އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބާއި އެ ޕާޓީގެ ގައުމީ މަޖިލީހުގެ އިންތިހާބު ބާއްވަން ފައިސާއެއް ނެތް ކަމަށް ވިދާޅުވެ، އެ ދެ އިންތިހާބު ވެސް ރިޔާސީ ޕްރައިމަރީއަށް ފަހު ބޭއްވުމަށް ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ހުށަހަޅުއްވައިފިއެވެ.
އެމްޑީޕީގެ ޗެއާޕަސަން އިންތިހާބު ބޭއްވުމަށް ނިންމާފައި ވަނީ އަންނަ މަހުގެ 12 ވަނަ ދުވަހުގައެވެ.
މަޖިލިހުގެ ހަނިމާދޫ ދާއިރާގެ މެމްބަރުކަން ވެސް ކުރައްވަމުން ގެންދަވާ ގަޕޯ އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ވިދާޅުވީ ޗެއާޕާސަން އިންތިހާބާއި ގައުމީ މަޖިލިސް އިންތިހާބު މިވަގުތު ބާއްވައިފިނަމަ ޕާޓީގެ އެތެރޭގެ މަސްލަހަތު ގެއްލި، އޭގެ ސަބަބުން ސަރުކާރު ޖަވާބުދާރީކުރުވުމުގެ މަސައްކަތަށް ހުރަސްތަކެއް ކުރިމަތިވެދާނެ ކަމަށެވެ.
ދެވަނަ ކަމެއްގެ ގޮތުގައި ގަޕޯ ފާހަގަ ކުރެއްވީ ދެ އިންތިހާބު ބާއްވަން ފައިސާ ނެތުމެވެ.
އެގޮތުން، ދައުލަތުގެ ބަޖެޓުން އެ ޕާޓީއަށް ލިބެން ޖެހޭ ފައިސާ އަދިވެސް ލިބިފައި ނުވާ ކަމަށް ގަޕޯ ވިދާޅުވިއެވެ.
”މި އަހަރު ސަރުކާރުން ލިބެން ޖެހޭ އެއްވެސް ފައިސާއެއް ޕާޓީއަށް ލިބިފައި ނުވާތީ ޕާޓީ ހިންގުމަށާއި އިންތިހާބް ބާއްވާނެ އެއްވެސް ފައިސާ އެއް ޕާޓީއަކު ނެތެވެ،“ ގަޕޯގެ މެސެޖްގައިވެއެވެ.
އިންތިހާބު ފަސްކުރުމުގެ އިތުރުން، ޕާޓީ ހިންގުމަށް އިސް ފަރާތްތަކުން މަޝްވަރާކޮށްގެން ’އިންޓަރީމް އެރޭންޖްމަންޓެއް‘ ނުވަތަ ވަގުތީ އިންތިޒާމެއްގެ ދަށުން ކުރިއަށް ދިއުމަށް ވެސް ގަޕޯ ވަނީ ހުށަހަޅުއްވައިފައެވެ. އަދި އެކަމުގައި އޭނާ ނުހިމެނުމަށް އެދިވަޑައިގެންނެވިއެވެ.
މި ހުށަހެޅުމަކީ ޕާޓީގެ ކުރިމަގަށް މުހިންމު ކަމެއް ކަމަށް ބަލައި، އެކަން ގައުމީ މަޖިލީހަށް ހުށަހަޅައިގެން ފާސްކުރުމަށް ގަޕޯ އެދިވަޑައިގެންނެވިއެވެ.
އެމްޑީޕީގެ ޗެއާޕާސަން އިންތިހާބު ފަސްކުރަން ގަޕޯ ހުށަހެޅުއްވި އިރު، ޗެއާޕާސަން ކަމުގެ މަގާމަށް ކުރިމަތިލައްވާފައިވާ ކުރީގެ ރައީސް މުހައްމަދު ނަޝީދާއި ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ގެންދަވަނީ ވަރަށް ވަރުގަދަ ކެމްޕެއިންތަކެއް ކުރައްވަމުންނެވެ. ދެ ބޭފުޅުން ވެސް ރަށްރަށަށް ވަޑައިގެން ކެމްޕެއިން ކުރައްވަމުން ގެންދަވާ އިރު، އެމްޑީޕީގެ ތެރޭގައި ވަނީ މި އިންތިހާބުގެ ފޯރި ވަރަށް ބޮޑަށް ގަދަވެފައެވެ.
ޗެއާޕާސަންގެ އިންތިހާބު މީގެކުރިން ފަސްކޮށްފައިވެއެވެ. އެފަހަރު ފަސް ކުރީ ވެސް ގައުމީ މަޖިލިހަށް ހުށަހަޅައި ތާއީދު ލިބިގެންނެވެ. މިދިޔަ ޑިސެމްބަރު މަހުގެ 9 ވަނަ ދުވަހު ނިންމާފައި ވަނީ ލޯކަލް ކައުންސިލް އިންތިހާބުގެ ފަހުން އެމްޑީޕީގެ އެތެރޭގެ އިންތިހާބު ބޭއްވުމަށެވެ
