މަސްޖިދުއްނަބަވީގެ އިމާމު ޝައިހް ޑރ. ސަލާހުލް ބުދައިރު ބުދަދުވަހުގެރޭ މަޤްރިބް އަދި އިޝާ ނަމާދު އިމާމްވެ ކުރައްވައިފިއެވެ.
ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅެއްގައި މަސްޖިދުއްނަބަވީގެ އިމާމު ޝައިހް ޑރ. ސަލާހުލް ބުދައިރު ރާއްޖެ ވަޑައިގަތީ މިދިޔަ ހޯމަދުވަހުގެ މެންދުރުގެ ވަގުތެއްގައެވެ.
އެމަނިކުފާނުގެ ފަހަތުހައި ނަމާދުކުރަން އެތައް ބަޔަކު ސަލްމާން މިސްކިތުގެ މަޤްރިބު ނަމާދުގެ ޖަމާއަތުގައި ބައިވެރިވެފަވެއެވެ.. މިގޮތުން ގިނަ އަދަދެއްގެ ޒުވާނުންނާއި ދުވަސްވީ މީހުންނާއި ކުޑަކުދިންގެ އިތުރުން. ގިނަ އަދަދެއްގެ އަންހެނުންވެސް ވަނީ މި ޖަމާއަތުގައި ބައިވެރިވެފައެވެ. ބުދަދުވަހު ހަވީރު 5:30 ވުމުގެ ކުރިން ސަލްމާން މިސްކިތަށް މީހުން ޖަމާވަމުން ދިޔައެވެ މިގޮތުން ހައެއް ޖެހިއިރު، މިސްކިތުގެ ކުރީ ހަތަރު ސަފު އޮތީ ފުރިފައެވެ. މަޤްރިބު ނަމާދު ފަށަށްވާއިރަށް މުޅި މިސްކިތް އޮތީ ފުރި ބާރުވެފަކަން ފާހަގަކޮށްލެވެއެވެ. މަޤްރިބު ނަމާދު ވަގުތު މިސްކިތުގެ ކުރީ ސަފުތަކުން ޖާގައެއް ހޯދީ ކުރިއާލައި މިސްކިތަށް ދިޔަ އުމުރުން 15، 16 އަހަރުގެ ކިޔަވާ ކުދިންކަންވެސް ފާހަގަކޮށްލެވެއެވެ. އެ އުމުރުގެ ވަރަށް ގިނަ ކުދިން، އަޅައިގެން ތިބީވެސް އިސްލާމީ ވަންތަކަށް ދައްކައިދޭ ހެދުމެވެ.
ބުރާސްފަތިދުވަހުގެރޭ އިސްލާމީ މަރުކަޒުގައި އިމާމުވެ އިޝާ ނަމާދު ކުރައްވާނީވެސް ޝައިޚް ޑރ. ސަލާހުލް ބުދައިރުއެވެ. އަދި އިޝާ ނަމާދަށްފަހު އެމަނިކުފާނު ޙާއްޞަ ދަރުހެއް އިސްލާމީ މަރުކަޒުގައި ދިނުމަށް ހަމަޖެހިފައިވާކަމަށްވެސް އިސްލާމިކް މިނިސްޓްރީން މައުލޫމާތުދެއްވައެވެ. އަދި އަންނަ ހުކުރު ދުވަހު އިސްލާމީ މަރުކަޒުގައި އިމާމުވެ ހުކުރު ކުރައްވާނީވެސް ޑރ. ސަލާހުލް ބުދައިރުއެވެ.
ނަބަވީ އިމާމު ޝައިހް ޑރ. ސަލާހުލް ބުދައިރު މިހާރު ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގައި އެމަނިކުފާނު ވަނީ ރައީސް ޑރ. މުއިއްޒާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ އިތުރުން ރާއްޖޭގެ އިސްލާމީ ފަތުވާދޭ އެންމެ މަޖިލީހާއި ބައްދަލުކުރައްވާފައެވެ.
ނަބަވީ އިމާމު ޝައިހް ޑރ. ސަލާހުލް ބުދައިރު މި ދަތުރުފުޅަކީ 40 އަހަރު ފަހުން ހަރަމްފުޅެއްގެ އިމާމަކު ރާއްޖެވަޑައިގެންނެވި ފުރަތަމަ ފަހަރުއެވެ. އެންމެ ފަހުން ހަރަމްފުޅެއްގެ އިމާމަކު ވަޑަައިގެންނެވީ އިސްލާމީ މަރުކަޒު ހުޅުވުމުގެ ރަސްމިއްޔާތަށެވެ. އެފަހަރު ވަޑައިގެންނެވީ މައްކާގެ ހަރަމްފުޅު މަސްޖިދުއް ހަރަމްގެ އިމާމު ފަލީލަތުއްޝައިހު މުހައަމަދު އައްސުބައްޔިލެވެ
