ރަޖިސްޓްރީ ކޮށްގެން ހިންގާ ރާއްޖޭގެ މީޑިއާތަކަށް ދިމާވާ ގޮން ޖެހުންތައް ހައްލު ކުރުމާއެކު މީޑިއާގެ ފަރާތްތައް ބާރުވެރި ކުރުމަށް ކުރެވިދާނެ ކަންކަމާމެދު ހިޔާލު ބަދަލުކޮށްލުމަށް މިނިސްޓްރީގެ ފަރާތުން މީޑިއާތަކުގެ އެޑިޓަރުންނާއި އަދި ވެރިންނާ ބައްދަލު ކޮށްފިއެވެ.
މީޑިއާތަކުގެ އެޑިޓަރުންނާއި މަސްއޫލުވެރިންނަށް، މިނިސްޓަރ އޮފް ޔޫތު އެމްޕަވަމަންޓް އިންފޮމޭޝަން އެންޑް އަރޓްސް އިބްރާހިމް ވަހީދު ދެއްވި ’ހައި-ޓީ‘ އެއްގައި، މިނިސްޓަރު ވަނީ މީޑިއާ އާ ގުޅުންހުރި ގިނަ ދާއިރާތަކުން މީޑިއާތަކުގެ ވެރިންނާ މަޝްވަރާ ކުރައްވައި ހިޔާލު ބަދަލު ކުރައްވާފައެވެ.
އެގޮތުން ރަޖިސްޓްރީ ކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީތެރިކަން ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައި ވުމާއެކު މާލީ އެހީދޭނެ އުސޫލެއް އެކުލަވާލުމަށް، ބްރޯޑްކާސްޓިން އަދި އޮންލައިން މީޑިއާތަކުގެ ގިނަ ވެރިންނާއެކު ކުރެވުނު މަޝްވަރާއާ އެއްގޮތަށް މިހާރު ވަނީ އުސޫލު އެކުލަވާލައި ނިމިފައެވެ.
މި އުސޫލު ގެޒެޓް ކުރެވުމާއެކު ލަސްލަތެއް ނުވެ ޕްރޮޕޯޒަލް ހުށަހެޅުމަށް ހުޅުވާލެވޭނެ ކަން މިނިސްޓަރު ވަނީ ފާހަގަ ކުރައްވާފައެވެ.
މީގެ އިތުރުން ބްރޯޑްކާސްޓިން ކޮމިޝަނާއި މީޑިއާ ކައުންސިލް އެއްކޮށްލުމާ ގުޅޭގޮތުން މިހާތަނަށް ކުރެވިފައިވާ މަސައްކަތްތަކާ ބެހޭގޮތުންވެސް މިނިސްޓަރު ވާހަކަފުޅު ދެއްކެވިއެވެ. އެގޮތުން އެ ދެ މުއައްސަސާ އެއްކޮށްލުމަށް އެއްވެސް ނޫސްވެރިއަކު ދެކޮޅު ނުހަދާ ކަމަށާއި، އެއީ އެކަން އޮންނަން ވީ ގޮތްކަމަށް ދެކެވަޑައިގަންނަވާ ކަމަށް ވިދާޅުވިއެވެ. އަދި އެ ދެ މުއައްސަސާ އެއްކޮށްލުމަށްޓަކައި ހަދަން ޖެހޭ ޤާނޫނީ އޮނިގަނޑުގެ މަސައްކަތް އޭޖީ ގެ މަސައްކަތްތަކުގެ ތެރޭގައި ހިމެނިގެން ކުރިއަށްދާކަމަށްވެސް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރ އަލިއަޅުއްވާލެއްވި ކަންކަމުގެ ތެރޭގައި ނޫސްވެރިކަމުގެ ދާއިރާގައި މަސައްކަތް ކުރާ ފަރާތްތަކުގެ ދަފްތަރެއް އޮތުމުގެ މުޙިއްމު ކަމާއި ރަޖިސްޓްރީ ކޮށްފައި ވާ ނޫސް މަޖައްލާތަކުގެ އެޑިޓަރުންނާއި މަސްއޫލުވެރިން އަދި ނޫސް ރީބްރޭންޑް ކުރާ އިރު، އެ މައުލޫމާތު މިނިސްޓްރީ އާ ހިއްސާ ކުރުމަށް އެދިވަޑައިގެންނެވިއެވެ.
މި ބައްދަލުވުމުގައި ބައެއް އެޑިޓަރުން ވަނީ، ދައުލަތުގެ ބަޖެޓުން ފައިސާ ދޫކުރުގެ އިތުރުން ބްރޯޑްކާސްޓިން ކޮމިޝަނާއި މީޑިއާ ކައުންސިލް އެއްކޮށްލާ ބިލް އަވަސް ކުރުމަށް އެދިފައިވެއެވެ. އަދި މީޑިއާގެ ދާއިރާއަށް ދިމާވާ އެކިއެކި ގޮންޖެހުންތަކަށް ހައްލު ހޯދައި ދިނުމަށް މަސައްކަތް ކުރުމަށް ވެސް އެދިފައިވާކަން ފާހަގަކޮށްލެވެއެވެ.
މީގެ އިތުރުން އެކި މަންސަ ތަކުގައި ދޮގު ހަބަރު ފެތުރޭ އިރު ހުރިހާ ނޫސްވެރިންނަށް ނިސްބަތްވާ ގޮތަށް އެކަން ވުމަށް ނޭދޭ ކަމަށާއި ސަރުކާރުގެ އެކިއެކި ޕްރޮގްރާމުތަމުގެ މަންފާ މީޑިއާތަކަށް ލިބޭއިރު، ދޮގުހަބަރު ފަތުރާ ފަރާތްތަކުގެ ކޮންޓެންޓް ބެލޭނެ މިންގަނޑެއް އޮތުން މުޙިއްމު ކަމުގައި ފާހަގަކުރިއެވެ.
