ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުޙައްމަދު އައްބާސްގެ ވަރުގަދަ ރައްދެއް ދަނޑުވެރިކަމާއި ދިރޭތަކެއްޗާބެހޭ ވަޒީރު މަރްޔަމް މާރިޔާ އަށް އަމާޒުކޮށްފިއެވެ.
މެމްބަރު ޢައްބާސް އެކްސްގައި މިއަދު ކުރެއްވި ފޯސްޓުގައި، ހިއްސާކޮށްފައިވަނީ ނިއުޒިލޭންޑުގައި މާރިޔާ ހުންނަވާ މިނިސްޓަރުކަމަށް އެދިގެން އެފުރުޞަތު އެމްޑީއޭ އިން ހޯދާދިނުމަށް އެދި އާދޭސް ކުރިދުވަސް ހަނދާންނެތީތޯ ސުވާލުކޮށްފައެވެ. އަދި މަޤާމު ލިބުމުން ބާރާއި ނުފޫޒުގެ ބޭނުން ނަމަހަގޮތުގައި ހިފައިފެން ނިކުމެ އެދުވަހު އޯގާތެރިވި މީހާއަށް މިއަދު ފާޅުގައި އަނިޔާކޮށްއެމީހާގެ މުދާފޭރެން، ތަކުރާރުކޮށް ކުރާ މަސައްކަތް ހުއްޓާލުމަށް ދަންނަވަން ކަމުގައި ހިއްސާކޮށްފައިވެއެވެ.
އެކްސްގައިކޮށްފައިވާ ޕޯސްޓުގައި ވަޒީރު މާރިޔާ އާއި ދ. މީދޫ ދާއިރާގެ ރައްޔިތުންގެ މަޖިލީހުގެ މެންބަރު އަހުމަދު ޝިޔާމް މުޙައްމަދާއި އެކު ނަގާފައިވާ ފޮޓޯތަކެއްވަނީ ހިއްސާކޮށްފައެވެ
މެމްބަރު ޢައްބާސްގެ ކަންބޮޑުވުންތައް ފާޅުކޮށް ފޭސްބުކުގައިވެސް ވަނީ ބަޔާނެއް ނެރެފައެވެ. އެބަޔާން އަމާޒުކޮށްފައިވަނީ ދ. މީދޫ ދާއިރާގެ ރައްޔިތުންގެ މަޖިލީހުގެ މެންބަރު އަހުމަދު ޝިޔާމް މުޙައްމަދުގެ ކުންފުންޏަކަށް ދަނޑުވެރިކަމަށް ދޫކޮށްފައިވާ ނ. މިނާވަރު އަތުލަން ސަރުކާރުން ނިންމީ ސިޔާސީ މަގުޞަދެއްގައި ޝިޔާމަށް ޖެއްސުންކޮށް އަނިޔާވެރިވުމަށް ކަމަށް ބުނެފައެވެ.
އެމްޑީއޭގެ ނައިބު ރައީސްކަން ކުރައްވާ މެމްބަރު ޢައްބާސް މިއަދުފޭސްބުކުގައި ނެރުއްވި ބަޔާނުގައި ވިދާޅުވީ، ނ. މިނާވަރު އަތުލުމުގައި ސަރުކާރުން އަމަލުކޮށްފައިވަނީ ޤާނޫނުތަކާއި ގަވާއިދުތަކާ ހިލާފަށް ކަމަށެވެ.
”އެ ރަށް އަތުލާފައި އެވަނީ ސިޔާސީ މަގުޞަދެއްގައި އޮނަރަބަލް އަހުމަދު ޝިޔާމް މުޙައްމަދަށް ޖެއްސުންކޮށް އަނިޔާވެރިވުމަށް ކަމުގައި ދަންނަވަން ޖެހޭ،“ އައްބާސްގެ ފޭސްބުކްގައި ހިއްސާކޮށްފައިވާ ޕޯސްޓުގައި ބަޔާންކޮށްފައިވެ އެވެ.
