ދަ ޑިމޮކްރެޓްސްގެ މެމްބަރުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާ އެނބުރި ގުޅެން ނިންމައިފި އެވެ.
މިނިންމުން ނިންމާފައި ވަނީ ޑިމޮކްރެޓްސްއިން މިއަދު ބޭއްވި އެ ޕާޓީގެ ނޭޝަނަލް އެސެމްބްލީގެ ނުރަސްމީ ބައްދަލުވުމުގައި ފާސްކުރި ގަރާރަކާ އެކުގަ އެވެ.
ރައީސް ނަޝީދުގެ އެދިވަޑައިގަތުމަށް އެ ގަރާރު ހުށަހެޅުއްވީ ވިމެން ޑިމޮކްރެޓްސްގެ ލީޑަރު ފާތިމަތު ހަމްދާ މުހައްމަދެވެ.
”ކުރިއަށް އޮތް ލޯކަލް ކައުންސިލް އިންތިހާބު ކާމިޔާބު ކުރުމަށާއި ރާއްޖޭގެ މުސްތަގުބަލު ރަނގަޅު ކުރުމަށާއި ޖަވާބުދާރީ ކުރުވަނިވި ދައުލަތެއް ދެމިއޮތުމަށާއި ގިނަ ޕާޓީ އެކުލެވޭ ވާދަވެރި ސިޔާސީ ނިޒާމާ މެދު ގެއްލެމުންދާ އިތުބާރު އަނބުރާ އިޔާދަކުރުމުގެ މަސައްކަތް ހިންގުމަށް އެންމެ ރަނގަޅު ގޮތަކީ ވަރުގަދަ އޮޕޮޒިޝަނެއް އޮތުން ކަމަށް ވުމާއި އެކަމަށް ޓަކައި ގިނަ ބަޔަކު އެކުގައި މަސައްކަތްކުރުން މުހިންމު ކަމަށް ގަބޫލު ކުރެވޭ ހިނދު، މި މަގުސަދު ހާސިލު ކުރުމަށް، ދަ ޑިމޮކްރެޓްސްގެ މެމްބަރުން އެމްޑީޕީ އާ ގުޅުމަށް އިގުރާރުވަމެވެ.“ ގަރާރުގައިވެ އެވެ.
ހުށައެޅި ގަރާރު ފާސްކޮށްފައި ވަނީ ވޯޓު ދެއްވި 44 މެމްބަރުންގެ ތެރެއިން 35 މެމްބަރުންގެ ތާއީދާ އެކުގަ އެވެ.
މިނިންމުން ނިމިގެންދިޔަ ދަނޑިވަޅަކީ އެމްޑީޕީގެ އެތެރޭގެގުޅުންތައް ހީނަރުވެގެން ގޮސްފައިވާ ދަނޑިވަޅެއްކަން ފާހަގަކޮށްލަން ޖެހެއެވެ. އަދި ގިނަ ސަޕޯޓަރުންގެ އެދުމަކަށްވެގެން ގޮސްފައިވަނީ ޕާޓީން ވަކިވި މެމްބަރުން އެނބުރި ޕާޓީއާއި ގުޅުންކަންވެސް ފާހަގަކޮށްލެވެއެވެ. ދަ ޑިމޮކްރެޓްސްގެ މިނިންމުމާއި އެކު އެމްޑީޕީ އިތުރަށް ހަރަކާތްތެރިވާނެކަމަށްވެސް ބެލެވެއެވެ.
