ދެކުނު އޭޝިއާ ސަރަހައްދުގައި އުފެދިފައިވާ ދުންފުނީގެ ސަބަބުން، ސިއްހީ ގޮތުން ބޮޑެތި ގެއްލުންތަކެއް ލިބޭ މިންވަރަށް ވައިނުސާފުވެފައިވާތީ ބޭރަށް ނުކުމެ އުޅުމުގައި ސަލާމަތީ ފިޔަވަޅުތައް އެޅުމަށް މޫސުމާއި ބެހޭ ގައުމީ އިދާރާ (މެޓުން) އިލްތިމާސްކޮށްފިއެވެ.
ވައި ތަޣައްޔަރުވުމުގެ ނުރައްކާ އިންތިހާއަށް ބޮޑުވުމާ ގުޅިގެން، މެޓުން އިން މިހާރު ވަނީ އެކި ސަރަހައްދުތަކަށް ރަތް ސަމާލު ނެރެ، ރައްޔިތުން ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައެވެ. އެއާ ކޮލިޓީ އިންޑެކްސް (އޭކިއުއައި) ގެ އެންމެ ފަހުގެ ހިސާބުތަކަށް ބަލާއިރު، އެންމެ ބޮޑަށް ހާލަތު ގޯސްވެފައިވަނީ އުތުރުގެ ރަށެއް ކަމަށްވާ ހދ. ކުޅުދުއްފުށީގައެވެ. އެ ރަށުގެ އިންޑެކްސް ވަނީ 168 އަށް އަރައިފައެވެ. މީގެއިތުރުން ވެރިރަށް މާލެ އާއި ވިލިމާލޭގެ ރެކޯޑުތައް 160 ގައި ހުރިއިރު، ދެކުނުން ލ. ފޮނަދޫގެ ނިސްބަތް ހުރީ 151 ގައެވެ.
ދުޅަހެޔޮ ވެއްޓެއްގައި ވައިގެ ނުސާފުމިން ހުންނަން ޖެހޭނީ 90 އާއި 130 އާ ދެމެދުގައެވެ. ނަމަވެސް 130 އިން މައްޗަށް އެރުމަކީ އިންސާނާގެ ސިއްހަތަށް ގެއްލުންހުރި މިންވަރަކަށް ވާތީ، މޫސުމާ ބެހޭ އިދާރާއިން ވަނީ ކުރިއަށް އޮތް ފަސް ދުވަހުގެ ނިޔަލަށް މި ނޭދެވޭ އަސަރު މެދުނުކެނޑި ދެމިގެންދާނެ ކަމަށް އިންޒާރު ދީފައެވެ. ވަކިން ހާއްސަކޮށް، ރާއްޖޭގެ އުތުރާއި މެދުރާއްޖެތެރޭގެ އަތޮޅުތަކުގައި ލޮލަށް ފެންނަ ދުރުމިން ވަރަށް ބޮޑަށް ދަށްވާނެ ކަމަށް ލަފާކޮށްފައިވެއެވެ.
ވައި ނުސާފުވުމުގެ ސަބަބުން ނޭވާހިއްލުމާއި ފުއްޕާމޭގެ ބަލިތައް ތަހައްމަލުކުރަމުންދާ ފަރާތްތަކަށް ބޮޑެތި އުނދަގޫތަކާ ކުރިމަތިލާންޖެހޭނެތީ، ހާއްސަ ސަމާލުކަމެއް ދިނުމަށް ކަމާބެހޭ މާހިރުން ބާރުއަޅައެވެ. އަދި ދުޅަހެޔޮ ހަށިހެޔޮ މީހުން ވެސް ބޭރުތެރޭގައި މާގިނަ ވަގުތު ހޭދަކޮށްފިނަމަ ނޭވާލާން ދަތިވުމާއި ކަރުތެރެ ހަލާކުވުން ފަދަ ކަންކަން މެދުވެރިވެދާނެ ކަމަށް ވަނީ ހާމަކޮށްފައެވެ. އެހެންކަމުން، ބޭރުގައި ކަސްރަތުކުރުމާއި ކުޅިވަރު ކުޅުން މަޑުޖައްސާލުމަށާއި، ބޭރަށް ނުކުންނަން މަޖުބޫރުވާ ހާލަތްތަކުގައި އަޅަންޖެހޭ ރައްކާތެރިކަމުގެ ފިޔަވަޅުތަކަށް އިސްކަންދިނުމަށް ވަނީ އަންގާފައެވެ.

































