ނުހައްގު މުއްސަނދިކަން ހޯދި ކުރީގެ ވެރިންގެ މައްޗަށް ވެސް ދައުވާ ކުރެވޭ ގޮތަށް ގާނޫނުލްއުގޫބާތަށް އިސްލާހު ގެނައުމުގެ ބިލެއް ރައްޔިތުންގެ މަޖިލިހަށް ހުށަހަޅައިފިއެވެ.
ސަރުކާރުގެ ފަރާތުން މި ބިލް މަޖިލިހަށް ހުށަހެޅުއްވީ މާފުށި ދާއިރާގެ ޕީއެންސީގެ މެމްބަރު ހުސެއިން ރިޒާއެވެ.
މިދިޔަ ބުރާސްފަތި ދުވަހު ބިލްގެ ފުރަތަމަ ކިއުން އިއްވާފައިވާ އިރު، ބިލްގެ ބަހުސް މަޖިލިހުގެ ތަޅުމުގައި މިއަދު ވަނީ ފަށައިފައެވެ.
ދައުލަތުގެ އިދާރާތަކުގައި ހުރި ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކުރުމަށާއި ދައުވާކުރަން ހުރި ގޮންޖެހުންތައް ނައްތާލަން ގާނޫނަށް އިސްލާހު ގެންނަވާނެ ކަމަށް ރައީސް ޑރ. މުހައްމަދު މުއިއްޒު މިދިޔަ ހަފްތާގައި ވަނީ އިއުލާން ކުރައްވައިފައެވެ.
ރައީސް ވިދާޅުވި ގޮތުގައި އެ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާ އާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭ ގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަގާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެއެވެ.
ރިޒާ ވެސް ވިދާޅުވި ގޮތުގައި ގާނޫނުލް އުގޫބާތަށް އިސްލާހު ގެނައުމުގެ ބޭނުމަކީ ނުހައްގު މުއްސަނދިކަން ލިބިގަތުމުގެ ކުށް ކަނޑައަޅާފައި އޮތް ގޮތުން މާނަ ކުރުމުގައި އޮޅުން އަރާތީ އެ މާއްދާ އިސްލާހު ކުރުމަށް ގާނޫނަށް ގެންނަން ޖެހޭ އިސްލާހުތައް ގެނައުމެވެ. އެހެންވެ، އޭނާ ހުށަހެޅުއްވީ ގާނޫނުލްއުގޫބާތުގެ 515 ވަނަ މާއްދާ އިސްލާހު ކުރުމަށެވެ. އެއީ ނުހައްގު މުއްސަނދިކަން ހޯދައި ލިބިގަތުމުގެ ކުށް ބަޔާންކުރާ މާއްދާއެވެ.
އެ މާއްދާގެ (ހ)އަށް ހުށަހެޅުއްވި އިސްލާހުގައި ބުނެފައި ވަނީ، ދައުލަތުގެ މުވައްޒަފަކު ނުވަތަ ދައުލަތުގެ މަގާމެއް އަދާކޮށްފައިވާ މީހަކު ތިން ކަމެއް ކޮށްފި ނަމަ، އެ ކުރަނީ ކުށެއް ކަމަށެވެ. އެއް ކަމަކީ ދައުލަތުގެ މުވައްޒަފަކަށްވެ ހުރެ ލިބެމުންދާ ނުވަތަ ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިއިރު ލިބެމުންދިޔަ އާމްދަނީއާ ނުބައްދަލު ދިރިއުޅުމުގެ ފެންވަރެއް ގާއިމުކޮށްފައިވުން ނުވަތަ އެފަދަ އިން ގާއިމުކުރާ ދިރިއުޅުމުގެ ފެންވަރު ދެމެހެއްޓުމެވެ.
ދައުލަތުގެ މުވައްޒަފަކަށް ހުރިއިރު ލިބެމުންދިޔަ ނުވަތަ ދައުލަތުގެ މުވައްޒަފަކަށް ހުރެ ލިބެމުންދާ އާމްދަނީއާ ނުބައްދަލު މިންވަރަކަށް އޭނާގެ ނަމުގައި ނުވަތަ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައި މުދާ ނުވަތަ ފައިސާ ހޯދައި މިލްކު ކުރުމަކީ ވެސް ބިލްގައިވާ ގޮތުން ކުށެކެވެ.
