މި އަހަރުގެ ފުރަތަމަ ކުއާޓަރުގައި މުދަލު ޒަކާތުގެ ގޮތުގައި 45.3 މިލިއަން ރުފިޔާ ލިބިފައިވާ ކަމަށް ޒަކާތު ހައުސް އިން ބުނެފިއެވެ.
ޒަކާތު ހައުސްއިން އާންމު ކުރި ތަފާސްހިސާބުތަކުން ދައްކާ ގޮތުގައި މި އަހަރުގެ ފުރަތަމަ ކުއާޓާގައި ޒާކާތުގެ ގޮތުގައި ޖުމްލަ 45،329،118.85 ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތިގައި ލިބުނު 34،854،157.67 ރުފިޔާއަށް ވުރެ ޖުމްލަ 30.1 އިންސައްތައިގެ އިތުރުވުމެކެވެ.
ތަފާސް ހިސާބުތަކުން ދައްކާ ގޮތުގައި އަހަރުން އަހަރަށް އަޅާކިޔާއިރު، ފާއިތުވި ތިން އަހަރު ދުވަހުގެ ތެރޭގައި ޒަކާތުގެ ގޮތުގައި ލިބުނު މިންވަރު އެއްވަރަކަށް އިތުރުވެފައިވާކަން ވަނީ ފާހަގަކުރެވިފައެވެ. 2024 ވަނަ އަހަރު 23،561،440.36 ރުފިޔާއިން 2025 ވަނަ އަހަރު 34.85 މިލިއަން ރުފިޔާއަށް އިތުރުވެފައިވާއިރު، 2026 ވަނަ އަހަރު 45 މިލިއަނަށް އަރާފައިވެއެވެ.
ޒަކާތުގެ ގޮތުގައި ނަގާ މިންވަރު އިތުރުވުމުގެ އިތުރުން އިޖުތިމާއީ އަދި ދީނީ މުހިންމު މަސައްކަތްތަކަށް އެހީތެރިވުމަށް ޒަކާތުގެ ފައިސާ ބެހިފައިވާ ގޮތް ވެސް ރިޕޯޓުގައި ފާހަގަކޮށްފައިވެއެވެ.
އެގޮތުން ސިއްހީ އެހީތެރިކަމާއި، އަސާސީ ތަކެތި، ރޯދަމަހުގެ އެހީ، ޤުރުއާން ހިތުދަސްކުރުމުގެ އިސްނެގުމާއި، ތަޢުލީމީ އެހީތެރިކަމާއި، މުޖުތަމަޢު ތަރައްޤީކުރުމުގެ މަޝްރޫޢުތައް ފަދަ އެކިއެކި ޕްރޮގްރާމްތަކަށް ޖުމްލަ 13،379،720.58 ރުފިޔާ ޚަރަދުކޮށްފައިވެއެވެ.
މީގެ ތެރެއިން އެންމެ ބޮޑު ހިއްސާއެއް އަމާޒުކޮށްފައިވަނީ ފަގީރުންނާއި ނިކަމެތިންނަށެވެ. އެފަރާތްތަކަށް ގާތްގަނޑަކަށް 6.69 މިލިއަން ރުފިޔާ ލިބިފައިވެއެވެ. އެހެން ކެޓަގަރީތަކުގެ ތެރޭގައި ފީ ސަބިލިالله (5.5 މިލިއަން ރުފިޔާ)، އާމިލް (815،000 ރުފިޔާ)، އަދި އިބްނު ސަބީލް (363،000 ރުފިޔާ) ހިމެނެއެވެ.
ޒަކާތުގެ ފައިސާގެ ދިގު މުއްދަތުގެ ދެމެހެއްޓެނިވިކަން ކަށަވަރުކުރުމަށް އަމާޒުކޮށްގެން ވަގުފު އިމާރާތްތަކާއި ދާރު އަސްލަމް އަދި ދާރުލް އަރްޤާމް ތަރައްގީކުރުމަށް މުހިންމު އިންވެސްޓްމަންޓްތަކެއްގެ ގޮތުގައި ޖުމްލަ 41،078،781.90 ރުފިޔާ ވެސް ރިޕޯޓުގައި ފާހަގަކޮށްފައިވެއެވެ.
