ލޯކަލް ކައުންސިލު އިންތިޚާބަށް ކުރި ކެމްޕެއިން ތެރޭގައި އެމްޑީޕީގެ އިންތިޚާބުތަކުގައި އިދާރީ ޑެޕިއުޓީ ޗެއަރޕަރސަން އާއި މަތި ކޮށްފައިވާ ހުރިހާ ޒިންމާތައް އޭނާގެ އަތުން ނަގާފައި ވާކަމަށް އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަޙީދު (އިބުރޭ) ވިދާޅުވެއްޖެއެވެ.
އިދިކޮޅު އެމްޑީޕީގެ ޗެއާޕާސަންގެ އިންތިޚާބުގައި ވާދަކުރައްވާ ކުރީގެ ރައީސް މުޙައްމަދު ނަޝީދުގެ ކެމްޕެއިން ދަތުރުފުޅުތަކުގައި އިބުރޭ ބައިވެރިވެވަޑައިގަންނަވާތީ، އޭނާއަށް ފިޔަވަޅު އަޅައިދިނުމަށް ވާދަވެރި ކެންޑިޑޭޓު އަދި ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް މިދިޔަ އޭޕްރިލް މަހުގެ ފަހުކޮޅު ވަނީ އެދިވަޑައިގެންފައެވެ.
މިކަމާއި ގުޅިގެން އިބުރޭ ބުނެފައިވަނީ، އެމްޑީޕީގެ އަސާސީ ޤަވާއިދުގައި ކެމްޕެއިންކުރުމުގެ ހުރިހާ ކަމެއް [ޑީސީޕީ އިދާރީއާ] ހަވާލުކޮށްފައި އޮއްވައި، ލޯކަލް ކައުންސިލު އިންތިޚާބުގައި އޭނާ ބާކީކޮށް އެކަން ކުރިއަށް ގެންގޮއްސައި ވަނީ، ޕާލަމެންޓަރީ ގްރޫޕުގެ މެންބަރަކާ ހަވާލުކޮށްގެން ކަމަށެވެ.
އެމްޑީޕީގެ އަސާސީ ގަވައިދުގައިވާ ގޮތުން ޑެޕިއުޓީ ޗެއާޕާސަން އިދާރީގެ މަސްއޫލިއްޔަތުތަކުގެ ތެރޭގައި ހިމެނެނީ ޕާޓީގެ މެމްބާޝިޕްގެ ކަންކަން ބެލެހެއްޓުމާއި، ކެމްޕެއިންގެ ކަންކަން ޗެއާޕާސަންގެ ދަށުން އިންތިޒާމުކޮށް ހިންގައި، ބެލެހެއްޓުމުގެ ވާޖިބު އަދާކުރުމެވެ. އޭގެ ތެރޭގައި ކެމްޕެއިންތަކަށް ތައްޔާރުވުމަށްޓަކައި ކުރަންޖެހޭ ކަންކަން ކުރުމާއި މެމްބާޝިޕް އަދި ކެމްޕެއިން ކޮމިޓީގެ ރިޔާސަތު ބެލެހެއްޓުން ވެސް ހިމެނެއެވެ.
އޭގެ އިބުރޭ ވިދާޅުވީ، އިދާރީ މުވައްޒަފުންނަށް ކެމްޕެއިން ނުކުރެވޭނެ ކަމަށް އަސާސީ ގަވައިދުގައި ބަޔާންކޮށްފައި އެބައޮތް ކަމަށާއި އިންތިޚާބީ މަގާމުތަކުގައި ތިބޭ ފަރާތްތަކުން ކެމްޕެއިންތަކުގައި ބައިވެރިވުން އަސާސީ ގަވައިދުގައި މަނާ ނުކުރާ ކަމަށެވެ.
މިދިޔަ މަހުގެ 26ވަނަ ދުވަހު އެމްޑީޕީގެ ވަގުތީ ޗެއާޕާސަން ޢަބްދުލްޣަފޫރު މޫސާ (ގަޕޯ)އަށް މީކާއީލް ފޮނުއްވި ސިޓީއެއްގައި ވަނީ ނަޝީދުގެ ކެމްޕެއިންގައި އިބުރޭ އަމަލީ ގޮތުން ބައިވެރިވަޑައިގަންނަވާކަމުގެ ޝަކުވާ ލިބިވަޑައިގެންފައިވާ ކަމަށާއި ސޯޝަލް މީޑިއާއިން ފެންނަ ފޮޓޯއާއި ވީޑިއޯތަކުން އެކަން ކަށަވަރުވާ ކަމަށެވެ. މީކާއީލް ވަނީ ކެމްޕެއިންގެ މުއްދަތަށް އިބުރޭ މަގާމުގެ މަސްއޫލިއްޔަތުތަކާ ދުރުވުމަށް ގޮވާލައްވާފައެވެ.
