޭންކުތަކާއި ތަކާފުލް ކުންފުނިތައް ދިވެހިރާއްޖޭ އާއި މުޅި ދުނިޔޭގައި އުފެދިފައި ވާ ކަމަށެވެ. “ ޙަލާލު ގޮތުގައި މާލީ މުޢާމަލާތް ކުރުން“ މިމައޫޟުއުގެ މައްޗަށް އިއްވި ހުކުރު ޚުތުބާގައި ވިދާޅުވީ، ރިބާ އާއި ޖުވާ ނުހިމެނޭ ގޮތަށް ފައިސާގެ މުޢާމަލާތްތައް ހިންގާ ބޭންކުތަކާއި، ތަކާފުލުކުންފުނިތަކާއި، މުއައްސަސާތައް ނުހިންގޭނެކަމަށް ބަޔަކު ދުށް ޒަމާން މިހާރު ވަނީ މާޒީވެފައި ކަމަށެވެ. މިއަދު މުސްލިމު ޤައުމުތަކުގެ އިތުރުން އެހެނިހެން ޤައުމުތަކުގައި ވެސް އިސްލާމީ ޝަރީޢަތް ހުއްދަ ކުރާ ގޮތަށް ފައިސާގެ މުއާމާލަތް ކުރާ މުއައްސަސާތައް ހިންގަން ފަށާފައި ވާކަމަށް ހުކުރު ޚުޠުބާގައި ފާހަގަ ކުރެއްވިއެވެ. އިސްލާމީ ޝަރީޢަތް ހުއްދަ ކުރާ އުޞޫލުން ބޭންކުތަކާއި މުއައްސަސާތައް އުފައްދާ ކާމިޔާބު ކަމާއެކު ހިންގާ ބައެއް ޤައުމުތައް ފާހަގަ ކުރައްވަމުން ޚުޠުބާގައި ވިދާޅުވީ، މިއަދު މިވަނީ އިސްލާމީ ޝަރީޢަތާއި އެއްގޮތަށް މާލީ މުޢާމަލާތް ހިންގޭނޭ މަގު ތަނަވަސް ވެފައިކަމަށެވެ. އިސްލާމީ އުޞޫލުތަކާއި އެއްގޮތަށް ފައިސާގެ މުޢާމަލާތް ކުރުމަކީ ދެދުނިޔޭގެ ފަލާޙު މިންވަރު ކުރައްވާނެ ގޮތްކަމަށް ހުޠުބާގައި ހަދާން ކޮށް ދެއްވިއެވެ.
މާތްﷲ ވިޔަފާރި ހަލާލު ކުރެއްވި ކަމަށާއި ރިބާ ހަރާމް ކުރެއްވި ކަމަށް ހަދާން ކޮށް ދެއްވަމުން މިއަދުގެ ހުކުރު ޚުޠުބާގައި ވިދާޅުވީ ރިބާ ކާމީހާ ފާފަ ވެރިވާ ފަދައިން އެކަމުގައި ޝާމިލުވާ އެހެން މީހުންވެސް ފާފަ ވެރި ވާނެ ކަމަށެވެ. އެބަހީ ރިބާ ކާމީހާ އާއި ރިބާ ދޭ މީހާއާއި އެކަމާ ގުޅޭ ލިޔުންތައް ލިޔާ މީހާ އާއި އެކަމަށް ހެކިވާ މީހާވެސް ހިމެނޭ ގޮތަށް އެންމެންވެސް ފާފަ ވެރިވާނެ ކަމަށް ޚުޠުބާގައި ވިދާޅުވިއެވެ. މިއެންމެންނަށް ﷲގެ ލަޢުނަތް ހުރިކަމަށް ނަބިއްޔާ މުޙައްމަދުއްޞަލައް އަލައިހިވަސައްލަމް އިންޒާރު ކުރައްވާފައިވާ ކަމަށް ޚުޠުބާގައި ވިދާޅުވިއެވެ. ރިބާ އަކީ މުދަލުގެ ބަރަކާތް ކެނޑި ދިރިއުޅުން ނުތަނަވަސްވެ ލިބޭ މިންވަރާ މެދު ހިތްހަމަ ނުޖެހި ފައިސާއަށް މަތިމައްޗަށް ދަހިވެތިކަން އިތުރު ކޮށްދޭނެ ވަބާއެއްކަމަށް ހުޠުބާގައި ވިދާޅުވެފައި ވެއެވެ. އަދި އެއީ އުޚުރަވީ ހަޔާތުގައި ވެސް ވޭންދެނެވި އަޛާބާ ކުރިމަތިލާން ޖެހޭނެ ކަމެއްކަމަށް ފާހަގަ ކުރެއްވިއެވެ.
އަހަރަމެން ކެއުމަށް ޙަލާލުތަކެތި ހޯދުމަށް އިސްކަން ދޭފައިން އެތަކެތި ގަތުމަށް ބޭނުން ކުރާ ފައިސާ ހޯދުމުގައި ވެސް ޙަލާލު ގޮތުގައި ހޯދާ ފައިސާއަށް ހެދުމަށް މިއަދުގެ ޚުޠުބާގައި ނަޞޭޙަތް ދެއްވާފައި ވެއެވެ. ތިމާ އާއި ތިމާގެ އަނބި ދަރިންގެ ކެއުމާއި އަންނައުނާއި ބޯހިޔާވަހިކަމަކީ ރިބާގެ މުޢާމަލާތްތަކުން ހޯދި ފައިސާއިން ގަނެ ފޯރުކޮށްދޭ އެއްޗެއް ކަމުގައި ނުހެދުމަށް ޚުޠުބާގައި ނަސޭޙަތް ދެއްވަމުން ވިދާޅުވީ، ތިބާ ހާލާލުގޮތުގައި ހޯދާ ފައިސާ ރައްކާކުރެވެނީވެސް ޙަލާލު ގޮތުގައި ތޯ ބެލުމަށެވެ.
