ރާއްޖޭގެ ތާރީޙުގައި އެއް އަހަރެއްތެރޭ އެންމެ ގިނަ މިސްކިތް އިމާރާތްކުރެވިގެންދާނީ މި ހިނގާ 2025 ވަނަ އަހަރު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިސްކިތް އިމާރާތްކުރުމުގެ 21 މަޝްރޫއެއް މިހާރު ކުރިއަށްދާ ކަމަށް މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ރައީސް ވިދާޅުވިއެވެ.
އަދި މިސްކިތް އެޅުމަށް 17 މަޝްރޫއެއްގައި ސޮއިވެސް ކުރެވިފައިވާކަމަށް އެމަނިކުފާނު ވިދާޅުވިއެވެ.
އަދި ހަމަ އެހެންމެ މި އަހަރުގެ ތެރޭގައި މިސްކިތް އެޅުމުގެ ގިނަ މަޝްރޫއުތަކެއް އިރާދަކުރެއްވިއްޔާ ނިމޭނެކަމަށް ރައީސް ވިދާޅުވިއެވެ.
”މިއީ އެއް އަހަރެއްގެ ތެރޭގައި އެންމެ މިސްކިތް އިމާރާތް ކުރެވޭ އަހަރަށް ވެގެންދާނެ. 2025“ ރައީސް ވިދާޅުވި އެވެ.
މިސްކިތްތައް އަޅާ ރަށްތަކުގެ ތެރޭގައި ކޮންމެ އަތޮޅަކުން ވެސް ރަށެއް ހިމެނެއެވެ އޭގެ ތެރޭގައި އައްޑޫ ހުޅުމީދޫ، ހިތަދޫ، ފުވައްމުލައް ސިޓީީ، ފ. ނިލަންދޫ، ހއ. ބާރަށް ފަދަ ރަށްރަށް ހިމެނެއެވެ.
އަންނަ އަހަރަށް އިސްލާމީ ދާއިރާއިން ކުރިއަށް ގެންދާ މަޝްރޫއުތަކުގެ ތެރޭގައި މިސްކިތްތައް އެޅުމާއިއެކު އިސްލާމިކް ސެންޓަރު އެޅުމުގެ އިތުރުން ޤުރުއާނާ މެހޭ މަރުކަޒުތައް އެޅުން ވެސް ހިމެނޭކަން ރައީސް ފާހަގަކުރެއްވިއެވެ.
އެގޮތުން އަންނަ އަހަރު 20 ރަށެއްގައި އިސްލާމީ ދާއިރާތަކާ ގުޅޭ މަޝްރޫއުތައް ކުރިއަށް ގެންދާނެ ކަމަށް އެމަނިކުފާނު ވިދާޅުވިއެވެ.
