ކޮންޓްރޯލަރ ޖެނެރަލް އޮފް އިމިގްރޭޝަންގެ މަޤާމުގައި ހުންނެވި މުޙައްމަދު ޝައްމާން ވަހީދު އެ މަޤާމުން ވަކިކޮށްފި އެވެ.
ޝަމްއާން މަޤާމުން ވަކިކުރައްވަން ރައީސް ޑރ. މުހައްމަދު މުއިއްޒު ނިންމެވީ ބުރާސްފަތި ދުވަހުގެ ރޭގެ ވަގުތެއްގައެވެ. ޝަމްއާން މަޤާމުން ވަކިކުރި ސަބަބެއް ހާމަކޮށްފައި ނުވާއިރު އޭނާ މަޤާމުން ވަކިކުރެއްވިކަން ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދުވަނީ ބައެއް މީޑިއާތަކަށް ޔަޤީންކޮށްދެއްވާފައެވެ.
ޝަމްއާނު މަޤާމުން ވަކިކުރެއްވި ވަކި ސަބަބެއް މިހާތަނަށް ސަރުކާރުން ހާމަނުކުރައްވައެވެ. ނަމަވެސް އޭނާ މަޤާމުން ވަކިކުރައްވާފައިވާ މިވަގުތަކީ އިމިގްރޭޝަނުގެ ބައެއް މުވައްޒަފުން މަޤާމުގެ ނުފޫޒު ނަހަމަ ގޮތުގައި ބޭނުންކޮށްގެން ބިދޭސީ މަސައްކަތްތެރިންގެ އަތުން ނާޖައިޒު މަންފާ ހޯދަމުންދާ މައްސަލައެއް ފެންމަތިވެފައިވާ ދަނޑިވަޅެއްގައެވެ.
ފުލުހުން މީޑިޔާއަށް މައުލޫމާތުދެއްވި ގޮތުގައި އެ ހިދުމަތުން އަންނަނީ އެ މައްސަލަ ތަހުޤީގުކުރަމުންނެވެ. އަދި އެ މައްސަލާގައި މިހާތަނަށް 3 މީހަކު ހައްޔަރުކޮށްފައިވާ ކަމަށްވެސް ފުލުހުން މައުލޫމާތުދެއްވައެެވެ.
19 ނޮވެމްބަރ 2023 ގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކޮންޓްރޯލާ ޖެނެރަލް އޮފް އިމިގްރޭޝަނުގެ މަޤާމަށް ޢައްޔަންކުރެއްވި ޝަމްޢާން ވަހީދު ވަނީ އިމިގްރޭޝަނުގައި 14 ވަރަކަށް އަހަރު މަސައްކަތްކުރަށްވާފައެވެ.
އިމިގްރޭޝަން ކޮންޓްރޯލަރގެ މަގާމުން ޝައްމާނު ވަކިކޮށްފައި ވާއިރު އޮޕަރޭޝަން ކުރަނގީގެ ނަމުގައި 2 މެއި 2024 ގައި ބިދޭސީންގެ މަޢުލޫމާތު އެއްކުރުމަށް ފެށި މަސައްކަތަށް މިހާރު 10 މަސް ވެފައިވާކަންފާހަގަކުރެވެއެވެ.
އަދި އެ އޮޕަރޭޝަންގެ ދަށުން ލައްކައަކަށްވުރެ ގިނަ ބިދޭސީންގެ މަޢުލޫމާތު އެއްކޮށްފައެވެ. އިމިގްރޭޝަނުން ދަނީ ޤަވާއިދާ ޚިލާފަށް ރާއްޖޭގައި ޙަރަކާތްތެރިވާ ބިދޭސީން އަތުލައިގަނެ ޑީޕޯޓް ކުރުމުގެ މަސައްކަތް ވަރަށް ފުޅާ ދާއިރާއެއްގައި ކުރަމުންކަން ފާހަގަކޮށްލެވެއެވެ.
