އިންތިހާބީ ކައުންސިލަރުން ހުވާކުރުމާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެންބަރުން އިގްރާރުވުމުގެ ދަރުބާރު ކުރިއަށްގެންދަންޖެހޭގޮތުގެ އުސޫލު އެލްޖީއޭއިން އާންމުކޮށްފިއެވެ.
އިންތިހާބީ ކައުންސިލަރުން ހުވާކުރުން އޮންނާނީ މިމަހުގެ 17ވަނަ ދުވަހުއެވެ.
އެލްޖީއޭއިން އާންމުކޮށްފައިވާ އުސޫލުގައި ބުނެފައިވަނީ ރަށުގެ ވީހާވެސް ގިނަ ރައްޔިތުން ރަސްމިއްޔާތުގައި ބައިވެރިކުރުމަށްޓަކައި މިމަހުގެ 10ވަނަ ދުވަހުން ފެށިގެން ރަށުގައި އާއްމުކޮށް އިއުލާންކުރަންޖެހޭނެކަމަށެވެ. އަދި ރަށުގައި ހިނގަމުންދާ ސަރުކާރުގެ އިދާރާތަކަށް އެ ތަންތަނުގެ މުވައްޒަފުން ދަރުބާރަށް ވަޑައިގަތުމަށް ދައުވަތު ދޭންވާނެކަމަށް އުސޫލުގައިވެއެވެ.
މީގެ އިތުރުން ފަނޑިޔާރަކު ނެތް ރަށެއްނަމަ ދަރުބާރަށް ވަޑައިގަންނަވާ ފަނޑިޔާރަށް އިސްތިގްބާލުކުރުމުގެ އިންތިޒާމު ހަމަޖައްސަންވާނެކަމަށް ވެސް އުސޫލުގައި ބުނެފައިވާއިރު،
ރަށުގައި ފަނޑިޔާރަކު ނެތްނަމަ ނުވަތަ ހުވައި ކުރުމުގެ ދަރުބާރު އޮންނަ ވަގުތަށް ފަނޑިޔާރަކު ރަށަށް ނުގެނެވި އޮންލައިންކޮށް ހުވާލައިދޭ ހާލަތުގައި އެ އިންތިޒާމް ހަމަޖައްސައި އޮންލައިންކޮށް ރަސްމިއްޔާތުގައި ބައިވެރިވުމަށް ބޭނުންވާ މައުލޫމާތު ލަސްވެގެން ރަސްމިއްޔާތު ބޭއްވުމުގެ އެއް ދުވަސް ކުރިން ފަނޑިޔާރަށް ލިޔުމުން އަންގަންޖެހޭނެ ކަމަށް ވެސް އެ އުސޫލުގައި ވަނީ ބަޔާންކޮށްފައެވެ.
ހަމައެޔާއެކު ރަސްމިއްޔާތުގެ ފޮޓޯ މަގޭ ކައުންސިލް ޕޯޓަލަށް ލަސްނުކޮށް އަޕްލޯޑްކުރުމާއި ޕޯޓަލްގައި ބަޔާންކޮށްފައިވާ މައުލޫމާތު ފުރިހަމަކުރަންވާނެކަމަށް އެ އުސޫލުގައި ބުނެފައިވާއިރު އެލްޖީއޭގެ އުސޫލުގައި އތުރަށް ބުނެފައިވަނީ ރާއްޖޭގައި ހިންގާ ޓީވީ ޗެނަލްތަކާއި، ރޭޑިއޯ އަދި ނޫސް އިދާރާތަކަށް ދަރުބާރުގެ ފޮޓޯ އާއި ވީޑިއޯ ފޮނުވަންޖެހޭނެކަމަށެވެ.
ކައުންސިލާއި ކޮމިޓީގެ ފުރަތަމަ ބައްދަލުވުން ނިމުމަށްފަހު ލަސްވެގެން ތިން ގަޑިއިރު ތެރޭގައި މަގޭ ކައުންސިލް ޕޯޓަލްގައި ކައުންސިލަރުންނާއި އަންހެނުންގެ ކޮމިޓީގެ މެންބަރުންގެ މައުލޫމާތު އަޕްޑޭޓްކުރަންވާނެ ކަމަށް ވެސް އެ އުސޫލުގައިވެ އެވެ.
އިންތިހާބީ ކައުންސިލަރުން ހުވާކުރުން ހުރިހާ ރަށެއްގައި ކުރިއަށްދާނީ އެއްވަގުތެއްގައެވެ. މި ސަރުކާރުގައި އެކުލަވާލި އެޓޯލްސް މިނިސްޓްރީ އުވާލުމާ ގުޅިގެން އަތޮޅުތަކާއި ރަށު ކައުންސިލްތައް ހިންގައި ބެލެހެއްޓުމުގެ ޤާނޫނީ ޒިންމާ އަދާ ކުރާ ފަރާތެއްގެ ގޮތުގައި އަނެއްކާވެސް މި ވަނީ އެލްޖީއޭ ކަނޑައަޅާފައެވެ.
