ހޯކްސް ކުންފުނީގެ ބޯޓަކުން ގަވައިދާ ހިލާފަށް ރާއްޖެއަށް ގިނަ އަދަދެއްގެ ސިނގިރޭޓް ގެނައި ކަމަށް ބުނެ ހޯމް މިނިސްޓަރު އަލީ އިހުސާން، ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހާޒިރު ކުރުމަށް މިއަދު ބޭއްވި ބައްދަލުވުން ސިއްރުކޮށްފިއެވެ.
ކޮމިޓީގެ އެޖެންޑާގައި އޮތީ އެ މައްސަލައާ ގުޅިގެން އިހުސާންގެ އިތުރުން ކަސްޓަމްސްގެ ކޮމިޝަނާ ޖެނެރަލް ފާތިމަތު ދިޔާނާއާ ބައްދަލު ކުރުމެވެ.
ބައްދަލުވުން ފެށުމާއެކު، ކޮމިޓީ ސިއްރުކުރަން ހުށަހެޅުއްވީ ހަނިމާދޫ ދާއިރާގެ އެމްޑީޕީގެ މެމްބަރު އަބްދުލްޣަފޫރު މޫސާއެވެ. އެ ހުށަހެޅުމަށް ތާއީދު ކުރެއްވީ ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދެވެ.
މިދިޔަ ހޮނިހިރު ދުވަހު ކަސްޓަމްސްއިން ބުނެފައިވާ ގޮތުގައި އެ އިދާރާ އިން ހޯކްސްގެ ބޯޓެއްގައި ހިންގި އޮޕަރޭޝްގައި 84،000 އަށް ވުރެ ގިނަ ސިނގިރޭޓު ފޮށި ހިފެހެއްޓިއެވެ. މި މައްސަލައިގައި ހޯމް މިނިސްޓަރާ ސުވާލުކުރުމަށް މަޖިލީހުގެ ސަލަމަތީ ކޮމިޓީގެ ބައްދަލުވުމެއް ތާވަލް ކުރީ ހެނދުނު 9:30 އަށެވެ.
މި މައްސަލައާ ގުޅިގެން ހޯކްސް އިން ނެރުނު ބަޔާނެއްގައި ބުނީ ރާއްޖެއަށް ސިނގިރޭޓް އެތެރެ ކޮށްފައިވަނީ ކުންފުނީގައި މަސައްކަތް ކުރަމުން އަންނަ ބައެއް މުވައްޒަފުން އަމިއްލަ މަންފާއަށް ކަމަށާއި އެފަދަ މުވައްޒަފުންނާއި މެދު ފިޔަވަޅު އަޅާފައިވާ ކަމަށެވެ.
އަދި އެކަމުގައި ކުންފުނީގެ ބައިވެރިވުމެއް ނޯންނާނެ ކަމަށް އެ ބަޔާނުގައިވެއެވެ.
