ހައްޖުގެ އަޅުކަމަކީ އިސްލާމްދީނުގެ ރުކުނުގެ ތެރެއިން އެއް ރުކުނެވެ. ކޮންމެ މުސްލިމަކުވެސް ހައްޖުގެ މަތިވެރި އަޅުކަމަށް މާތްވެގެންވާ މައްކާއަށް ދިއުމުގެ އިންތިޒާރު ކުރެއެވެ. ހައްޖުގެ އަޅުކަން ފެށިފައިވަނީ ސަލާމް ލެއްވި އިބްރާހީމްގެފާނު ގެފުޅު ބިނާ ކުރެއްވުމަށް ފަހު ހައްޖަށް އައުމަށް ގޮވާލެއްވި ގޮވާ ލެއްވުއްވުމާ ހަމައިންނެވެ. އިސްލާމް ދީނުގެ އަދާ ކުރަން ޖެހޭ އަޅުކަންތައް ކަމަށްވާ ނަމާދާއި ރޯދަ ފަދަ އަޅުކަންތަކާ ޚިލާފަށް ހައްޖަކީ ވަކި ދުވަސްވަރެއްގައި ވަކިތަނަކަށް ގޮސްގެން އަދާ ކުރެވޭ އަޅުކަމެވެ. ވީމާ ހައްޖުގެ މާތް އަޅުކަން އަދާ ކުރެވޭނީ ހަށިގަޑާ މުދަލާ ވަގުތު ހޭދަކޮށް ތިމާގެ ވަޒަނާ ގާތް އެކުވެރިން އަވަށްޓެރިނާ ވަކިވެގެންނެވެ.
ހައްޖުގެ މަތިވެރި އަޅުކަމުން އިސްލާމީ ތާރީޚީ އެތައް ހަދަން ތަކެއް އައުވެ އާވެގެން ދެއެވެ. އިބްރާހީމްގެފާނާއި އަނބިކަބަލުން ހާޖަރުގެފާނާއި އިސްމާޢީލްގެފާނު މާތްﷲ ގެ އަމުރުފުޅަށް ކިޔަމަންތެރިވެ ވަޑައިގެންނެވި އެތައް ޙާދިޘާއެއް ހައްޖުގެ މަތިވެރި އަޅުކަމުން ސިފަ ވެގެން ދެއެވެ. އެއްވެސް ދިރުމެއް ނެތް މައްކާގެ ހަނަފަސް ބިމަށް ދިރުން ލިބި ތާޒާކަން ލިބި މީސްތަކުން ލޯބި އެބިމަށް ލިބިގެން ދިޔަ ހަދާންތަކެވެ. ޞަފާ އާއި މަރުވާ އާއި ދެމެދު ސައުޔު ކުރުމާއި އަދި މިނާ އާއި އަރަފާތާއި މުޒުދަލިފާ މިއިން ކޮންމެ ތަނަކުން އިސްލާމީ އެތަން ހަދާންތަކެއް އައުވެ އާލާވެގެން ދެއެވެ.
މިއަހަރު ހައްޖުގެ އަޅުކަން އަދާ ކުރުމުގެ ފުރުޞަތު މާތްﷲ މިންވަރު ކުރެއްވި އެންމެހާ މުސްލިމުން އެގެންދަނީ މިއަހަރުގެ ހައްޖުގެ މަތިވަރި އަޅުކަން ފުރިހަމަ ކުރަމުންނެވެ. ހައްޖުގެ އަޅުކަމުގެ ތެރެއިން މުއްސަންޖެއް ފަގީރެއް ތަފާތެއް ނޯވެއެވެ. އަންހެނެއް ފިރިހެނެއްވެސް ތަފާތެއް ނޯވެއެވެ. އިހުރާމް ބަނދެގެންތިބޭ އެންމެހާ ޙައްޖާޖީން ގެފުޅުގެ ވަށައިގެން ޠަވާފްކުރަމުން ދާނީ މާތްﷲގެ ވަޖުހުފުޅު އަދައިގެންނެވެ.
