މިހާރު މަދީ ކުރީގެ ރައީސް އަބްދުﷲ ޔާމީން އެމްޑީޕީގެ ޕޯޑިއަމްގައި ވާހަކަ ދެއްކެވުން އެކަނި ކަމަށް ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ޝުޖާއު މިހެން ވިދާޅުވެފައިމިވަނީ ޔާމީން ”ރާއްޖެޓީވީ“ އަށް އިންޓަވިއުއެއް ދެއްވުމާ ގުޅިގެންނެވެ.
އެކަމާ ގުޅިގެން ޝުޖާއު ވިދާޅުވީ ޔާމީން މިއަދު ހުންނެވީ ޤައުމަށްޓަކައި އެމަނިކުފާނު ޖަލުގައި ބަހައްޓަން ޖެހޭ ކަމަށް ބުނެ ތަފާތު ރިޕޯޓްތައް ގެނެސްދިން އެމްޑީޕީގެ ޓީވީގައި ކަމަށެވެ. އަދި މިހާރު މަދީ އެމްޑީޕީގެ ޕޯޑިއަމެއްގައި ޔާމީން ވާހަކަ ދެއްކެވުން އެކަނި ކަމަށް ޝުޖާއު ވިދާޅުވި އެވެ.
”ދެން މަދީ އެމްޑީޕީ ޕޯޑިއަމްގައި ދެއަތަށް ދެތިލަފަތް ލައިގެން ހުރެ ވާހަކަ ދެއްކެވުން އެކަނި. އޭރުން މާ ސަޅިވާނެ،“ ޝުޖާއު ވިދާޅުވި އެވެ.
ޔާމީން ގެންދަވަނީ ރައީސް ޑރ. މުހައްމަދު މުއިއްޒަށާއި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި އެ މަނިކުފާނު ވަނީ ޕީޕީއެމް ދޫކޮށްލައްވައި ޕީޕަލްސް ނެޝަނަލް ފްރޮންޓް (ފީއެންއެފް) ގެ ނަމުގައި ޕާޓީއެއް ވެސް އުފައްދަވާފަ އެވެ.
ޔާމީނާއި އެމަނިކުފާނަށް ތާއީދުކުރާ ފަރާތްތަކުން ސަރުކާރަށް ކިޔަމުންދާ ފާޑުކިޔުންތަކަށް، ސަރުކާރުގެ އެކި މަގާމުތަކުގައި ތިއްބެވި ރައީސް މުއިއްޒުއަށް ތާއީދުކުރައްވާ ފަރާތްތަކުން ދަނީ ރައްދު ދެމުންނެވެ.
