2022 އަދި 2023ވަނަ އަހަރުގެ އޯލެވެލް އިމްތިހާނުގެ ގަދަ 10 ގައި ހިމެނުނު ދަރިވަރުންނަށް އެވޯޑް ދިނުމުގެ ޖަލްސާ މި މަހު ބާއްވަން އެޑިއުކޭޝަން މިނިސްޓްރީން ނިންމައިފި އެވެ.
އެކަމަކު، އެ ދެ އަހަރުގެ އޯލެވެލް އިމްތިހާނުގައި ދުނިޔޭގެ ފެންވަރުގައި އެންމެ ރަނގަޅު ނަތީޖާ ހޯދި ދަރިވަރުންނަށް ސަރުކާރުން ދޭ ”މަތީ އަރުތަވެރީންގެ އިނާމު“ މިދިޔަ އަހަރުގެ އޭ ލެވެލްގެ ގަދަ 10 ޖަލްސާގައި ދިނެވެ. ނަމަވެސް 2022 އަދި 2023 ގެ އޯ ލެވެލްގެ ގަދަ 10 ގެ ޖަލްސާ އަދި ނުބާއްވަ އެވެ.
އެކަމާ ގިނަ ބެލެނިވެރިން ޝަކުވާ ކުރަމުން ދާއިރު، އެޑިއުކޭޝަން މިނިސްޓްރީން މިހާރު ނިންމާފައި ވަނީ 2022 އަދި 2023 ވަނަ އަހަރުގެ އޯ ލެވެލް ބެޗުގެ ކުދިންގެ ތެރެއިން ގަދަ 10 އަށް ހޮވުނު ކުދިންގެ އިނާމު ދިނުމުގެ ޖަލްސާ އަންނަ ހޮނިހިރު ދުވަހާއި އާދިއްތަ ދުވަހު ބާއްވާށެވެ.
މިނިސްޓްރީން ދަރިވަރުންނަށް އަންގާފައިވާ ގޮތުން، އެ ޖަލްސާގެ ރިހާސަލް ބާއްވާނީ އަންނަ ބުދަ ދުވަހާއި ބުރާސްފަތި ދުވަސް އަދި ހުކުރު ދުވަހު އެވެ.
އޯ ލެވެލްގެ 2022 އާއި 2023 ގެ ބެޗުގެ ގަދަ 10 ގެ ޖަލްސާ ނުބާއްވައި ދިގުލައިގެން ދިޔަ ސަބަބެއް އެޑިއުކޭޝަން މިނިސްޓްރީއަކުން އަދި ނުބުނެ އެވެ.
މިދިޔަ ދެއަހަރު ފިޔަވާ ކޮންމެ އަހަރެއްގައި އެއަހަރެއްގެ އޯލެވެލްގެ ގަދަ 10 ހޮވާ ފާހަގަ ކުރަމުން ދާކަން ފާހަގަ ކުރެވެއެވެ. އަދި ޤައުމީ ފެންވަރެއްގައި ކުދިންގެ ކާމިޔާބީ ފާހަގަކުރުމަކީ ކުދީން ކުރާ މަސައްކަތައް ހިތްވަރު ލިބިގެން ދާނެ ކަމަށް ބެލެނިވެރިން ދެކެއެވެ.
