ވެރިކަމަކީ މާތްﷲ ޙަވާލު ކުރައްވާފައި ވާ އަމާނާތެކެވެ. އެދުވަހަކު އިރާދަ ކުރައްވާ މީހަކަށް އެކަން ޙަވާލު ކުރައްވައެވެ. އަދި އިރާދަ ކުރެއްވުމުން ވަކި ކުރައްވައެވެ. މިހަޤީޤަތް ﷲތަޢާލާ އާލްއިމްރާން ސޫރަތުގެ 26ވަނަ އާޔަތުގައި ބަޔާން ކުރައްވާފައި ވެއެވެ. ވީމާ ވެރިކަން ލިބުމުން ބޮޑާވުމެއް ނެތެވެ. އަދި ވެރިކަން ނުލިބި އެކަމުގައި އުއްމީދުގައި ތިބި ބައަކު ވެރިކަން ނުލިބިގެން ދެރަވެ ހިތްދަތި ވުމުގެ ބޭނުމެއްވެސް ނެތެވެ. ކުރަންވީ ކަމަކީ ވެރިކަން ލިބިއްޖެ ނަމަ އަމާނަތްތެރި ވުމެވެ. ރައްޔިތުންގެ ހައްޤުތަކަށް ރައްކާތެރި ވުމެވެ.
ދިވެހި ރާއްޖޭގެ ޤާނޫނު އަސާސީގެ 4ވަނަ މާއްދާގައި ކަށަވަރުކޮށް ދެނީ ރައްޔިތުންގެ ކިބައިގާ އޮންނަ ބާރެވެ. ވެރިކަން ދަމަހައްޓަނީވެސް އަދި ދުރުކުރާނީ ވެސް ހަމަ ރައްޔިތުންނެވެ. މިހަޤީޤަތަކީ ދުނިޔޭގެ އެކިކަންކޮޅު ތަކުން ފެންނަމުން ދާ ހަޤީޤަތެކެވެ. އިއްޔެ ނުހަނު ލޯބިން ވެރިކަމަށް އިސްކުރި ވެރި މީހާ މިއަދު ނުވަތަ މާދަމާ އޭނާ އަކީ ރައްޔިތުން އެންމެ ނުރުހުންތެރިވާ މީހާއަށް ބަދަލުވެގެން ދެއެވެ. މިއަދު އޭނާ ވެރިކަމަށް އިސްކުރެވުނީތީ ރައްޔިތުން ދެރަވެ ހިތާމަ ކުރެއެވެ. މިހަޤީޤަތަކީ ދުނިޔޭގެ އެކި ކަންކޮޅުތަކުން ވެސް ފެންނަ މަންޒަރެކެވެ. އޮޅުދޫ ކަރައިން ފެށިގެން ބަނގުލަދޭޝް އިން ވެސް ފެނިގެން ދިޔައީ ހަމަ އެމަންޒަރެވެ. ވެރިކަމަށް އިސްކުރުމަށްފަހު ވެރިކަމުން ދުރު ކުރުމަށް އެކި ޤައުމު ތަކުން ގެންގުޅޭ ފޯމިއުލާ ތަފާތެވެ. ބައެއް ޤައުމު ތަކުން ވޯޓުފޮށިން އެކަން ނިންމާ އިރު ބޮޑެތި ހަމަ ނުޖެހުންތަކާއި ލޭ އޮރުވުންތަކާ ހިސާބަށް ގޮސް އަހުލީ ހަނގުރާމައަށް ބަދަލުވެ ގައުމުތައް ސުންނާފަތި ވެއެވެ. މިފަދަ ކަންކަމުން ވެރިމީހާ ވެރިކަމުން ދުރު ކުރެވުނު ނަމަވެސް ރައްޔިތުންނަށް ލިބިފައިވާ މާލީ ގެއްލުންތަކާއި އަނިޔާތަކުން ސަލާމަތް ވަނީ އެތައް ދުވަހަކުންނެވެ.
