އެމްޑިޕީގެ ޗެއާޕާސަން އިންތިޚާބާ ގުޅޭގޮތުން ނެރެފައިވާ އިއުލާނާއި، އެ އިންތިޚާބުގެ ޓައިމްލައިން ބާތިލުކޮށްދިނުމަށް އެދި ސިވިލް ކޯޓަށް މައްސަލައެއް ހުށަހަޅައިފިއެވެ.
މި މައްސަލަ ކޯޓަށް ހުށަހެޅުއްވީ، ގާނޫނީ ވަކީލު އަބްދުﷲ ޝާއިރެވެ. މި މައްސަލައާއި ގުޅިގެން މީޑިޔާއަށް ދެއްވި ބަސްދީގަތުމެއްގައި ޝާއިރު ވިދާޅުވީ، މި މައްސަލަ ކޯޓަށް ހުށަހަޅަން ނިންމީ އިންތިޚާބާ ގުޅޭގޮތުން ހުރި ކަންބޮޑުވުންތައް ފާހަގަކޮށް، މިދިޔަ މަހުގެ 23 ވަނަ ދުވަހު ޕާޓީއަށް ފޮނުވި ސިޓީއަށް އެއްވެސް ޖަވާބެއް ލިބިފައި ނުވާތީ ކަމަށެވެ.
ޝާއިރު ވިދާޅުވި ގޮތުގައި، އެމްޑީޕީގެ އިންތިޚާބާ ބެހޭ ގަވާއިދު ބުނާގޮތުން ހުށަހަޅާ ޝަކުވާތަކަށް 48 ގަޑިއިރު ތެރޭގައި ޖަވާބު ދޭންޖެހެއެވެ. ނަމަވެސް، އެ މުއްދަތު ފާއިތުވެ، 10 ދުވަސް ވެގެންދިޔައިރުވެސް ޕާޓީގެ ފަރާތުން އެއްވެސް އިޝާރާތެއް ލިބިފައި ނުވާކަމަށް އޭނާ ފާހަގަކުރެއްވިއެވެ.
އެގޮތުން އެ ބޭފުޅުން އެދެނީ އިންތިޚާބު ބާތިލުކުރާކަށް ނޫން ކަމަށާއި އިންތިޚާބަށް ކަނޑައަޅާފައިވާ ޓައިމްލައިން ބާތިލުކޮށްދިނުމަށްކަމުގައި ވިދާޅުވެ އޭނާ ވަނީ، އެ ބޭފުޅުންނަށް މިކަމުގައި މައްސަލަކަށް ވެފައިވަނީ އިންތިޚާބުގެ ޓައިމްލައިން ކަނޑައަޅާފައި އޮންނަ ގޮތްކަމުގައެވެ.
މި މައްސަލައިގައި ޝާއިރު ފާހަގަކުރެއްވި ކަމަކީ ޕާޓީގެ އަސާސީ ގަވާއިދުގެ 46 ވަނަ މާއްދާއާ ހަވާލާދީ، އިންތިޚާބުގެ ކަންކަން ރާވާ ހިންގުމާއި، ޓައިމްލައިން ކަނޑައެޅުމުގެ ބާރު ލިބިގެންވަނީ އިސްތިއުނާފު ފަނޑިޔާރުންގެ މަޖިލީހުގެ ރައީސަށް ކަމަށް ވީނަމަވެސް، އެ ބާރުގެ ބޭނުން މިހާރު ހިފަމުންދަނީ އެހެން ފަރާތްތަކަކުން ކަމަށް ވުމެވެ.
ޝާއިރު އިތުރަށް ވިދާޅުވީ، އިސްތިއުނާފު މަޖިލީހުގެ ރައީސްގެ ލަފަޔާއި އިރުޝާދެއް ނެތި ޓައިމްލައިން ކަނޑަނޭޅޭނެ ކަމަށެވެ. އަދި ޕާޓީގެ އެންމެ މަތީ ގާނޫނަކީ އަސާސީ ގަވާއިދު ކަމަށްވާއިރު، އެހެން ކޮންމެ ގަވާއިދަކަށްވުރެ އަސާސީ ގަވާއިދަށް އިސްކަންދޭން ޖެހޭނެ ކަމަށްވެސް އޭނާ ވިދާޅުވިއެވެ.
އެގޮތުން ޕާޓީގެ އަސާސީ ޤަވާއިދަކީ، ޕާޓީގެ ’ކޮންސްޓިޓިއުޝަން‘ ކަމުގައިވުމުން، ’ސުޕްރެމަސީ އޮފް ކޮންސްޓިޓިއުޝަން‘ ގެ އުސޫލުން އަސާސީ ގަވާއިދާ ތައާރުޒުވާ އެއްވެސް ކަމެއް ނުކުރެވޭނެކަމުގައިވެސް އޭނާ ވިދާޅުވިއެވެ.
އަދި އިސްތިއުނާފު މަޖިލީހުގެ ރައީސް ޓައިމްލައިން ކަނޑައެޅުއްވުމުން، އެއާ އެއްގޮތަށް އިންތިޚާބު ބާއްވާނީ އިންތިޚާބީ ކޮމިޓީންކަމުގައިވެސް ޝާއިރު ފާހަގަކުރެއްވިއެވެ.
މައްސަލައާ ގުޅޭގޮތުން އެމްޑީޕީގެ ރަސްމީ ބަހެއް އަދި ލިބިފައެއް ނުވެއެވެ.
ނަމަވެސް، އިސްތިއުނާފު މަޖިލީހުގެ ރައީސް ފޮނުއްވި ސިޓީއަކަށް ޕާޓީގެ ޗެއާޕާސަންގެ ފަރާތުން ހުރަސް އަޅަމުންދާ ކަމުގެ މައުލޫމާތު ލިބިފައިވާ ކަމަށްވެސް ޝާއިރު ވަނީ ތުހުމަތު ކުރައްވާފައެވެ.
