އައިޖީއެމްއެޗުން، ޑިސްއިންފެކްޓަންޓު ހުސްވެފައި ހުއްޓައި، އައިޖީއެމްއެޗްގެ ތުއްތު ކުދިންނަށް ފަރުވާ ދޭ ޔުނިޓް ކަމަށްވާ، އެންއައިސީޔޫގައި ނުރައްކާތެރި ބައްޔެއް ފެތުރި ގިނަ ކުދިންތަކަކަށް އެބަލިޖެހި އެކުދިންގެ ހާލު ވަރަށް ބޮޑަށް ދަށްވެފައިވާކަމަށް މާލޭ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މިކަމާ ކަންބޮޑުވުން ފާޅުކުރައްވާ މޭޔަރ އާޒިމް އިތުރަށް ވިދާޅުވީ މާލެސިޓީގެ ރައްޔިތުން އަދި ރާއްޖޭގެ ގިނަ ރައްޔިތުން، ޞިއްޙީ ފަރުވާ ހޯދަމުންދާ މައި ހޮސްޕިޓަލްގެ ސިއްޙީ ޚިދުމަތުގެ ކަންކަން މިހާ ދަށަށްގޮސް، ބޮއްސުންލައި ދިޔުމަކީ ބަލައިގަނެވޭނެ ކަމެއްނޫންކަމަށެވެ.
މީގެ އިތުރުންވެސް މޭޔަރ އާޒިމްވަނީ މިހާރުވެސް އެތަށް ރައްޔިތުންނެއް ބޭސްފަރުވާއަށް ސަލާންޖަހަމުންދާކަން ފާހަގަކުރައްވާފައެެވެ. އަދި ބޭސް ސިޓީއަށް ބޭސް ނުލިބޭކަމުގެ ޝަކުވާ ރައްޔިތުން ކުރަމުންދާ ކަމުގައިވެސް މޭޔަރ އާޒިމްގެ ޕޯސްޓްގައި ވިދާޅުވެފަވެއެވެ.
ސަރުކާރުގެ މުއައްސަސާތަކުން، ކުރާ ބޭކާރު ޚަރަދުތައް ކުޑަކޮށް، ރައްޔިތުންގެ ޞިއްޙީ ފަރުވާ އަދި އެހެނިހެން އަސާސީ ޚިދުމަތްތަކަށް އިސްކަންދިނުމަށް މޭޔަރ އާޒިމްވަނީ ގޮވާލައްވާފައެވެ.
މޭޔަރ ޢާޒިމް މިފަދަ ޕޯސްޓެއްކުރައްވާފައިވާއިރު މި މަހުގެ 1ވަނަ ދުވަހު އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ނިއުބޯން އިންޓެންސިވް ކެއަރ ޔުނިޓް (އެންއައިސީޔޫ)ގައި ނުރައްކާތެރި ބެކްޓީރިއާއެއް ފެނިފައިވާ ކަމަށް އެ ހޮސްޕިޓަލުންވަނީ ހާމަކޮށްފައެވެ. މިގޮތުން އެންއައިސީޔޫގައި ފަރުވާ ދެމުންދާ ބައެއް ކުދިންގެ ގައިން މަލްޓި-ޑްރަގް ރެޒިސްޓަންޓް އޯގަނންޓް އޯގަނިޒަމްސް (އެމްޑީއާރްއޯ) ކިޔާ ނުރައްކާތެރި ބެކްޓީރިއާއެއްވަނީ ފެނިފައިވާކަމަށް އައިޖީއެމްއެޗްއިން ވަނީ ބުނެފައެވެ. އަދި އެކަން ފާހަގަވުމާއެކު މުޙިއްމު ފިޔަވަޅުތަކެއް އަޅާފައިވާކަމަށްވެސް އެ ހޮސްޕިޓަލުން ބުނެފައިވެއެވެ. އަދި ކުދީންގެ ރައްކާތެރިކަމާއި ބެކްޓީރިއާ އިތުރަށް ފެތުރުން ކޮންޓްރޯލް ކޮށްފައިވާކަމަށްވެސް ހޮސްޕިޓަލުން އޭރު މަޢުލޫމާތުދެއްވިއެވެ.
.
