އައިކޮމް އިން މައުލޫމާތު ހޯދުމަށް ހުށަހެޅި ދެ އަޑުއެހުމަކަށް އިސްލާމިކް މިނސްޓްރީ އިން ހާޒިރުނުވުމުން އައިކޮމުން އެ މިނިސްޓްރީ 700ރުފިޔާ އިން ޖޫރިމަނާ ކޮށްފިއެވެ.
އެކަމާ ގުޅިގެން އިސްލާމިކް މިނިސްޓްރީ އިން ބުނެފައި ވަނީ އިސްލާމިކް މިނިސްޓްރީއަކީ މައުލޫމާތު ހާމަކުރުމަށް ނުހަނު ބޮޑު އިސްކަމެއްދޭ އަދި އެކަމާ ގުޅިގެން ހެދިފައިވާ އެންމެހައި ގާނޫނުތަކަށް އިހުތިރާމްކުރާ އިދާރާއެއް ކަމަށެވެ.
”މިހާތަނަށް ވެސް މިނިސްޓްރީއަށް ހުށަހެޅެމުންދާ އެންމެހައި ހުށަހެޅުންތަކަށް ގާނޫނުގައިވާ ގޮތުގެ މަތިން ޖަވާބުދެމުންދާ ވުޒާރާއެއް. މީޑިއާ އާ ނުހަނު ގާތްކަން ބާއްވާ ވުޒާރާއެއް. ވުޒާރާ ދެމި އޮންނާނީ އެގޮތުގަ.“ އިސްލާމިކް މިނިސްޓަރ ޑރ މުޙަންމަދު ޝަހީމް ޢަލީ ސަޢީދު ވިދާޅުވިއެވެ.
އެކަމާ ގުޅިގެން އިސްލާމިކް މިނސިްޓްރީ އިން ވަނީ 2024 އަދި 2025 ވަނަ އަހަރު ހުށަހެޅުނު އާރުޓީއައިގެ ތަފްސީލް އާންމުކޮށްފައެވެ.
އެގޮތުން 2024 ވަނަ އަހަރު ހުށަހެޅުނު އާރުޓީއައިގެ ތަފްސީލް އަށް ބަލާއިރު މިނިސްޓްރީއަށް 60 އާރުޓީއައި ވަނީ ލިބިފައެވެ. އަދި 60 އާރުޓީއައި އަށް ވަނީ ޖަވާބު ދެވިފައެވެ. 2025 ވަނަ އަހަރު 41 އާރުޓީއައި ލިބިފައިވެއެވެ. ނަމަވެސް ޖަވާބު ދެވިފައި ވަނީ 33 އާރުޓީއައި އެވެ. އަދި ޖަވާބު ނުދެވި 8 އާރުޓީއައި އިން ކަމަށް އެ މިނސްޓްރީ އިން ވަނީ ހާމަ ކޮށްފައެވެ.
އެކަމުގެ ސަބަބެއް ކަަމަށް އިސްލާމިކް މިންޓްރީ އިން ވިދާޅުވެފައި ވަނީ އިންފޮމޭޝަން އޮފިސަރު ވަކިވުމާއި ގުޅިގެން ޖާވާބު ނުދެވިފައި ވާކަމަށެވެ. އަދި އެކަމަށް ހައްލު ހޯދުމުގެ މަސައްކަތް އިދާރީ ގޮތުން ކުރިއަށް ގެންދާ ކަމަށް ވެސް މިނިސްޓްރީ އިން ވަނީ ވިދާޅުވެފައެވެ.
