ޓެކްސްތައް ބޮޑުކުރަން ސަރުކާރުން ހުށަހެޅި ބިލުތައް ރައީސް ޑރ. މުޙައްމަދު މުއިއްޒު މިއަދު ތަސްދީގު ކުރައްވައިފިއެވެ.
އެގޮތުން، ރައީސް ތަސްދީގު ކުރައްވާފައި ވަނީ ރާއްޖެއަށް އަންނަ ފަސިންޖަރުންގެ އަތުން ނަގާ ފީ ބޮޑުކުރުމަށާއި ޓީޖީއެސްޓީ ބޮޑުކުރުމުގެ އިތުރުން ގްރީން ޓެކްސްގެ ގޮތުގައި ނަގާ މިންވަރު ދެ ގުނަ ކުރަން ހުށަހަޅާފައިވާ ގާނޫނުތަކަށް އިސްލާހު ގެންނަން ރައްޔިތުންގެ މަޖިލީހުން ފާސްކޮށްފައިވާ ބިލުތަކެވެ.
މި ބިލުތައް މަޖިލީހުން ފާސްކޮށްފައި ވަނީ މިދިޔަ ބުރާސްފަތި ދުވަހުއެވެ.
އެ އިސްލާހުތަކާ އެއްކޮށް އަންނަ އަހަރުގެ ޖުލައި މަހުން ފެށިގެން ޓީޖީއެސްޓީ 16 އިންސައްތައިން 17 އިންސައްތައަށް ބޮޑުވާނެއެވެ.
އޭގެއިތުރުން، ގްރީން ޓެކްސް ދެގުނައަށް ބޮޑުވާނެއެވެ. އެގޮތުން، 50 ކޮޓަރިއަށް ވުރެ ކޮޓަރި މަދު ގެސްޓްހައުސްތަކުން ގްރީން ޓެކުހުގެ ގޮތުގައި ނަގައި އަދަދު ތިން ޑޮލަރުން ހަ ޑޮލަރަށް ބޮޑުކުރާނެއެވެ. އަދި، އެއަށް ވުރެ ބޮޑެތި ގެސްޓްހައުސްތަކާއި ރިސޯޓުތަކުން ނަގައި ގްރީން ޓެކްސް ހަ ޑޮލަރުން 12 ޑޮލަރަށް ބޮޑުކުރާނެއެވެ.
ރާއްޖެއިން ފުރާ ފަސިންޖަރުން އަތުން ނަގައި ޓެކްސް ވެސް ބޮޑުކުރަން ފާސްކުރީ އަންނަ މަހުގެ އެއްވަނަ ދުވަހުން ފެށިގެނެވެ. އެގޮތުން، އަންނާނެ ބަދަލުތަކަކީ؛
- އިކޮނޮމީ ކުލާހުން ފުރާ ބިދޭސީންގެ އަތުން މިހާރު ނަގައި 30 ޑޮލަރު، 50 ޑޮލަރަށް ބޮޑުކުރުން
- ބިޒްނަސް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 60 ޑޮލަރު، 120 ޑޮލަރަށް ބޮޑުކުރުން
- ފަސްޓް ކުލާހުން ފުރާ ދިވެހިންނާއި ބިދޭސީންގެ އަތުން ނަގައި 90 ޑޮލަރު، 240 ޑޮލަރަށް ބޮޑުކުރުން.
- ޕްރައިވެޓް ޖެޓްގައި ފުރާ މީހުންގެ އަތުން ނަގައި 120 ޑޮލަރު، 480 ޑޮލަރަށް ބޮޑުކުރުން.