ގެފުލުވަށާ ތައާފު ކުރުމާއި ސަފާ މަރުވާ ދެމެދު ހިނގުމުން ފެނިގެން ދަނީ އިންސާނުން މެދުގައި ތަފާތު ކުރުމެއް ނެތްކަމެވެ. އެންމެ އާދައިގެ ދިރިއުޅުމެއް އުޅޭ މީހާ އާއި މުއްސަދި މަހުޖަނު މީހާއި ގައުމުތަކުގެ ވެރިންވެސް ތަފާތެއް ނެތެވެ. ހައްޖުގެ އަޅުކަމުގައި ހިމެނޭ ކޮންމެ ކަމަކުން އެނގި ހަމާ ވަމުން ދަނީ އިންސާނުންގެ މެދުގައި ތަފާތު ކުރުމެއް ނެތްކެމެވެ. ކުލަ އާއި މީހާގެ އުމުރާ ޖިންސާ މަގާމާއި ޖާހައި ތަވަނަސް ކަމަކީ އިންސާނު މެދުގައި ތަފާތު ކުރުމެއް ނެތްކަމެވެ.
މާދަމާ އަކީ މިއަހަރުގެ ހައްޖު ދުވަހެވެ. ހައްޖުގެ އަޅުކަމުގައި ހިމެނޭ އެންމެ މުހިއްމު ރުކުން ކަމުގައިވާ އަރަފާތު ބިމުގައި ހައްޖާޖީން ތިބޭ ދުވަހެވެ. މާތްﷲގެ ހަޟްރަތުގައި ދުއާކޮށް ފާފަ ފުއްސަވާ ދެއްވުމަށް އެދި ދެންނެވުމުގައި ހައްޖާޖީން ތިބޭ ދުވަހެވެ. އަރަފާތު ބިމުގައި ހައްޖާޖީން ތިބޭ ތިބުމަކީ އެންމެ ގިނަ މީސްތަކުން ދުނިޔޭގެ އެއް ވަގުތެއްގައި އެއްތަނަކަށް އަހަރަކު އެއްފަހަރު އެއްވާ އެއްވުމެކެވެ. އަހަރު ތެރޭގައި މިފަދަ ބައްދަލުވުމެއް ދުނިޔޭގެ އެއްވެސް ތަނެއްގައި ބާއްވަމުން ނުދެއެވެ. އަރަފާތު ބިމުން ސިފަކޮށްދެނީވެސް އިންސާނުންގެ ހަމަ ކަމެވެ. މިވާދަ ވެރި ދުނިޔޭއަކީ އެއްވެސް އަގެއް ނެތް އެއްޗެއް ކަމެވެ. ހައްޖުގެ މަތިވެރި އަޅުކަމުން ތާރީޚީ އެތައް ހަދާންތަކެއް އާވެ އާލާވަމުން ދިއުމާއި އެކު، އެތައް ފިލާވަޅުތަކެއް ލިބެއެވެ. ނަފްސު އިސްލާހުކޮށް ދިރިއުޅުން ބާއްޖަވެރި ކުރުމާއި އެކު އާޚިރަތަށް ތައްޔާރު ވުމަށް އެތައް ތަމްރީނެއް ލިބެއެވެ. ކެތްތެރިކަމާއި މަޑުމޮޅިކަމާއި، އޯގާތެރި ކަމާއި ހިތްތިރިކަން ފަދަ ކަންކަމަށް ނަފުސު ތައްޔާރުކޮށް ދެއެވެ. ޖިސްމާނީ ހަށިގަނޑުގެ ރޫހާނީ ބާރުން ތާޒާކަން ގެނުވައެވެ. އުޚުރަވީ ހަޔާތްތަށް ތައްޔާރުވުމަށް ލިބޭ އެންމެ ބޮޑު ތަމްރީނަކީ ހައްޖުގެ މަތިވެރި އަޅުކަމެވެ. ވީމާ ކޮންމެ މުސްލިމަކުވެސް ހައްޖުގެ މަތިވެރި ދަތުރަ ދިއުމަށް ހިތާ ދުލުން އެކަމަށް އެދި ދުޢާ ކުރެއެވެ. އެދަތުރަށް އިންތިޒާރު ކުރެއެވެ.
