މީހުން ދިރިއުޅޭ ރަށްރަށުގައި ގެސްޓްހައުސް ވިޔަފާރި ނުވަތަ ރަށު ފަތުރުވެރިކަން ފުޅާވެގެން ދިއުމަކީ ރާއްޖޭގެ އިޤްތިޞާދަށް އައި ވަރަށް ބޮޑު އިންޤިލާބެކެވެ. ނަމަވެސް، މި ވިޔަފާރި މިހާރު ހިނގަމުންދާ ގޮތަށް ބަލާއިރު، އޭގެ ފައިދާ އެންމެ އެދެވޭ ގޮތެއްގައި ރަށުގެ އާންމު ރައްޔިތުންނާ ހަމައަށް ފޯރާތޯ ސުވާލު އުފެދެއެވެ. މީހުންދިރިއުޅޭ ރަށްރަށަކީ އެތަކެއް ޒަމާންތަކެއް ވަންދެއް އެރަށެއްގެ ދިރިއުޅުނު ރައްޔިތުން ގެ ތަރައްޤީ ކޮށް ދިރުވާ އާލާކޮށްފައިވާ ރަށްރަށޭ ބުނި ނަމަވެސް ދޮގަކަށް ނުވާނެއެެ. ރީތި ގޮންޑުދޮށްތަކާއި ފުންވިލުތަކާއި މަގުތައް ސާފުކޮށް ބަލަހައްޓާ ހެދީ ރަށްރަށުގައި އުޅުނު ބައެކެވެ. އެތަން ތަނުން ރަށުގެ ރަށްވެހިން އުފާ ހޯދިއެވެ. ރަށު ފަތުރުވެރިކަން ފެށުމާއި އެކު މުޅިރަށުގެ މަންޒަރު ބަދަލްވެގެން ދިޔައެވެ. ރަށަށް ބޭރުގެ މެހްމާނުން ޒިޔާރަތް ކުރަން ފެށިއެވެ. މުޅިން އެހެން ޘާޤާފަތެއްގެ ވެރި ބަޔަކު ރަށުގެ ހިތްއިމު މާހައުލުން ފެންނަން ފެށިއެވެ. އަޅުގަނޑުގެ މިރިޕޯޓްގައި މިބަލާލަނީ ރަށު ފަތުރުވެރި ކަމުން ރަށްރަށަށް ދިމާވާ ގޮންޖެހުންތަކާއި ރަށުގެ އާއްމު ރައްޔިތު މީހާގެ ޖީބަށް ޑޮލަރެއް ވަންނާނެ ގޮތް ހެދުމަށް ކައުންސިލްތަކުން އަދާކުރަން ޖެހޭ ދައުރުގެ މައްޗަށް ޚުލާޞާ ގޮތެއްގައެވެ.
މިހާރުގެ ޙާލަތާއި ހުރި ގޮންޖެހުންތައް
މިހާރު ރަށްރަށުގައި ފަތުރުވެރިކަން ހިނގަމުންދާ ގޮތަށް ބަލާއިރު ފާހަގަކުރެވޭ މައިގަނޑު މައްސަލަތަކަކީ:
- ބޭރުގެ އިންވެސްޓަރުންގެ ނުފޫޒު ބޮޑުވުން: ރަށުން ބޭރުގެ ބޮޑެތި ވިޔަފާރިވެރިން ރަށުގައި ގެސްޓްހައުސްތައް އަޅައި ހިންގާއިރު، ލިބޭ ފައިދާގެ ބޮޑު ބައި ދަނީ ރަށުން ބޭރަށެވެ. މުއައްޒަފުންގެ ގޮތުގައި ބިދޭސީން ގެންގުޅެއެވެ. ރަށުގެ އިޤްތިޞާދުގައި ފަތުރުވެރިކަމުން ލިބޭ އާމްދަނީ ހިފެހެއްޓިފައި ނުހުންނަކަން ފާހަގަ ކުރެވެއެވެ.
- އޯލް-އިންކްލޫސިވް ޕެކޭޖްތައް: ފަތުރުވެރިންނަށް ކެއުމާއި، އެކްސްކާޝަންތައް ގެސްޓްހައުސްގެ ތެރެއިން އެކަނި ލިބޭގޮތަށް ހުރުމުން، ރަށުގެ ކުދި ފިހާރަތަކާއި ކެފޭތަކަށް ލިބޭ އާމްދަނީ މަދުވުން.
