ނ.ހޮޅުދޫގެ ބައެއްގެ ގޮތުގައި ހަމަ ޖައްސާފައިވާ ހޮޅުމީދޫ ކުރިއަށް އޮތް ދެމަހެއްގެ ތެރޭގައި ގެސްޓް ހައުސް އަޅަން ބިންދޫ ކުރާނެ ކަމަށް ހޮޅުދޫ ކައުންސިލްގެ ރައީސް ރިޟްވާން މުހަންމަދު ވިދާޅުވެއްޖެއެވެ. ހޮޅުދޫ ކައުންސިލް ރައީސް ރިޟްވާން މުހަންމަދު އެން ޓީވީ ގެނެސްދޭ ”ޚަބަރު އަށި“ ޕްރޮގްރާމްގައި ވާހަކަ ދައްކަވަމުން ވިދާޅުވީ ހޮޅުދޫ އަކީ ބިމުގެ ދަތިކަން ވަރަށް ބޮޑަށް އިޙްސާސް ކުރަމުން ދާ ރަށެއް ކަމަށާއި، ވޭތުވެ ދިޔަ އަހަރުގެ ފަހުކޮޅު ހޮޅުމިދޫގެ ލޭންޑް ޔޫސް ޕްލޭން ފާސްވެފައި ވާތީ މިއަހަރު ހޮޅުމީދުން ދިރިއުޅުމަށް ގޯތި ދޫކުރަން ފެށޭނެ ކަމަށެވެ. “ ހޮޅުމީދޫގެ ލޭންޑް ޔޫސް ޕްލޭން މިހާރުވަނީ ނިންމާލެވިފައި. މިއީ އަޅުގަނޑުމެން ވަރަށް ކުރީއްސުރެ ދެކެމުން ދިޔަ ހުވަފެނެއް. ހުވަފެނުގައި ކުލަ ޖެހުމުގެ މަރުހަލާ އިރާދަ ކުރެއްވި މިއަންނަނީ. އެހެންވީމަ އަޅުގަނޑު މިފާހަގަ ކޮށްލަން ބޭނުންވަނީ،2025ވަނަ އަހަރަކީ، ހޮޅުދޫގައި ތޮއްޖެހިފައިވާ މި މާހައުލު، ވަރަށް ރަގަޅަށް ޕްލޭން ކުރެވިގެން ހޮޅުމީދޫގެ ބޯހިޔާވަހި ކަމުގެ ތެރެއަށް ހޮޅުދޫގެ ބޯހިޔާވަހިކަމަށް ރަގަޅު ހައްލެއް ލިބުން. “ ހޮޅުދޫ ކައުންސިލްގެ ރައީސް ވިދާޅުވިއެވެ. ނ.ހޮޅުދޫ ކައުންސިލްގެ ރައީސް ރިޟްވާން ވިދާޅުވީ ގެސްޓްހައުސް ވިޔަފާރި ކުރުމަށް ބޭނުންވާ ފަރާތްތަކަށް އުފާވެރި ޚަބަރެއްގެ ގޮތުގައި ، ކުރިއަށް އޮތް ދެމަސް ތެރޭގައި ލޭންޑް ޔޫސް ޕްލޭންގައި ހަމަ ޖެހިފައިވާ ގޮތުގެ މަތީން ގެސްޓް ހައުސްއެޅުމަށް ހޮޅުމީދޫން ބިން ދޫކުރަން ފަށާނެ ކަމަށެވެ.
ހޮޅުދޫ އަކީ 2000 މީހުންނަށް ވުރެ ގިނަ މީހުންގެ އާބާދީއެއް އޮތް ބިމުގެ ދަތިކަން ވަރަށް ބޮޑު ރަށެކެވެ. ރަށުން ގޯތި ދޭނެ އެއްވެސް ބިމެއް ރަށުގައި ނެތްކަން ފާހަގަ ކުރައްވައެވެ. މިކަން ހައްލު ހުރުމަށްޓަކައި ހޮޅުދޫއާއި ޖެހިގެން އޮންނަ މީދޫ އަކީ ހޮޅުދޫގެ ބައެއްގެ ގޮތުގައި ސަރުކާރުން ހަމަ ޖައްސާ ދެއްވާފައި އޮންނަތާ އަހަރު ތަކެއް ވެއްޖެއެވެ.
