ރައިސުލްޖުމްހޫރިއްޔާ ޑރ. މުހައްމަދު މުޢިއްޒު ވަޒީރުންގެ މަޖިލީހަށް ގެންނެވި ބަދަލުތަކުގެ ދަށުން އަލަށް މަޤާމުތަކަށް އައްޔަނުކުރެވުނު ހަތަރު ވަޒީރުންނަށް ރުހުން ދިނުމަށް ރައްޔިތުންގެ މަޖިލީހުން ފާސްކޮށްފި އެވެ.
އެ މައްސަލަ ދިރާސާކުރި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ނިންމުމާ އެއްގޮތަށް އެ ހަތަރު ބޭފުޅުންނަށް ރުހުން ދިނުމަށް ފާސްކުރީ ދައުރުން ބޭރުން މިއަދު ބޭއްވި ރައްޔިތުންގެ މަޖިލީހުގެ ޖަލްސާގަ އެވެ.
މިދިޔަ ޑިސެމްބަރު މަހު އަލަށް މަޤާމުތަކަށް އައްޔަނުކުރެވުނު ބޭފުޅުންނާއި މަޖިލީހުން ދެއްވި ވޯޓު:
- މިނިސްޓަރ އޮފް ފިނޭންސް އެންޑް ޕްލޭނިން: މޫސާ ޒަމީރު (ތ. ބުރުނި، ނިވައިދޮށުގެ) ރުހުން ދިނުމަށް ފެންނަ ކަމަށް 69 މެމްބަރުން ވޯޓު ދެއްވި.
- މިނިސްޓަރ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް: ޑރ. އަލީ ހައިދަރު އަހްމަދު (މއ. ވެނީލާގެ) ރުހުން ދިނުމަށް ފެންނަ ކަމަށް 63 މެމްބަރުން ވޯޓު ދެއްވިއިރު، ރުހުން ދިނުމާ ދެކޮޅަށް 6 މެމްބަރުން ވޯޓު ދެއްވި.
- މިނިސްޓަރ އޮފް އެގްރިކަލްޗާ އެންޑް އެނިމަލް ވެލްފެއާ: ޑރ. މަރްޔަމް މާރިޔާ (މއ. މާރާދަގެ) ރުހުން ދިނުމަަށް ފެންނަ ކަމަށް 70 މެމްބަރުން ވޯޓު ދެއްވި.
- މިނިސްޓަރ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ: ޑރ. އަބްދުﷲ މުއްތަލިބު (ގދ. ފިޔޯރީ، ގުލްބަކާގެ) ރުހުން ދިނުމަށް ފެންނަ ކަމަށް 70 މެމްބަރުން ވޯޓު ދެއްވި.
މި ބަދަލުތަކާ އެކު، ކުރިން ބޯހިޔާވަހިކަމާއި ޕްލޭނިންގެ މެންޑޭޓު އޮތް މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ވަނީ އުވާލައްވައިފައެވެ. ޕްލޭނިންގެ މެންޑޭޓު ފިނޭންސް މިނިސްޓްރީގެ ދަށަށް ބަދަލުކުރައްވާފައިވާއިރު ބޯހިޔާވަހިކަމުގެ މެންޑޭޓު މިހާރު އޮންނަނީ ކޮންސްޓްރަކްޝަން މިނިސްޓްރީއަށެވެ.
މިއީ ރައީސް މުޢިއްޒުގެ ވެރިކަމުގައި ވަޒީރުންގެ މަޖިލީހަށް ގެންނެވި ދެވަނަ ބޮޑު ބަދަލެވެ. ފުރަތަމަ ބަދަލުގައި ހިމެނުނީ މޫސާ ޒަމީރު ޚާރިޖީ ވަޒީރުކަމުން ފިނޭންސް ވަޒީރުކަމަށް ބަދަލުކުރެއްވުމާއި، ޑރ. ޢަބްދުﷲ ޚަލީލް ޞިއްޙީ ވަޒީރުކަމުން ޚާރިޖީ ވަޒީރުކަމަށް ބަދަލުކުރެއްވުމެވެ. އަދި ޢަބްދުﷲ ނާޡިމް އިބްރާހީމް ޞިއްޙީ ވަޒީރުކަމަށް އައްޔަނުކުރެއްވުމެވެ.
