އަހަރަކަށް ވުރެ ގިނަ ދުވަހަށް ދިގު ދެމިގެން ދިޔަ ފަލަސްތީނުގެ ޣައްޒާގެ ހަނގުރާމައިން ޣައްޒާގެ މުސްލިމު ރައްޔިތުންނަށް ލިބުނު ނަޞްރަކީ އެނަޞްރުގައި ދިވެހި ލޮބުވެތި އަޚުންނާއި އުޚުތުން ބައިވެރިވާ ނަޞްރެއް ކަމުގައި މިއަދުގެ ހުކުރު ނަމާދުގެ ޚުޠުބާގައި ވިދާޅުވެއްޖެއެވެ. މިއަދު ރާއްޖޭގެ މިސްކިތްތަކުގައި ކުރި ހުކުރު ނަމާދުގެ ޚުޠުބާގައި ޣައްޒާގެ ރައްޔިތުންނަށް ލިބުނު ނަޞްރަކީ މަތިވެރި ނަޞްރެއް ކަމަށް ފާހަގަ ކުރައްވަމުން ވިދާޅުވީ “ ފަލަސްތީނުގެ ރައްޔިތުންނާ ދެކޮޅަށް ޞަޙްޔޫނީ ނިޒާމުން ހިންގި އުދުވާނާ ގުޅިގެން ރާއްޖެއިންވެސް ވަނީ އިސްލާމީ އުޚުއްވަތްތެރިކަން ދައްކައި ގިނަ ގުނަ މަސައްކަތްތަކެއް ކޮށްފައި އެވެ. މިރާއްޖޭގެ ރާއްޔިތުން ވަނީ ޣައްޒާގެ އަޚުންނާއި އުޚުތުންނާ ބައިވެރިވުމުގެ ގޮތުން މުދަލުން ހޭދަކޮށްފައެވެ. އަދި ދިވެހި ރާއްޖެއިން ވަނީ ބައިނަލްއަޤްވާމީ މުޖުތަމަޢުގައި ޣައްޒާގެ ރައްޔިތުންގެ ދިފާޢުގައި އަޑު އުފުލާފައެވެ.“ ހުކުރު ޚުތުބާގައި ވިދާޅުވީ ނަސްލު ނައްތާލުމަށްޓަކައި ހިންގި ހަނގުރާމައިން ޣައްޒާގެ މުސްލިމުންނަށް ލިބުނު ނަޞްރުގެ ފަހަތުގައި ވަނީ އީމާންކަމާއި ހިތްވަރާއި ކެތްތެރިކަމާއި އުޚުތްވަތްތެރިކަމާއި ނުގުޑާފަދަ ޢަޒުމެއްގައި ބަދަހި ކަމާއި އެކު ތިބެ ﷲއަށް ވަކީލް ކުރުން ކަމަށެވެ. މިހަނގުރާމައިގައި ގާތްގަޑަކަށް ފަންސާސްހާސް މީހުން ޝަހީދުވެފައި ވާއިރު ކުޑަކުދިންނާއި މުސްކުޅިންނާއި އިލްމުވެރިންނާއި މިނިވަންކަމަށް ޓަކައި މަސައްކަތްކުރަމުން ދިޔަ އެތައް ލީޑަރުންނެއް ހިމެނޭ ކަމަށް ޚުތުބާގައި ފާހަގަ ކޮށްފައި ވެއެވެ. އަދި ހަނގުރާމަތަކުގައި ނަޞްރުލިބެނީ ލަސްކަރުގެ އަދަދު ގިނަކަމާއި ހަތިޔާރުގެ މޮޅު ކަމުގެ މައްޗަށް ނޫން ކަމަށާއި، ނަސްރުލިބެނީ އީމާން ކަމާއި ކެތްތެރި ކަމުގެ މަތީން ކަމަށްވެސް ފާހަގަ ކޮށްފައި ވެއެވެ.
ޣައްޒާގައި ހިނގި ހަނގުރާމައިން އެތައް ޢިބުރަތްތަކެއްވެސް ލިބިގެން ދިޔަކަން ހުޠުބާގައި ވިދާޅުވެ، ހަނގުރާމައިގެ ޙާލަތުގައި ވެސް މުސްލިމުން އަމަލު ކުރީ ރިވެތި އަޚުލާޤު ކަމާއި، އަނިޔާވެރި ވުމެއް ނެތި ކަން ފާހަގަ ކުރެއްވިއެވެ. ހަނގުރާމައިގެ ޙާލަތުގައިވެސް ކުޑަކުދީންނާއި މުސްކުޅިންނާއި އަންހެނުން ޤަތުލު ކުރުމާއި، ގަސްގަހާ ގެހި ހަލާކު ކުރުމާއި ޖަނަވާރުން މެރުން މުސްލިމުންނަށް މަނާ ކުރައްވާފައިވާ ކަމަށް ޚުތުބާގައި ވިދާޅުވިއެވެ. މިފަދަ އެތައް ކަމަކުން މިހަނގުރާމައިގައި ޣައްޒާގެ މުސްލިމުން ވަނީ ނަމޫނާ ދައްކާފައި ކަމަށް ފާހަގަ ކުރައްވާފައި ވެއެވެ.
ފަލަސްތީނާއި ބައިތުލްމަޤްދިޞާ މަސްޖިދުލް އަޤްޞާގެ ވާހަކަ ދެކެވޭ އިރު މުސްލިމުންގެ ހަދާނަށް އަންނާނީ ކީރިތި މާތް ނަބިއްޔާގެ އިސްރާ އާއި މިޢުރާޖްގެ ދަތުރުފުޅު މަތީން ކަމަށާއި މިއީ ކީރިތި މާތް ރަސޫލާގެ ނުބުއްވަތުގެ ތެދުކަން ކަށަވަރު ކުރެއްވުމަށާއި މާތް ރަސޫލާގެ ހިތްޕުޅަށް ސާބިތުކަން ދެއްވުމަށްޓަކައި މާތްﷲ އިތުރު އެކަލޭގެފާނަށް ދެއްވި ވަރަށް މަތިވެރި މުއުޖިޒާތެއްކަން ހުތުބާގައި ފާހަގަ ކުރައްވާފައިވެއެވެ.
މައްކާ އާއި ބައިތުލްމަޤްދިސްއަކީ ގުޅި ލާމެހިފައިވާ ތައުޙީދުގެ ރިސާލަތުގެ ދެދަންމަރު ކަމަށް ޚުޠުބާގައި ވިދާޅުވިއެވެ. އަދި މަސްޖިދުލްއަޤްޞާ ސަޙްޔޫނީ އިސްތިޢުމާރުގެ ދަށަށް ދިޔަކަމީ މިއުއްމަތަށް ދިމާވެފައިވާ އެންމެ ބޮޑު ހިތާމަކަމަށާއި، އެމިސްކިތް މިނިވަން ކުރުމަށްޓަކައި މަސައްކަތް ކުރުމަކީ މުޅި އިސްލާމީ އުއްމަތުގެ މައްޗަށް އޮތް ދީނީ ވާޖިބެއް ކަމަށް މިއަދުގެ ހުކުރު ނަމާދުގެ ޚުޠުބާގައި “ ޣައްޒާގެ ރައްޔިތުންގެ ކާމިޔާބީ“ ފާހަގަ ކުރައްވަމުން ވިދާޅު ވެފައި ވެއެވެ.
