މި ސަރުކާރުން ވަކި ކުރި ކޮންމެ ވަޒީރަކީ މަސައްކަތަށް ފަރުވާ ކުޑަވެގެން ވަކި ކުރި ވަޒީރުން ނޫން ކަމަށާއި އޭގެ ތެރޭގައި ވަރަށް ހިދުމަތްތެރި ވަޒީރުން ތިއްބެވި ކަމަށް ރައީސް، ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ރައީސް ޑރ މުހައްމަދު މުއިއްޒު ވިދާޅުވީ، ސިޔާސީ މަގާމުތަކުގެ އަދަދު މަދުކޮށް، ސަރުކާރުގެ ޚަރަދު ކުޑަކުރުމުގެ މަސައްކަތް ކުރިއަށް އެބަ ދާ ކަމަށެވެ.
އެގޮތުން ވުޒާރާތައް މަދުކޮށް، ވަޒީރުންގެ ބައެއް ޒިންމާތައް އިތުރުކޮށް، ވަޒީރުން މަދު ކުރުމަކީ އެކަމުގެ ތެރޭގައި ހިމެނޭ ކަމެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ، ވަޒީރުންގެ ގޮތުގައި ތިއްބެވި ބޭފުޅުން ވަކި ކުރުމުގައި ވަޒީރުންގެ މަސައްތަކާއި އެހެން ކަންތައްތަކަށް އެމަނިކުފާނު ބެއްލެވި ކަމަށާއި އެމަނިކުފާނު ބޭނުންވީ ސަރުކާރުގެ ”ސައިޒު“ ކުޑަ ކުރުމަށް ކަމަށެވެ. އަދި ކޮންމެ ބޭފުޅަކު ވަކި ކުރީ މަސައްކަތް ދަށް ވެގެން ނޫން ކަމަށާއި ވަރަށް ރަނގަޅަށް މަސައްކަތް ކުރެއްވި ވަޒީރުން ތިއްބެވި ކަމަށް ރައީސް ފާހަގަ ކުރެއްވިއެވެ.
”ވަރަށް ހިދުމަތްތެރި، ރަނގަޅަށް މަސައްކަތް ކުރި. އެހެން ނަމަވެސް ސަރުކާރުގެ ސައިޒު ކުޑަކޮށް، ސަރުކާރު މަސައްކަތް ކުރަމުންދާ ގޮތް ބަދަލު ކުރުމަށް ނޫނީ މަސައްކަތް ކުރާ ސިސްޓަމް ބަދަލު ކުރުމަށްޓަކައި އަޅުގަނޑު ނިންމި ބަދަލުތަކެއް އެއީ. އެހެންމަ ކޮންމެ ކޮންމެ ބޭފުޅަކީއެއް މަސައްކަތަށް ފަރުވާ ކުޑަވެގެން ނޫނިއްޔާ މަސައްކަތް ނުކޮށްގެން ވަޒީފާއިން ވަކިކުރި ބޭފުޅުންނެއް ނޫން،.“ ރައީސް ވިދާޅުވިއެވެ.
މިމަހުގެ 14 ވަނަ ދުވަހު ކުއްލި ގޮތަކަށް 10 ވަޒީރުން މަގާމުން އިސްތިއުފާ ދެއްވިއެވެ. އަދި ފަހުން ބައެއް ވުޒާރާތައް އެއްކުރައްވައި،20 ވުޒާރާއިން 15 އަށް މަދުކުރައްވާފައެވެ.
