މޫސުން ގޯސްވާނެކަމަށް ލަފާކޮށް، އުތުރުގެ އަތޮޅުތަކަށް ހުދު ސަމާލު ނެރެފިއެވެ.
މޫސުމާ ބެހޭ ޤައުމީ އިދާރާއިން މި ސަމާލު ނެރެފައިވަނީ ބުރާސްފަތި ދުވަހުގެ ރޭ 21:00 އިން ދަންވަރު 03:00 އަށް، އުތުރުގެ ހުރިހާ އަތޮޅަކަށެވެ.
މެޓް އޮފީހުން ވިދާޅުވެފައިވަނީ އުތުރުގެ އަތޮޅުތަކަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށެވެ. އަދި، ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކުރެވޭކަމަށް ވެސް ވިދާޅުވެފައިވެއެވެ.
މީގެ އިތުރުން ވެސް، މޫސުމާ ބެހޭ ޤައުމީ އިދާރާއިން މާދަމާގެ ހެނދުނާ ހަމައަށް ނެރެފައިވާ މޫސުމާ ބެހޭ މައުލޫމާތުގައި ވިދާޅުވެފައިވަނީ ހެނދުނު 6.00 ހަމައަށް ރާއްޖޭގެ އެހެން ސަރަހައްދުތަކަށް ވެސް ވިއްސާރަކުރުން އެކަށީގެންވާކަމުގައެވެ. އަދި، ކަނޑުތައް ވެސް ގަދަވާނެކަމަށާއި، ވިލާގަނޑުގައި އިތުރަށް ގަދަވާނެކަމަށް ވެސް ވިދާޅުވެފައިވެއެވެ.
އިރުވައި މޫސުން މިޖެނުއަރީ މަހު 2ވަނަ ދުވަހު ފެށިފައިވާ ކަމަށް މެޓް އިން ކުރިން އިއުލާންކޮށްފައި ވީނަމަވެސް މި ދުވަސްވަރަކީ އަނެއްކާ ވެސް ރާއްޖެއަށް ވިއްސާރަ ދުވަސްވަރެކެވެ. މިދުވަސް ވަރު ދަތުރު ފަތުރު ކުރައްވާ ފަރާތްތަކުން މޫސުމާ ބެހޭ އެންމެ ފަހުގެ މައުލޫމާތު ހޯއްދަވައިގެން ދަތުރު ފަތުރު ކުރެއްވުމަށް ކަމާ ބެހޭ އިދާރާތަކުން އަބަދުވެސް އިލްތިމާސް ކުރައްވަމުން ގެންދަވައެވެ.
