މީޑިއާ ކޮންޓްރޯލް ގާނޫނު އުވާލައި، ސެލްފް ރެގިއުލޭޓަރީ ނިޒާމެއް ގާއިމްކުރުމުގެ މަސައްކަތް ވަގުތުން ފެށުމަށާއި، ”އައިޝާ“ ޑޮކިއުމެންޓަރީގެ މައްސަލައިގައި އޮންލައިން ނޫސް ”އަދަދު“ގެ މައްޗަށް ހިންގާ ޖިނާއީ ތަހުގީގު ހުއްޓައިލުން ހިމެނޭހެން، ނޫސްވެރިންގެ ޖަމިއްޔާ (އެމްޖޭއޭ)އިން ނުވަ ކަމެއް ސަރުކާރަށް ހުށަހަޅައިފިއެވެ.
ނޫސްވެރިކަމުގެ މިނިވަންކަމުގެ ދުވަހާ ގުޅިގެން އެމްޖޭއޭއިން މިއަދު ނެރުނު ބަޔާނެއްގައި ވަނީ، ރިޕޯޓާސް ވިތުއައުޓް ބޯޑާސް (އާރުއެސްއެފް)އިން ނެރުނު މިއަހަރުގެ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ހަތަރު ދަރަޖަ ފަހަތަށް ސޮއްސާލައިފައިވާކަން ފާހަގަކޮށްފައެވެ. އެހެންކަމުން، މިއީ ނޫސްވެރިކަމުގެ މިނިވަންކަން ހިމާޔަތްކުރުމަށް ވަގުތުން ފިޔަވަޅު އަޅަންޖެހިފައިވާ ވަގުތެއް ކަަމަށް، އެމްޖޭއޭއިން ބުންޏެވެ.
އެއާއެކު އެ ޖަމިއްޔާއިން ވަނީ، ނޫސްވެރިކަމުގެ މިނިވަންކަން އެންމެ ފުރިހަމަ މާނައިގައި ކަށަވަރުކޮށް، ނޫސްވެރިންނަށް ފަހި، ރައްކާތެރި މާހައުލެއް ރާއްޖޭގައި ގާއިމްކުރުމަށް ނުވަ ކަމެއް ހުށަހަޅައިފައެވެ.
އެގޮތުން، އެމްޖޭއޭއިން ވަނީ، މީޑިއާ ކޮންޓްރޯލް ގާނޫނު، ނުވަތަ ”މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ގާނޫނު“ އުވާލައި، ސެލްފް ރެގިއުލޭޓަރީ ނިޒާމެއް ގާއިމްކުރުމުގެ މަސައްކަތް ވަގުތުން ފެށުމަށާއި، ޑޮކިއުމެންޓަރީގެ މައްސަލައިގައި އަދަދު ނޫހާއި އެ ނޫހުގެ ނޫސްވެރިންގެ މައްޗަށް ހިންގާ ޖިނާއީ ތަހުގީގު ހުއްޓައިލައި، އެ ނޫހުގެ އެޑިޓަރުން ދަތުރުކުރުން މަނާކޮށްފައި އޮތް އޮތުން އުވައިލަން ހުށަހަޅައިފައެވެ.
މީގެ އިތުރުން އެ ޖަމިއްޔާއިން ހުށަހެޅި ކަންކަމުގެ ތެރޭގައި ހިމެނެނީ، ނޫސްވެރިންގެ މަސައްކަތްތަކާ ގުޅިގެން މީޑިއާތަކުގެ މައްޗަށް ޖިނާއީ ތަހުގީގެއް ނުހިންގުމާއި ގެއްލުވާލައިފައިވާ ނޫސްވެރިޔާ އަޙްމަދު ރިޟްވާން ޢަބްދުاللهއާއި އަނިޔާވެރިގޮތަކަށް މަރާލި ޔާމީން ރަޝީދުގެ މައްސަލައިގައި މަރު ކޮމިޝަނުން އެކުލަވައިލި ރިޕޯޓުތައް އާންމުކޮށް މިނިވަން ޕަބްލިކް އިންކުއަރީއެއް ހިންގުމަށާއި ނޫސްވެރިންނަށާއި އެ މީހުންގެ އާއިލާތަކަށް ދޭ އިންޒާރުތަކުގެ މައްސަލައި ބަލައި، ނޫސްވެރިންގެ ރައްކައުތެރިކަން ކަށަވަރުކޮށްދިނުމުގެ އިތުރުން އާރުޓީއައި ގާނޫނު ތަންފީޒުކޮށް، މައުލޫމާތު ލިބުމުގައި ހުރި ހުރަސްތައް ނައްތައިލުމާއި ނޫސްވެރިން މަސްދަރު ހާމަކުރަން މަޖުބޫރުވާ ގޮތަށް ހެއްކާއި ބެހޭ ގާނޫނުގައި ހުރި މާއްދާތައް، ބައިނަލްއަގުވާމީ މިންގަނޑަށް ފެތޭ ގޮތަށް އިސްލާހުކުރުން އަދި މީޑިއާތަކަށް ބަޖެޓުން ދޭ އެހީ ދެނީ އިންސާފުވެރިކަމާއި ދެފުށް ފެންނަ ގޮތަށްތޯ ކަށަވަރުކުރުމަށް، އަދި އެކަމަށްޓަކައި ނޫސްވެރިންނާއި އެޑިޓަރުންނާއި މަދަނީ ޖަމިއްޔާތަކާ މަޝްވަރާކުރުމެވެ.
އާރްއެސްއެފްއިން އާންމުކޮށްފައިވާ މި އަހަރުގެ ’ވޯލްޑް ޕްރެސް ފްރީޑަމް އިންޑެކްސް’ގައި ދިވެހިރާއްޖެ ވަނީ 108 ވަނައަށް ވެއްޓިފައެވެ. މިއީ މިދިޔަ އަހަރު ރާއްޖެ އޮތް 104 ވަނައާ އަޅާބަލާއިރު ހަތަރު ދަރަޖަ ފަހަތަށް ޖެހުމެކެވެ.
