މާލޭސިޓީގައި ޒުވާނުންކުރަމުންދާ މުޒާހަރާއަށް ހިތްވަރުދީ މާލެސިޓީގެ ގަލޮޅު އުތުރު ކައުންސިލަރ މުޙައްމަދު ސައިފް ފާތިޙް އާއި ގަލޮޅު ހުޅަނގު ކައުންސިލަރ މަރިޔަމް ނާޒިމާ މުޙައްމަދު ފާއިޒު ސޮއިކޮށް މިއަދު ނޫސްބަޔާނެއްނެރެފިއެވެ.
ދެ ކައުންސިލަރުން ނެރުން ނޫސްބަޔާނުގައި ވަނީ، މާލެ ސިޓީ ކައުންސިލަކީ މާލޭގެ ޢާންމު ހުސްޖާގަތަކާއި ބިންތަކާއި މަގުތަކާއި ޕާކުތަކާއި ކުޅިވަރު ދަނޑުތަކުގެ މައްޗަށް އިޙްތިޞާޞްލިބިގެންވާ، މާލޭގެ އަހުލުވެރިންގެ ދުޅަހެޔޮކަމާއި، ޢާންމު ސަލާމަތާއި ރައްކާތެރިކަމުގެ މައްޗަށް މަސްއޫލުވެރި ކުރެވިފައިވާ އިންތިޚާބީ ބެލެނިވެރި ފަރާތްކަމަށް ވީހިނދު، އެކައުންސިލްގެ މެންބަރުންގެ ރަސްމީ ޙައިސިއްޔަތުން ދަންނަވަމެވެ.
18 އޭޕްރީލް 2025 ވީ ހުކުރު ދުވަހުގެ ހެނދުނު މާލޭގެ ޢިމާރާތެއްގެ ފުރާޅު މައްޗަށް ޙައްވާ ޔުމްން ރަޝީދު ވެއްޓިފައި އޮއްވާފެނުނު މައްސަލައިގައ، ނުފޫޒުހުރި ސިޔާސީގޮތުން ގުޅިފައިވާ ފަރާތްތަކެއްގެ ޝާމިލުވުމާއި ބައިވެރިވުން އޮވެމެ، އެކަން ފޮރުވާންފުލުހުން މަސައްކަތްކޮށްފައިވާތީ އެކަމާ ނުރުހުން ފައުޅުކޮށ،ް ޒުވާނުން އިސްވެ ހިންގަމުންގެންދާ ސުލްޙަވެރި ސިލްސިލާ އިޙްތިޖާޖުތަކަށް 1 މޭ 2025 ވީ ބުރާސްފަތި ދުވަހުގެ ރޭ ފުލުހުން ހުރަސްއަޅާފައިވާތީ، އެކަން ކުށްވެރި ކުރަމެވެ.
އިޙްތިޖާޖުގެ ތެރެއަށް އިންޒާރު ދިނުމަކާ ނުލައި،ފުލުހުން ގަދަކަމުން ވަދެގަނެ، ސްޕީކަރާއި މައިކުތައް ދަމައިގަނެ، ޕެޕާރސްޕްރޭޖަހާ،ކޮއްޕާ، ގަޅުވާ،އަނިޔާކޮށް އިޙްތިޖާޖުގެ އިސް ދެ ބައިވެރިން ކަމަށްވާ ޢާއިޝަތު ޝިމަން އަޙްމަދު އާއި ޢަބްދުالله މަޙްޒޫމް މާޖިދު ހައްޔަރުކޮށްފައިވެއެވެ. ކޮންމެ ރެޔަކު ޤަވާއިދުން 12:00 ގައި ނިންމާލާ އެއްވުމެއްގެ ތެރެއަށް 11:40 ވެސް ވީ ފަހުން މިބާވަތަށް އަރައިގަތުމަކީ މާނައެއް ނެތް ކަމެކެވެ. އެމަގުން ޢަމަލުކުރުމުގެ ހަމައެކަނި މަޤްސަދަކީ ބިރުދެއްކުން ކަމަށް ޤަބޫލުކުރެވެއެވެ. ހައްޔަރުކޮށް، މުއްދަތު ޖަހާފައިވާ އެދެ ޒުވާނުން މިހިނދުން މިހިނދަށް މިނިވަންކުރާން ގޮވާލަމެވެ.