އެބަޔާނުގައި އިތުރަށް ބުނެފައިވަނީ، ނ. މިނާވަރަކީ 2010 އިން ފެށިގެން ޝިޔާމުގެ ރަށެކެވެ. އޭނާ އެ ރަށް ހޯދީ ދަނޑުވެރިކަން ކުރުމަށް ސަރުކާރުން އެ ރަށް ދޫކޮށްފައި އޮތް އިމްޕެކްސް ފިޝަރީޒް މޯލްޑިވްސް ކުންފުނި ބައްލަވައިގަނެގެންނެވެ. އޭގެ ފަހުން އެ ރަށް ބޭނުންކުރަމުން ގޮސްފައިވަނީ ޝިޔާމުގެ ނ. އަތޮޅުގައި އޮންނަ ޝިޔާމުގެ ދެ ރިސޯޓަށް ސަޕްލައި ކުރުމަށާއި މާރުކޭޓަށް ސަޕްލައި ކުރުމަށެވެ.
މި ރަށް އަތުލަން ނިންމީ އެއްބަސްވުމާއި އެއްގޮތަށް ކަންކަން ރަނގަޅު ކުރުމަށް މުއްދަތެއްދީ، އެ މުއްދަތުގައި އެއްވެސް ކަމެއް ރަނގަޅު ނުކުރުމުންކަމަށް ސަރުކާރުން ބުނެފައިވެ އެވެ. އައްބާސް ވަނީ މިކަން ދޮގުކުރައްވާފަ އެވެ. މިއީ ހަގީގަތް އޮޅުވާލަން ކުރި ކަމެއްގެ ގޮތުގައި އޭނާ ސިފަކުރެ އެވެ.
އައްބާސްގެ ބަޔާނުގައިވާގޮތުގައި، އެގްރިކަލްޗާ މިނިސްޓްރީން ނ. މިނާވަރުގެ އިންސްޕެކްޝަނެއް ހެދުމަށް މިދިޔަ އަހަރުގެ ފަހުކޮޅު ދިޔަ ކަމަށެވެ. އެ ދަތުރުގައި ފާހަގަވި ކަންކަން ރިޕޯޓެއްގެ ސިފައިގައި ނުވަތަ ލިޔުމަކުން ވެސް ހިއްސާނުކުރާ ކަމަށާއި އެއްބަސްވުމާ އެއްގޮތަށް މަސައްކަތް ނުކުރާ ކަމަށް ބުނެ، މިނިސްޓްރީން ސިޓީއެއް ފޮނުވީ ދަތުރުގެ ހަތް މަސް ފަހުން ކަމަށް ވެސް އައްބާސް ބަޔާނުގައިވެއެވެ.
މިނިސްޓްރީން އެންގި ކަންކަން 30 ދުވަހުގެ ތެރޭ ރަނގަޅުކޮށް މިނިސްޓްރީއަށް ރިޕޯޓު ހުށަހެޅި ކަމަށާއި އޭގެ ފަހުން މިނިސްޓްރީން މިދިޔަ މަހު އިތުރު ދަތުރެއް ކުރި ކަމަށްވެ އެވެ. މި ދަތުރުގައި ސިވިލް ސާވިސް މުވައްޒަފުން ގެންދަން އޮތް އޮތުން ބަދަލުކޮށް ތިން ސިޔާސީ މުވައްޒަފުން ފޮނުވިކަން އައްބާސްގެ ބަޔާނުގައި ވަނީ ފާހަގަކުރައްވާފަ އެވެ.
”ދެންނެވުނު ސިޔާސީ ފަރާތްތަކުން ނ. މިނާވަރު އިންސްޕެކްޓްކޮށް، ރިޕޯޓެއް ތައްޔާރުކޮށްފައި ވާކަމަށާއި، އެ ރިޕޯޓުގައި ރަށުގެ އެއްބަސްވުމާއި އެއްގޮތަށް ކުރަން ޖެހޭ ކަންކަން ފުރިހަމަ ކޮށްފައި ހުރިހާ ކަމަށާއި، ރަށުގެ ހާލަތާއި މަސައްކަތް ވެސް ވަރަށް ރަނގަޅުކަމަށް ބަޔާންކޮށްފައިކަން ވަނީ ރިޕޯޓްގައި ބަޔާންކޮށްފަ،“ އައްބާސްގެ ބަޔާނުގައި ވިދާޅުވެފައިވެ އެވެ.