- ތިމާވެށްޓާއި އިޖުތިމާޢީ މައްސަލަތައް: ކުނި މެނޭޖްކުރުމުގެ ދަތިކަމާއި، ރަށުގެ ޢާންމު އިޖުތިމާޢީ މިންގަނޑުތަކަށް ބުރޫއެރުން. އަދި މިއަދު ރަށުތެރެ ސާފުކޮށް ބެލެހެއްޓުމާއި އިޖްތިމާޢީ ސަރަހައްދު ބަލަހައްޓަމުން ގެންދަނީ ރަށު ކައުންސިލަށް ލިބޭ ކުޑަ އާމްދަނީންނެވެ.
ރައްޔިތުންނަށް ސީދާ ފައިދާ ލިބޭނެ ގޮތްތައް
ރަށު ފަތުރުވެރިކަމަކީ ރައްޔިތުންގެ ޖީބަށް ސީދާ ފައިސާ ވަންނަ ކަމަކަށް ހެދުމަށްޓަކައި އަންނަނިވި ކަންކަން ކުރެވިދާނެއެވެ:
- ސަޕްލައި ޗެއިން ރަށުގެ ތެރޭގައި ބޭއްވުން: ގެސްޓްހައުސްތަކަށް ބޭނުންވާ މަސް، މޭވާ، ތަރުކާރީ އަދި ކާބޯތަކެތި ރަށުގެ މަސްވެރިންނާއި ދަނޑުވެރިންގެ އަތުން ގަތުމާއި ކައުންސިލުން ލޯކަލް މާރެކްޓް ތަރައްޤީ ކޮށް ހިންގުން
- ދަތުރުފަތުރާއި އެކްސްކާޝަންތައް: ޑައިވިންގ، ސްނޯކްލިންގ، މަސްދަތުރުތައް އަދި ރަށުތެރެ ދައްކާލުން (ޓުއަރ ގައިޑްކަން) ފަދަ ޚިދުމަތްތައް ރަށުގެ ޒުވާނުންނާއި އޮޑިވެރިންނަށް ޚާއްޞަކުރުން.
- އަތްތެރި މަސައްކަތާއި ސަގާފަތް ވިއްކުން: ރަށުގެ އަންހެނުންނާއި އިސްރަށްވެހިން ތައްޔާރުކުރާ ދިވެހި އުފެއްދުންތަކާއި، ކާބޯތަކެތި ފަތުރުވެރިންނަށް ވިއްކޭނެ އިންތިޒާމު ހަމަޖެއްސުން.
- ރަށުގެ އިޖްތިމާޢީ ސަރަހައްދު ކުނިކަހާ ސާފުކޮށް ބެލެހެއްޓުމުގެ ޒިންމާ ގެސްޓްހައުސްތަކާއި ޙަވާލުކޮށް ރަށުގެ އެމަސައްކަތް ޒަމާނުންސުރެ ކުރަމުން ދިޔަ އަންހެނުންނަށް އާމްދަނީ ލިބޭނެ ގޮތް ހެދުން .
ހިންގުމުގެ ނިޒާމަށް ގެންނަންޖެހޭ އިޞްލާޙީ ބަދަލުތައް
މިހާރު އޮތް ނިޒާމު ބަދަލުކޮށް، ދެމެހެއްޓެނިވި ގޮތެއްގައި ރައްޔިތުންނަށް ފައިދާވާ ގޮތަށް ފަތުރުވެރިކަން ހިންގުމަށްޓަކައި ތިރީގައިވާ އިޞްލާޙުތައް ގެނައުން މުހިންމެވެ:
- ކައުންސިލްގެ ދައުރު ފުޅާކުރުން: ރަށު ކައުންސިލުން ރަށުގެ ފަތުރުވެރިކަމުގެ މާސްޓަރ ޕްލޭނެއް އެކުލަވާލައި، ރަށުން ބޭރުގެ އިންވެސްޓަރުންނަށް ބިން ދޫކުރުމުގައި ރަށުގެ ރައްޔިތުންނަށް ވަޒީފާއާއި ވިޔަފާރީގެ ފުރުޞަތު ލިބޭނެ ޝަރުޠުތައް ހިމެނުން.
- ކޯޕަރޭޓިވް ސޮސައިޓީތައް އުފެއްދުން: ރަށުގެ ރައްޔިތުން ހިއްސާވާ ކޯޕަރޭޓިވް ސޮސައިޓީއެއް އުފައްދައި، ފަތުރުވެރިކަމުގެ ބޮޑެތި ވިޔަފާރިތަކުގައި ރައްޔިތުންގެ ހިއްސާ އޮންނާނެ ގޮތް ހެދުން.