ޙައްވާ ޔުމްން ރަޝީދުގެ މައްސަލައިގައި ފުލުހުން ފުރަތަމަ ދެއްކި ވާހަކަޔާއި އިޙްތިޖާޖުތަކުގެ ޕްރެޝަރުގައި ރާގު ބަދަލުވިގޮތާއި،ފުލުހުންގެ ކޮމިޝަނަރ އިސްތިޢުފާދެއްވުމާއި،ފުލުހުން ޢަމަލުކުރި ގޮތް ބަލާ ތަޙްޤީޤުކުރާން ރިޔާސީ ކޮމިޝަނެއް އެކުލަވާފައިވުމަކީ، އިޙްތިޖާޖުތައް ބިނާވެފައިވަނީ ސަބަބުވެރި ސާބިތުހިފޭ ތަރަހައެއްގެ މައްޗަށްކަމަށް ދަލީލުކުރާ ކަންކަމެވެ. ވުމާއެކު އަމުދުން ޚާއްސަކޮށް މިމައްސަލައިގައި ފުލުހުންގެ ފުށުން ހިފެހެއްޓުންތެރިކަމާއި މައިތިރިކަން ދެއްކުމަކީ ސުލޫކީ އަދި އަޚްލާޤީ ޒިންމާއެއްކަން ހަނދާކޮށްދީ، ހަރުކަށިކަމާއި އަނިޔާވެރިކަމުން އެއްކިބާވުމަށް ފުލުހުންނަށް ގޮވާލަމެވެ.
އަދި ދަންނަވަމެވެ. އިސްލާމް ދީނުގެ އަސްލަކާ ޚިލާފު ނުވާގޮތުގެ މަތީން ޚިޔާލު ފައުޅުކުރުމާއި، ކުރިން ހުއްދަ ހޯދުމަކާ ނުލައި އެއްވެއުޅުމަކީ ދުސްތޫރީގޮތުން ލިބިދީފައިވާ ޢާންމު އަސާސީ ޙައްޤަކާއި މިނިވަންކަމެކެވެ. އެޙައްޤުތަކަށް ފުރިހަމައަށް އިޙްތިރާމުކުރުމަށް ސަރުކާރަށާއި ފުލުހުންނަށް ގޮވާލަމެވެ. އެއްވެ އުޅުމުގެ މިނިވަންކަން ހަނިކުރާން ޤާނޫނެއް 2016 ގައި އޭރުގެ ވެރިކަން ކުރާ ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) އިން އެކުލެވުމުން، އެޤާނޫނަށް އެންމެ ބޮޑަށް ފާޑުވިދާޅުވީ ރައީސް އިބްރާހިމް މުޙައްމަދު ޞާލިޙެވެ. ނަމަވެސް
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އަށް މަޖިލީހުގެ ސުޕަރމެޖޯރިޓީ ލިބުމާއެކުވެސ،ް އެމަނިކުފާނުގެ 5 އަހަރުގެ ދައުރު ނިންމަވާލެއްވީ އެޤާނޫނު އޮތްގޮތަށް ބާއްވަވައިގެންނެވެ. މިހާރު ވެރިކަމުގައި ޕީޕަލްސް ނޭޝަނަލް ކޮންގްރެސް ގެ ޓިކެޓުގައި ހުންނެވި ރައީސް ޑރ. މުޙައްމަދު މުޢިއްޒުވެސް 2023 ގައި ވެރިކަމަށް ވަޑައިގަތީ އެއްވެ އުޅުން ހަނިކުރާ 2016 ގެ ޤާނޫނަށްފާޑުވިދާޅުވަމުންނެވެ.މަޖިލީހުގެ ސުޕަރމެޖޯރިޓީއާއެކު އެމަނިކުފާނުވެސް އެއްވެ އުޅުމުގެ ޙައްޤު ހަނިކުރާ ޤާނޫނު އުވާލައްވާކަށް ނޫޅުއްވައެވެ. ވެރިކަމަށް ވަޑައިގެންނެވިއިރު ވީ ވަޢުދުފުޅު ހަނދުމަފުޅަށް ގެންނަވާ، އެއްވެއުޅުމުގެ ޙައްޤު ހަނިކުރާ ޤާނޫނު އުވާލެއްވުމަށް ރައީސް ޑރ. މުޙައްމަދު މުޢިއްޒަށް ގޮވާލަމެވެ.