އައްބާސްގެ ބަޔާނުގައި އިތުރަށް ވިދާޅުވެފައި ވަނީ މިނާވަރު އަތުލުމަށް ސަރުކާރުން ކުރި މަސައްކަތުގައި ސަރުކާރުން ގާނޫނާ ހިލާފާށް ކޮށްފައިވާ ކަންކަމެވެ. އެ ގޮތުން އެއްބަސްވުމާ އެއްގޮތަށް މަސައްކަތް ކުރިއަށް ނުދާނަމަ ކަނޑައެޅިފައިވާ ހަމައަކީ 20،000ރ. އަށްވުރެ ބޮޑު ނޫން ޖޫރިމަނާއެއް ކުރުން ކަން އޭނާ ފާހަގަކުރައްވާފައިވެ އެވެ.
”ރަށް އަނބުރާ ނެގޭނެ އެއްވެސް ގާނޫނީ ހަމައެއް މިނިސްޓްރީއަށް ލިބިގެން ނުވާކަން ފާހަގަ ކުރަން. މީ ކަޑައެޅިގެން ހެދި ބޮޑު ދޮގެއް. އުސޫލާއި އިންސާފުން ބޭރުން އޮޅުވާލި އޮޅުވާލުމެއް،“ އޭނާގެ ބަޔާނުގައިވެއެވެ.
މީގެ އިތުރުން، މިނާވަރު އިންސްޕެކްޓްކުރަން ދިޔަ ސިޔާސީ މުވައްޒަފުން ހާޒިރުކޮށް އެ ރަށް އަތުލަން ރައީސް އޮފީހުން ބޭނުންވާކަން އެގްރިކަލްޗާ މިނިސްޓަރު ޑރ. މަރިޔަމް މާރިޔާ ދެންނެވި ކަމަށް ވެސް އައްބާސް ތުހުމަތުކުރައްވާފައިވެ އެވެ.
ފަޅު ރަށްރަށާ ބެހޭ ގާނޫނަށް ހަވާލާދީ އައްބާސްގެ ބަޔާނުގައި ބުނެފައި ވަނީ އެ ގާނޫނުގެ ދަށުން ކުއްޔަށް ދީފައިވާ ރަށެއް، މުއްދަތު ހަމަވުމުގެ ކުރިން އަތުލެވޭނީ ދެ އަހަރުގެ ނޯޓިސް އެއް ދިނުމަށްފަހު ކަމަށެވެ.
ބަޔާން ނިންމާލަމުން ވެސް އައްބާސް ވިދާޅުވީ، މިއީ ވަކި ފަރާތަކަށް އަމާޒުކޮށް އަޅާ ބޭއިންސާފު ފިޔަވަޅެއް ކަމަށާއި ސަރުކާރުގެ މި އަމަލަކީ ހުދުމުހުތާރުކަމާއެކު ހިންގާފައިވާ ބޭއިންސާފުގެ އަމަލެއް ކަމަށެވެ.
މަޝްހޫރު ވިޔަފާރިވެރިޔާ އަހުމަދު ޝިޔާމު މުޙައްމަދު ހިންގަވާ. ޕީޕަލްސް ނެޝަނަލް ކޮންގްރެސް، (އެމްޑީއޭ)، ސަރުކާރުގެ ކޯލިޝަނުގައި ނެތްކަމަށް 3 މެއި، ވީހޮނިހިރު ދުވަހު ރައީސްއޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ޑރ. މުއިއްޒު ވަނީ ވިދާޅުވެފައެވެ. އަދި މި ވަގުތު ސަރުކާރުގައި އޮތީ ޕީއެންސީ އެކަނި ކަމަށް ވެސް ރައީސް ވަނީ ވިދާޅުވިއެވެ.