- ވަޒީފާގެ ޤަވާއިދުތައް ހަރުދަނާކުރުން: ގެސްޓްހައުސްތަކުގައި މަސައްކަތްކުރާ މުވައްޒަފުންގެ ވަކި އިންސައްތައަކީ ރަށުގެ ރައްޔިތުންނަށް ވާންޖެހޭ ގޮތަށް އުޞޫލުތައް ކަނޑައަޅައި، ރަށުގެ ޒުވާނުންނަށް ހޮސްޕިޓަލިޓީ ދާއިރާއިން ތަމްރީނު ދިނުން.
- ކޮމިއުނިޓީ ޓޫރިޒަމް ފަންޑެއް ޤާއިމުކުރުން: ރަށަށް އަންނަ ކޮންމެ ފަތުރުވެރިއެއްގެ އަތުން ނަގާ ވަކި ފީއެއް ނުވަތަ ގެސްޓްހައުސްތަކުން ދައްކާ ކުލީގެ ވަކި އިންސައްތައެއް ރަށުގެ ތަރައްޤީއަށާއި ތިމާވެށި ހިމާޔަތްކުރުމަށް ޚާއްޞަ ފަންޑަކަށް ޖަމާކުރުން.
- ވިޔަފާރިތައް ވަކިކުރުން (އައުޓްސޯސް ކުރުން): ގެސްޓްހައުސްތަކުން ހުރިހާ ޚިދުމަތެއް ދިނުމުގެ ބަދަލުގައި، ލޯންޑްރީ، ދަތުރުފަތުރު، އަދި ކެއުންބުއިމުގެ ޚިދުމަތްތައް ރަށުގެ އެހެން ކުދި ވިޔަފާރިތަކަށް ދޫކޮށްލުމަށް ބާރުއެޅުމާއި ޤާނޫނީ ގޮތުން އެކަން އެގޮތަށް ކުރެވޭނެ ނިޒާމެއް ކަނޑައެޅުމެެވެ.
- އިޖްތިމާޢީ ސަރަހައްދު ބެލެހެއްޓުމުގެ ޚަރަދު: މަގުބައްތި ދިއްލުމާއި މަރާމާތު ކޮށް ބެލެހެއްޓުމުގެ ޚަރަދު ގެސްޓްހައުސްތަކުން ކުރާ ގޮތަށް ހަމަ ޖެއްސުން.
ނިންމުން
އަޅުގަނޑުމެން ޤަބޫލު ކުރަން ޖެހޭ ހަޤީޤާތަކީ ފަޅުރަށެއްގައި ރިސޯޓެއް ހިންގުމާއި މީހުން ދިރިއުޅޭ ރަށެއްގައި ގެސްޓް ހައުސް ވިޔަފާރި ކުރުމާ ތަފާތު ވާން ޖެހޭނެއެވެ. ރަށު ފަތުރުވެރިކަމުގެ ޙަޤީޤީ މަޤްޞަދު ހާސިލުވާނީ އޭގެ ނަފާ ރަށުގެ ކޮންމެ ގޭބިސީއަކަށް ކުރާ ދުވަހަކުންނެވެ. މަދު ބައެއްގެ އަތްމައްޗަށް މި ވިޔަފާރި ދޫކޮށްލުމުގެ ބަދަލުގައި، ރަށު ކައުންސިލާއި ރައްޔިތުން ގުޅިގެން ހަރުދަނާ އުޞޫލުތަކެއް ކަނޑައަޅައި، ހިންގުމުގެ ނިޒާމަށް އިޞްލާޙީ ބަދަލުތަކެއް ގެނެސް ރަށު ފަތުރު ވެރިކަމުގެ ނަފާ ގޮތުންވެސް ރައްޔިތު މީހާގެ ޖީބަށް ވަދެގެން ނޫނީ ރަށު ފަތުރުވެރިކަމުން ރައްޔިތުންނަށް ސީދާ ފައިދާއެއް ނުލިބޭނެއެވެ. މިކަމަށް ޓަކައި ޤާނޫނުތަކަށްވެސް ބަދަލް ގެންނަން ޖެހެއެވެ. ރަށްރަށުގެ އިޖްތިމާޢި ގޮތުން ކުރަން ޖެހޭ ކަންކަމަށް ސީދާ ގޮތުން ގެސްޓްހައުސްތަކުން ރަށު ކައުންސިލަށް ފައިސާ ލިބެން ޖެހެއެވެ.

































