އެހެން ދާއިރާތަކެކޭ އެއްފަދައިން މަސްވެރިންނަށް ވެސް ރޯދަ އިނާޔަތް ދޭން ބޭނުންވާކަމަށް އަދި އެކަން ހަމަޖައްސަވާނެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިކަން ހާމަކޮށްފައިވަނީ، ދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މީދޫ ރައްޔިތުންނާއި ބައްދަލު ކުރައްވާ ވާހަކަފުޅުދައްކަވަމުންނެވެ. ރައީސްގެ ވާހަކަފުޅުގައި ކުރިއަށް އޮތް ދުވަސްތަކުގައި އެހެން ފަންނުތަކުގެ ބޭފުޅުންނަށް، މިސާލަކަށް ގާނޫނީ ގޮތުން ކަންކަން ފަހިކޮށްގެން ކުރިއަށް އޮތްތަނުގައި މަސްވެރިންނަށްވެސް ރޯދަ އިނާޔަތް ހަމަޖައްސަން ބޭނުންފުޅުވާ ކަމަށްވިދާޅުވިއެވެ.
”ގާނޫނީ ގޮތުން ކަންކަން ފަހިކޮށްގެން، ކުރިއަށް އޮތްތަނުގައި މަސްވެރިންނަށްވެސް އަޅުގަނޑުމެން އިރާދަކުރެއްވިއްޔާ ބޭނުންވަނީ ރޯދަ އިނާޔަތް ލިބޭ ގޮތް ހަދަން، ހަމަ އެގޮތަށް ދެން ހުރި ފަންނުތަކުގެ ބޭފުޅުންނަށްވެސް، އެކަން ކުރުމަށް އެބަ އޮތް ބައިވަރު މަރުހަލާތައްވެސް،“. ރައީސް ޑރ. މުހައްމަދު މުޢިއްޒު.
މިގޮތުން އެންމެ ފުރަތަމަ ފިޔަވަޅެއްގެ ގޮތުން ރައީސް ފާހަގަކުރެއްވީ މަސްވެރިންގެ ދަފްތަރުގެ ވާހަކައެވެ. މަސްވެރިންނަކީ ”ކޮންޓިނުއަސް ރެގިއުލާ އިންކަމެއް“ ލިބޭ ބައެއްކަން ބޭންކް ނިޒާމެއް މީގެ ކުރިން ނުދަންނަ ކަމަށް ރައީސް ވިދާޅުވިއެވެ.
”އެހެންވީމަ އަޅުގަނޑުމެން ގާނޫނީ ގޮތުން ބަލައިގަންނަ ދަފްތަރެއް މި އުފެއްދީ، އެކަމުގެ އުސޫލު ގެޒެޓްކޮށްގެން، އެ ދަފްތަރުގައި ޖެހޭ ފަރާތްތަކަށް ކުރިއަށް އޮތްތަނުގައި ބޭންކިންގ ނިޒާމްގެ ތެރެއިން ލޯނު ނެގުމާއި، އެސްޓީއޯގެ ސްކީމްގެ ތެރެއިން އެހީތެރިކަން ހޯދުން ފަދަ ކަންކަން ފަހިވެގެން ދާނެ މި އަހަރު ތެރޭގައި، ކުރިއަށް އޮތް ދުވަސްތަކުގައި މަރުހަލާތަކުގެ ތެރެއިން ގޮސް، އަޅުގަނޑު އުއްމީދު ކުރަނީ، ދެެކެން ބޭނުންވަނީ މާލަސްތަކެއް ނުވެ، ހަމަ ރޯދަ އިނާޔަތް ވެސް ލިބޭ ބަޔަކަށް އަޅުގަނޑުމެންނަށް ހަމަޖެއްސޭނެ ކަމަށް،“. ރައީސް ވިދާޅުވިއެވެ.
