ގދ. ވާދޫއަށް އަދިވެސް ދިވެހި ޓީޗަރެއް ހަމަޖެހިފައި ނުވާ ކަމަށް ރައީސުލްޖުމުހުރިއްޔާ ޑޮކްޓަރ މުޙަންމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ރައްޔިތުންގެ ޚިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ ”ރައްޔިތުންނާ އެކު“ ސިލްސިލާ ޕޮޑްކާސްޓްގެ 3 ވަނަ އެޕިސޯޑްގައި ވާހަކަފުޅު ދައްކަވަމުން އާއްމުން ފަރާތަކުން ކުރައްވާފައިވާ ސުވާލަކަށް ޖަވާބު ދެއްވަމުންނެވެ.
ގދ.ވާދޫގައި ދިވެހި ޓީޗަރެއްނެތް މައްސަލަ އެމަނިކުފާނު ވާދުއަށް ކުރެއްވި ދަތުރުފުޅުގައިވެސް ފާހަގަ ކުރެއްވިފައިވާ ކަމަށާއި އެރަށުގައި ދިވެހި ޓީޗަރެއް މައްސަލައަކީ ވަރަށް އާދަޔާ ޚިލާފު މައްސަލައެއް ކަމަށް ވިދާޅުވިއެވެ. ރައީސް ޑޮކްޓަރ މުޙަންމަދު މުޢިއްޒުވިދާޅުވީ ވާދޫގައި ދިވެހި ޓީޗަރެއް ނެތް މައްސަލަ ފުރަތަމަ ދިމާވީ އޭރު ހުންނެވި ދިވެހި ޓީޗަރ ނޯޕޭ ލީވް ނެންގެވުން ކަމަށާއި ، މުދައްރިސަކު ހޯއްދެވުމަށް 3ފަހަރެއްގެ މަތީން އިޢުލާންކޮށްގެން އަދިވެސް ދިވެހި ކިޔަވައި ދެއްވާނެ ޓީޗަރެއް ލިބިފައި ނުވާކަމަށް ރައީސް ވިދާޅުވިއެވެ. ވަގުތީ ގޮތުން ވެސް ވާދޫގެ ތެރެއިން ޓީޗަރެއް ހޯއްދެވުމަށް ކުރެއްވި މަސައްކަތުން ވެސް ޓީޗަރެއް ލިބިފައި ނުވާކަމަށް ރައީސް ވިދާޅުވިއެވެ. މިކަން ހައްލުކުރުމަށްޓަކައި މިހާރު އެރަށު ސްކޫލްގައި ކިޔަވަދެނީ އޮންލައިން ކޮށް ކަމަށާއި އަދި ކައިރި ރަށެއްގެ ޓީޗަރަކު ހަފްތާ ބަންދުގައި ވާދޫއަށް ގޮސް ދަރިވަރުންނަށް އިތުރު އެހީތެރިކަން ފޯރުކޮށްދޭ ކަމަށް ރައީސް ޑރ މުއިއްޒު ވިދާޅުވިއެވެ.
