2027 އަންނައިރު ބައެއް ދާއިރާތަކުގައި ބިދޭސީންނަށް ވަޒީފާގައި ނޫޅެވޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ދިވެހީންނަށް ބައެއް ދާއިރާތައް ޚާއްސަކުރަން ތިން އަަހަރު ދުވަހުގެ މަޝްރޫއެއް މިދިޔަ އަހަރު އިއުލާންކޮށްފައިވާކަން ރައީސް ފާހަގަކުރެއްވިއެވެ. އަދި އެމަޝްރޫއުގެ ދަށުން، އަންނަ އަހަރު ނިމޭއިރު، ތައުލީމު ލިބި، ތަމްރީނު ދެވިގެން، ޤާނޫނަށް ގެންނަން ޖެހޭ ބަދަލުތައް ގެނެސްގެންވެސް އެ ވަޒީފާތައްވާނީ ދިވެހީންނަށް އެކަނި ޚާއްސަ ވަޒީފާތަކަށްކަމަށް ރައީސުލްޖުމްހޫރިއްޔާ ޑރ. މުއިއްޒު ވިދާޅުވިއެވެ.
އެ މަޝްރޫއުގެ ދަށުން ދިވެހިންނަށް ޚާއްޞަކުރާ ދާއިރާތަކަކީ ، އޮޑިދޯނިފަހަރު ބަނުން ، މާވަޑާމުގެ ދާއިރާ ، ޑައިވިން އިންސްޓްރަކްޓަރ ، ހިއުމަން ރިސޯސަސް މެނޭޖަރ ، ފްރަންޓް އޮފީސް މެނޭޖަރ ، ހައުސްކީޕިން މެނޭޖަރ ، ކަސްޓަމަރ ސާވިސް ، ރިސޯޓް މިއުޒީޝަނުންނާއި ބޭންޑް ، ޓުއަރ ގައިޑުން އަދި ހެއަރ ޑްރެސަރ އެންޑް ބިއުޓީޝަންއެވެ.
މި ދާއިރާތަކުގެ ތެރެއިން ހެއަރ ޑްރެސަރ އެންޑް ބިއުޓީޝަން އަދި ރިސޯޓް މިއުޒިކްގެ ދާއިރާތަކަކީ މިހާރު ބިދޭސީން ގިނަ އަދަދަކަށް ޙަރަކާތްތެރިވާ ދާއިރާތަކެއްކަން ފާހަގަކުރެވެއެވެ. އޭގެ ސަބަބުން ދިވެހިންނަށް ފުރުސަތު ގެއްލޭ ކަމުގެ ކަންބޮޑުވުން ދާއިރާގައި ޙަރަކާތްތެރިވާ މީހުން އަބަދުބެސް ފާޅުކުރެއެވެ. ފާހަގަކޮށްލެވޭ ގޮތުގައި ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ވެރިކަމުގައި، ފޮޓޯގްރަފީއާއި ފިހާރަތަކުގެ ކޭޝިއަރުން ފަދަ ބައެއް ވަޒީފާތައް ދިވެހީންނަށް ޚާއްސަކުރަން ނިންމަވައިފައިވެއެވެ.
