ބަރަކާތްތެރި ރަމަޟާން މަހުގެ ފަހު ދިހައިގެ ހެޔޮ ދުޢާ ތަހުނިޔާ އެންމެހާ ލޮބުވެތި ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފި އެވެ.
އެމަނިކުފާނު ދިވެހި ރައްޔިތުންނަށް ތަހުނިޔާ ފޮނުއްވެވީ ބުރާސްފަތި ދުވަހުގެރޭ އެކްސްގައި ކުރެއްވި ޕޯސްޓެއްގަ އެވެ.
މިގޮތުން ރައީސް ވަނީ ހިނގަމުންމިދާ ބަރަކާތްތެރި ރަމަޟާން މަހުގެ ފަހު ދިހައިގެ ބަރަކާތް ލިބިގަތުމަށް ގަދައަޅައި މަސައްކަތް ކުރަން އެންމެހާ ރައްޔިތުންނަށް އިލްތިމާސް ކުރައްވައިފިއެވެ. އަދި މި ބަރަކާތްތެރި ރޭ ތަކުގެ ހެޔޮ ދަރުމައާއި ސަަވާބު އަޅަމެން އެންމެނަށް ލައްވާ ލައިލަތުލް ޤަދްރީގެ މަތިވެރި ނިޢުމަތް ދެއްވެން އެދި ދުޢާ ކުރައްވާފައިވެއެވެ.
ބަރަކާތްތެރި ރަމަޟާން މަހުގެ ފަހު ދިހައިގެ ދުވަސްތައް މިއަދު ފެށިފައިވާއިރު ރަމަޟާން މަހުގެ އެންމެ ބަރަކާތްތެރި ރެއަކީ ލައިލަތުލް ޤަދްރި ވިލޭރެއެވެ. އެ ރެއަކީ ސީދާ ކަނޑައެޅިގެން ކޮން ރެއެއް ކަމެއް އުންމަތަށް އަންގަވައި ދެއްވާފައެއް ނުވެއެވެ. އެހެން ނަަމަވެސް އެ ރޭ ހިމެނެނީ ފަހު ދިހައިގެ އޮނަހިރި ރޭތަކުގެ ތެރެއިން ރެއެއްގައި ކަމަށް މާތް ނަބިއްޔާ ހަދީޘް ކުރައްވާފައިވެ އެވެ.
އަޅުކަމުގައި ގިނަ ވަގުތު ހޭދަކުރުމުގެ ފުރުސަތު އެންމެންނަށް ތަނަވަސްކޮށް ދެއްވުމުގެ ބޭނުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފަހު ދިހައިގެ ދުވަސްތައް އެއީ ސަރުކާރު ބަންދު ދުވަސްތަކެއް ކަމުގައި ކަނޑައަޅުއްވާފައެވެ.
