ރައީސް އިބްރާހީމް މުހައްމަދު ސޯލިހްގެ ސަރުކާރުގައި ކުރިއަށް ގެންދިޔަ ގެދޮރުވެރިޔާ ސްކީމުގެ ތެރެއިން ވަކި ފަރާތްތަކަކަށް ނާޖާއިޒު މަންފާ ހޯދައިދީފައިވާތީ ހައުސިން މިނިސްޓްރީގައި ކުރިން އިސްކޮށް މަސައްކަތް ކުރެއްވި ހަތަރު ބޭފުޅެއްގެ މައްޗަށް ދައުވާކޮށްދިނުމަށް އެދުނީ ސިޔާސީ މަގުސަދެއް ހާސިލްކުރުމަށް ކަމަށް އިދިކޮޅު އެމްޑީޕީން ބުނެފި އެވެ.
އެމްޑީޕީން މިހެން ބުނެފައި މިވަނީ ގެދޮރުވެރިޔާ ސްކީމުގައި އިސްކޮށް އުޅުއްވި ހަތަރު ބޭފުޅުން ކަމަށްވާ އަކްރަމް ކަމާލުއްދީނާއި މުހައްމަދު އާރިފްއާއި ޟިރުޢާމް ވަހީދުގެ އިތުރުން އަހްމަދު ވިޝާން ނަސީމްގެ މައްޗަށް ރަސްމީ ހައިސިއްޔަތާއި އެ ހައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން ނަޖާއިޒު މަންފާ ހޯދައިދިނުމުގެ ކުށުގެ ދައުވާ ކޮށްދިނުމަށް އޭސީސީ އިން ޕީޖީ އޮފީހަށް ފޮނުއްވާފައި ވަނިކޮށެވެ.
އެމްޑީޕީގެ ބަޔާނެއްގައި ބުނީ އެ ދައުވާތައް ކުރަނީ ސިޔާސީ މަގުސަދެއްގައި ރައީސް ޑރ. މުހައްމަދު މުއިއްޒު އަންގަވައިގެން ކަމަށެވެ. ހަތަރު ބޭފުޅަކަށް ދައުވާކުރަން ނިންމިއިރު މި ސަރުކާރުން ފްލެޓް ދިނުމަށް ނިންމާފައިވަނީ ރައީސް ސޯލިހްގެ ސަރުކާރުގައި ގެޒެޓް ކުރި ލިސްޓަށް ކަމަށްވެސް ބަޔާނުގައިވެ އެވެ. އެމްޑީޕީން ތުހުމަތުކޮށްފައިވާ ގޮތުގައި އޭސީސީ އިން އަމަލުކުރަމުން ދަނީ ސީދާ ރައީސް މުއިއްޒުގެ އޯޑަރަށެވެ. މި މައްސަލައިގައި އޭސީސީ އިން އަމަލުކޮށްފައިވަނީ ގާނޫނުތަކާއި ކަނޑައެޅިގެން ހިލާފަށް ކަމަށާއި އޭސީސީގެ ތަހުގީގަކީ ފެށުނީއްސުރެ ވަކި އަތަކަށް ޖެހިފައިވާ ސިޔާސީ ތަހުގީގެއް ކަމަށްވެސް އެމްޑީޕީން ސިފަކޮށްފައިވެ އެވެ.
އެމްޑީޕީން ބުނީ އަކްރަމްގެ ޕާސްޕޯޓްވެސް އަލުން ހިފަހައްޓާފައިވަނީ ސަރުކާރަށް ފާޑުކިޔާ މީހުންގެ އަޑު ކަނޑުވާލައި އިދިކޮޅު ފަރާތްތަކަށް ހުރަސް އެޅުމަށެވެ. ގެދޮރުވެރިޔާ ސްކީމާ ގުޅޭ އެއްވެސް އަސްލެއް ނެތް ހިޔާލީ ތަހުގީގެއްކޮށް ބަޔަކަށް ދައުވާކުރަން އެދުނީ ފްލެޓުތައް ހަވާލުކުރުން ލަސްކުރަން ކަމަށްވެސް ތުހުމަތުކޮށްފައިވެ އެވެ.
