ހުޅުމާލޭ ދެވަނަ ފިޔަވަހި ރީތިގަސްމަގު ބްރިޖް ކައިރީ ހުރި ސްޓްލްކޯގެ ޓްރާންސްފޯމަރ އަކަށް ގެއްލުންދީ ވައްކަންކުރަން އުޅުނު މީހާ ހައްޔަރުކޮށްފިއެވެ.. ފުލުހުން މިކަން އާއްމުކޮށްފައިވަނީ މީޑިއާއަށް ފޮނުވި މެސެޖެއްގައެވެ.
ފުލުހުން މައުލޫމާތު ދެއްވިގޮތުގައި މިމައްސަލައިގައި ހައްޔަރުކޮށްފައިވަނީ ށ. ބިލެއްފަހި , ޗަނބޭލީގޭ އިބްރާހިމް ޒާލިފް ( 37އ ) އެވެ. ޒާލިފް ހައްޔަރުކޮށްފައިވަނީ ޓްރާންސްފޯމަރ އަކަށް ގެއްލުންދީ ވައްކަންކުރަން އުޅެނިކޮށް ސްޓެލްކޯގެ މުވައްޒަފުން ޒާލިފް ހުއްޓުވުމުން މުވައްޒަފަކަށް ހަމަލާދީ މާރާމާރީ ހިންގާފައިވާ މައްސަލައަކާއި ގުޅިގެންނެވެ.
ޒާލިފްވަނީ އަންގާރަ ދުވަހުގެރޭ 21:43 އެހާކަންހާއިރު ފުލުހުންގެ ބެލުމުގެ ދަށަށް ގެންގޮސްފަކަމަށްވެސް ފުލުހުން މައުލޫމާތުދެއްވައެވެ.
އަދި ފުލުހުންގެންދަނީ މިމައްސަލަ ތަހުޤީޤު ކުރަމުންކަމަށްވެސް ފުލުހުން މީޑިއާއަށް ފޮނުވި މެސެޖުގައި ވިދާޅުވެފަވެއެވެ.
އިއްޔެ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ، ހުޅުމާލޭގެ ޓްރާންސްފޯމަރަކަށް ގެއްލުންދީ އޭގެން ވައްކަން ކުރަން އުޅުނު މީހާ ކުންފުނީގެ މުވައްޒަފުންނިކުމެ އަތުލައިގަނެފައިވާކަމަށެވެ.
ފަހުމީ ވިދާޅުވިގޮތުގައި މި މީހާ ވަނީ އެތަނަށް އެޓެންޑްވި މުވައްޒަފުގެ ގައިގައި ރެންޗަކުން ޖަހާ މާރާމާރީ ހިންގާފައެވެ.
ސްޓެލްކޯގެ ސަބްސްޓޭޝަންތަކުގެ ތަޅުތައް ހަލާކޮށް، އެތަންތަނަށް ވަދެ ޓްރާންސްފޯމަރުތައް ނިއްވާލައި، އެ ޓްރާންސްފޯމަރުތަކުގެ އެކި ބައިތައް ވަގަށް ނަގަމުންދާ މައްސަލަ މީގެ ކުރިންވެސް ފެންމަތިވެފައިވާކަން ފާހަގަކޮށްލެވެއެވެ.
ފަހުމީ މީގެ ކުރިން ވަނީ ޓްރާންސްފޯމަރުތައް ވައްކަން ކުރަމުންގެންދާ ފަރާތްތައް ހުއްޓުވައި އެފަރާތްތަކަށް ފިޔަވަޅު އަޅައިދީ، އަދި ވަގަށް ނަގައިގެން ވިއްކާ މިފަދަ ތަކެތި ގަންނަ ފަރާތްތަކަށް ވެސް ފިޔަވަޅުއަޅައިދިނުމަށް ކަމާއި ބެހޭ ފަރާތްތަކަށް އިލްތިމާސް ކުރައްވާފައެވެ.
ހުޅުމާލޭގެ ދެވަނަ ފިޔަވަހީގެ ޓްރާންސްފޯމަރަކަށް ގެއްލުންދީ ވައްކަން ކުރަން އުޅުމުން ބައެއް ޓަވަރުތަކުން އިއްޔެވަނީ ކަރަންޓުވެސް ކެނޑިފަކަންފާހަގަކޮށްލެވެއެވެ.
މީގެ އިތުރުން ޓްރާންސްފޯމަރަށް ގެއްލުންދިނުމާއި ގުޅިގެން ހުޅުމާލޭ ދެވަނަ ފިޔަވަހީގެ އެމްޕީއެލް ޓަވަރުތަކުން ކަރަންޓުގެ ހިދުމަތް މެދުކެނޑިފައިވާ ކަމަށް ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވަނީ ވިދާޅުވެފައެވެ.
މީގެ ކުރިން ހުޅުމާލޭގެ ދެވަނަ ފިޔަވަހީގެ ހުރި ޓްރާންސްފޯމަރަކުން ވައްކަން ކުރަން އުޅުނު މީހަކު ކަރަންޓުގައި ޖެހިގެން ނިޔާވެސް ވެފައިވެއެވެ.
އަދި ހަމައެހެންމެ މީގެކުރިން ކަރަންޓު ކޭބަލްތައް ބުރިކޮށް ވިއްކާ މައްސަލަ ބޮޑުވެފައިވާކަން ފާހަގަކުރެވެއެވެ.