މިއިޙްތިޖާޖުތަކަށް މާލޭގެ މަގުތަކާއި ހުސްޖާގަތަކާއި ޕާކުތައް ހުޅުވިގެންވާކަން އޮޅުމެއްނެތި ބަޔާންކުރުމަށާއި މިޙަރަކާތަށް ހިތްވަރުދިނުމަށާއި، އެއިން ޙަރަކާތަކަށް ހުރަސް ނޭޅުމަށް ސަރުކާރަށް ގޮވައިލުމަށާއި، ސަރުކާރުގެ ނުފޫޒުގަދަ ބައެއްގެ ގާތްތިމާގެމީހުން ފިލުވުމާއި ރެކުވުމާއި ސަލާމަތްކުރުމުގެ އަމާޒުގައި ފުލުހުން ޢަމަލުކޮށްފައިވާގޮތުން ތަޙްޤީޤުގެ އިތުބާރު ގެއްލިފައިވާކަން ފާހަގަކޮށް، އިންސާފުވެރިކަމާއި ޕްރޮފެޝަނަލް މިންގަނޑުގައި ދެފުށްފެންނަ ގޮތުގައި ތަޙްޤީޤު ހިންގާން ސަރުކާރާއި ފުލުހުންނަށް ގޮވާލުމަށާއި، އިޙްތިޖާޖުގެ ބައިވެރިން އަދި ޙައްވާ ޔުމްން ރަޝީދުގެ ޢާއިލާގެ މަންދޫބުން ހިމެނޭހެން އެކުލަވާ އިންކުއަރީކޮމިޝަނަކުން ސަރުކާރާއި ފުލުހުން މިމައްސަލައިގައި ޢަމަލުކޮށްފައިވާ ގޮތް ބަލާ، މިނިވަން އިންކުއަރީއެއް ހިންގާން ގޮވައިލާން
ކައުންސިލުގައި މަޝްވަރާކޮށް ފާސްކޮށް،އެކަން ބަޔާނެއްގެ ސިފައިގައި ޢާންމުކުރުމަށް ނުވަތަ އެކަމަށް އަޣްލަބިއްޔަތު ނުރުހޭނަމަ،އެކަމާ އެއްބަސްވެވޭ ކައުންސިލް މެންބަރުންގެ ސޮޔާއެކު އެފަދަ ބަޔާނެއް ޢާންމުކުރުމުގެ ފުރުސަތު ފަހިކޮށްދިނުން އެދި 26 އޭޕްރީލް 2025 ގައި މޭޔަރ އާދަމް ޢާޒިމްގެ އަރިހުގައި ރަސްމީ ސިޓީއެއް މެދުވެރިކޮށް އެދި، ދަންނަވާފައިވާނެކަންވެސް މިހިނދު ފާހަގަކުރަމެވެ.
ޙައްވާ ޔުމްން ރަޝީދަށް އިންސާފު ހޯދާން ޒުވާނުން އިސްވެ ކުރަމުންދާ އިޙްތިޖާޖަށް ހިތްވަރުދީ، ސާބަސް ރައްދުކުރާ ވާހަކަވެސް ދެންނެވުމާއެކު،އިންސާފަށް ވަކާލާތުކުރުމާއި އަސާސީ ޙައްޤުތަކާއި މިނިވަންކަމުގެ ދިފާޢުގައި އަޅުގަނޑުމެން ކެނޑިނޭޅި ހިންމަތްކުރަމުން ދާނެކަމުގެ ޔަޤީންކަންވެސް އެރުވީމެވެ.
