މެކްސިކޯގައި އަންނަ ނޮވެންބަރު ގައި ބާއްވަން ތައްޔާރުވަމުން އަންނަ ދުނިޔޭގެ ރީތީގެ ރާނީން ހޮވާ މުބާރާތުގައި ރާއްޖެއިން ބައިވެރިވެފައިވާ 21 އަހަރުގެ މަރިޔަމް ޝައިނާ ނަސީމް އެކަން ހުއްޓާލުމަށް ދިވެހި ސަރުކާރުން ޝައިނާއަށް ގޮވާލައިފިއެވެ.
މިކަން ހާމަކޮށްފައިވަނީ ޔޫތު މިނިސްޓްރީން މިއަދު ނެރުނު ނޫސްބަޔާނެއްގައި ގައެވެ. ނޫސްބަޔާނުގައި ބުނެފައިވަނީ ދިވެހިންގެ ދީނާއި އަގީދާއާއި ސަގާފަތާ ނުގުޅޭ ހަރަކާތްތަކާއި މުބާރާތްތައް ބޭއްވުމަކީ އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ، ދިވެހި ސަރުކާރުން ބަލައިގަންނަ ކަމެއް ނޫން ކަމަށެވެ.
އަދި އެފަދަ ކަންކަމަކީ ދިވެހިން ގަބޫލުކުރާ އާންމު އަހުލާގީ މިންގަނޑުތަކާއި އުސޫލުތަކާވެސް ހިލާފުކަންކަމަށްވާއިރު، ރާއްޖެ ތަމްސީލުކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން، ދިވެހި ސަރުކާރުން ކުށްވެރިކުރާކަމަށެވެ. އަދި އެ ހަރަކާތުގައި ބައިވެރިވުމަށް މަސައްކަތް ކުރަމުންދާ ފަރާތުން އެކަން ހުއްޓާލުމަށްވެސް ގޮވާލަކަމަށް ނޫސްބަޔާނުގައި ބުނެފައިވެއެވެ.
އެ ނޫސްބަޔާނުގައި އިތުރަށް ބުނެފައިވަނީ ރާއްޖެ ތަމްސީލުކުރުމުގެ ނަމުގައި އެފަދަ އެއްވެސް ހަރަކާތެއްގައި ދިވެއްސަކު ބައިވެރިކުރުވުމަކީ ސަރުކާރުން ކުރާނޭ ކަމަކަށް ނުވާއިރު އެއީ ސަރުކާރުން ކުރުވާކަމެއްކަމަށް ދޭހަވާގޮތަކަށް މައުލޫމާތު ނުފެތުރުމަށާއި އެފަދަ ކަންކަމުގައި ބައިވެރި ނުވުމަށް އެންމެހާ ރައްތިންނަށް ގޮވާލާކަމަށެވެ.
މިސް ޔުނިވާސް 2024 ގައި ބައިވެރިވެފައިވަނީ ދިވެހި މޮޑެލްކަމުގައިވާ، އުމުރުން 21 އަހަރުގެ މަރިޔަމް ޝައިނާ ނަސީމެވެ.
މިނޫސްބަޔާނާއި ގުޅިގެން ސޯޝަލް މީޑިއާތަކުގައި އާންމުން ތަފާތު ޚިޔާލު ފާޅުކުރަމުން، ”މިސްޓަރމޯލްޑިވްސް 2024 “ މުބާރާތުގެ ފޮޓޯއާންމުކޮށް އެކަން ސަރުކާރަށް ރަނގަޅުވެފައި ”ދުނިޔޭގެ ރީތީގެ ރާނީ 2024“ ގައި ދިވެއްސެއް ބައިވެރިވުން ސަރުކާރުން ހުއްޓުވުމަށް ނޫސްބަޔާން ނެރުމުން، އާންމުންގެ ފާޑުކިޔުން އަންނަނީ އިތުރުވަމުންވެ.