އިއްޔެ ނުހަނު ލޯތްބާއި އެކު އިސްކުރި ވެރި މީހާ އާއި މެދު މިއަދު ހިތްހަމަ ނުޖެހެން ދިމާވަނީ އެތަކެއް ސަބަބު ތަކުންނެވެ. ރައްޔިތު މީހާގެ އަސާސީ ބޭނުންތައް ނުފުދި ދިރިއުޅުމުގެ ޙާލަތު އެއްދުވަހުން އަނެއް ދުވަހަށް ދަށަށް ގޮސް ކޮރަޕްޝަނާ ފަސާދަ އާއްމު ވުމުން ރައްޔިތު މީހާގެ ހިތަށް ހަމަ ޖެހުމެއް ނުލިބެއެވެ. އަމިއްލަ މަސައްކަތް ކުރަމުން ދާ މީހުންގެ މަސައްކަތް ހުއްޓި ދިރިއުޅުން ހަލާކުވެ ދާން ފެށުމުން އެހިތްދަތި ކަމުގައި ލޯބި ނަފްރަތަށް ބަދަލް ވެއެވެ. އިއްޔެ ކުރި ފޮނި އުއްމީދުތަކަށް ކުލަ ޖެހެމުން ނުދާން ފެށުމުން ރައްޔިތުން މާޔޫސްވެއެވެ. އަމާންކަމާއި ރައްކާތެރި ކަމެއް ނެތި ދިރިއުޅުން ވޭތު ކުރަން ޖެހުމަކީ ރައްޔިތުންގެ ހިތުގައި އިހުގައި އޮތް ލޯބިއަށް ފަނޑުކަން އާދެއެވެ. ވިޔަފާރިތައް ފުނޑި ތަޅުއަޅުވާފައި ނުކުންނަން ޖެހޭ ހާލަތަށް ދިއުމުން ”ސޭޓް“ ގެ ހިތުގައިވެސް އޮންނަނީ ސިޔާސަތާ މެދު ނުރުހުން ވެފައެވެ. ހަމަ ކޮންމެ މީހަކަށް ލިބޭ އާމްދަނީ ދެކޮޅު ނުޖެހި އުޅެން ޖެހުމުގެ ސަބަބުން އަބަދުވެސް ހިތްހަމަ ނުޖެހެނީ ތިމާމެން ނުހަނު ލޯބިން އިސްކުރި ވެރި މީހާ ދެކެއެވެ. އިހު ލިބިފައި އޮތް ފަސޭހައާއި ލުއިތައް ބަދަލުވެ ޖީބަށް ވަންނަމުން ދިޔަ ފައިސާކޮޅު ނުލިބި ދިރިއުޅުން ބޭޣަރާރު ވާ ފެށުމުން ލޯއްބާއި ކުލުނު ނަފްރަތަށް ބަދަލުވެގެން ދާން ހިނދުކޮޅެއްވެސް ނުނަގައެވެ. ރައްޔިތު މީހާއަށް ލިބޭ ހިތްދަތި ކަމާއި ވޭނުގެ ސަބަބުން ޖަޒްބާތުގައި ޖެހޭ ކޮންމެ ފަހަރަކު އެޖަޒްބާތު ތަކުގައި އިތުރަށް ދިލަ ހޫނު އުފެދިގެން ދާން ފެށުމުން ދެންފެންނަނީ އެހެން މަންޒަރެކެވެ. ވައުދު ތަކާއި އަހުދުތަކު ސަބަބުން ރައްޔިތު މީހާގެ ހިތުގައި ލޯތްބެއް ނުއުފެދޭނެއެވެ. ކާވެނީގެ ކުރީން އުޑުން ތަރިތައް ބާލާ ހަނދު ގެނެސް ދޭނަމޭ ބުނެ ވީ އަހުދާ ވައުދުގައި ޖެހި ކާވެނި ކުރިނަމަވެސް ކާވެނީގެ ފަހުން އެފަދަ ވައުދުތައް ބަލައިގަންނަ ދަތިވެ ވަރިފަށަން އަރައެވެ. ކާވެންޏަށް ފަހު “ ކުލައެއް ވަހެއް ނެތް“ ވާހަކަ ތަކަކުން ނުފުދެއެވެ. އެފަދަ ވޭނީ ހިތްދަތި ކަމުގެ ސަބަބުން ފައިދާ ނަގަން ދަނޑިވަޅު ބަލަން ހުންނަ މީހާއަށް އެލިބެނީ ރަނުގެ ފުރުޞަތެކެވެ. ކުޅިބައި ރުކުރުވާލާއި ކުރިއަށް ކުޅެން ލިބޭ ފުރުޞަތެކެވެ.
ވީމާ ކޮންމެ ވެރިއަކުވެސް ވިސްނަންވާނެ ކަމަކީ ރައްޔިތުންގެ އުއްމީދުތަކަށް މާޔޫސްކަން ނުގެނައުމެވެ. ރައްޔިތު މީހާގެ ދިރިއުޅުން ވޭނަކަށް ވެދާނެ ކޮންމެ ކަމެއް ދުރުކޮށް ދިނުމެވެ. ހިތަށް ދަތިވެ ދާނެ ކޮންމެ ބަހަކާ އަމަލަކުން ދުރުވެ ހައްޤުތައް ރައްކާތެރި ކޮށްދިނުމެވެ. ހަމަ އެކަނި އުއްމީދީ ފޮނި ބަސްތަކަކުން ނުފުދޭނެއެވެ. މިއީ ކޮންމެ ނަމެއް ކިޔާ ކޮންމެ ވެރިއެއްގެވެސް ވިސްނަންވާނެ ކަމެއް ކަމަށް ދެކެމެވެ.
