2025 ވަނަ އަހަރަށް ހުށަހެޅި ބަޖެޓުން ފެނިގެންދަނީ ސަރުކާރުން ރައްޔިތުންނަށް ވީ ވަޢުދުތައް ފުއްދޭނެ ގޮތެއް ހޯދިފައި ނެތްކަން ކަމަށް އެމް.ޑީ.ޕީ ގެ ރައީސް އަބްދުއްالله ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ 2025 ވަނަ އަހަރަށް ހުށަހަޅާފައިވާ ބަޖެޓާއި ގުޅިގެން އެމަނިކުފާނު އެކްސްގައި ކުރެއްވި ޕޯސްޓްއެއްގައެވެ.
މިގޮތުން ޝާހިދު ކުރެއްވި ޕޯސްޓްގައި ވިދާޅުވީ ރައީސް ޑ.ރ މުޢިއްޒު އިންތިޚާބުގެ ތެރޭގައި ރާއްޖޭގެ މާލީ ހާލަތުވެސް އެމަނިކުފާނަށް އެނގިވަޑައިގަންނަވާކަމަށާއި އަދި ވަޢުދުތައްވެސް ފުއްދަވާނެކަމަށްކަމުގައެވެ. ނަމަވެސް، ވެރިކަމަށް އަހަރެއްވާން ގާތްވެފައި އޮއްވާ ހުށަހެޅުއްވި ބަޖެޓުގައި ރަނގަޅު ޕްލޭނެއް، އަދި ރޭވުންތެރިކަމެއްްނެތްކަމަށްވެސް ޝާހިދު ވިދާޅުވިއެވެ.
“ މި ބަޖެޓުން ރައްޔިތުންނާއި ވިޔަފާރިތަކުން ނަގާ ޓެކްސްތައް ބޮޑުކުރީމާ އެ ފަރާތްތަކުގެ ފުއްދުންތެރިކަން ދަށްވެ، އިޤްތިސާދީ ނަފާއަށް ނޭދެވޭ އަސަރު ކުރާނެ. ޓެކްސް އާމްދަނީއާ ނުބައްދަލު މިންވަރަކަށް ޚަރަދު ބޮޑުކުރުމުން މާލީ ދެމެހެއްޓެނިވިކަން ގެއްލިގެންދޭ. މި ބަޖެޓުގައި ރައްޔިތުންނާ ގުޅުންހުރި ޚައްޞާސް ބައިތަކުން ޚަރަދު ކުޑަ ކުރާނެ ކަމަށް ބުނާއިރު، ސަރުކާރުން ކުރާ އިސްރާފާއި، ސިޔާސީ މަޤާމްތަކުގެ މުސާރައާއި އިނާޔަތްތަކަށް ހޭދަކުރާ މިންވަރު ކުޑަކުރާކަށް މަސައްކަތް ކުރާ ތަނެއް ބަޖެޓުން ނުފެނޭ ”
އެމް.ޑީ.ޕީގެ ރައީސް އަބްދުއްالله ޝާހިދު ވިދާޅުވެފަވެއެވެ.
ޝާހިދު ވިދާޅުވީ ޓެކްސް އާމްދަނީއާ ނުބައްދަލު މިންވަރަކަށް ޚަރަދު ބޮޑުކުރުމުން މާލީ ދެމެހެއްޓެނިވިކަން ގެއްލިގެންދާނެ ކަމަށާއި މި ބަޖެޓުގައި ރައްޔިތުންނާ ގުޅުންހުރި ޚައްޞާސް ބައިތަކުން ޚަރަދު ކުޑަ ކުރާނެ ކަމަށް ބުނެފައި ވާއިރު ސަރުކާރުން ކުރާ އިސްރާފާއި ސިޔާސީ މަޤާމްތަކުގެ މުސާރައާއި އިނާޔަތްތަކަށް ހޭދަކުރާ މިންވަރު ކުޑަކުރަން މަސައްކަތް ކުރާ ތަން ބަޖެޓުން ނުފެންނަ ކަމަށެވެ.
އަދި ދައުލަތުގެ ރިކަރަންޓް ޚަރަދު މައްޗަށް ދާއިރު، މި ބަޖެޓު ފޫބައްދަން 16.9 ބިލިއަން ރުފިޔާ ހޯދަން ޖެހޭ ކަމަށާއި، މި ފައިސާ ހޯދާނެ ގޮތުގެ ހަރުދަނާ ރޭވުންތެރިކަމެއް ބަޖެޓުން ނުފެންނަ ކަމަށް ޝާހިދު ވިދާޅުވިއެވެ.
ބަޖެޓުގެ ބޮޑުބައި ހޯދުމަށް ޖަހާފައި އޮތީ ބޭރުގެ ކޮމާޝަލް ބޭންކުތަކުންކަމަށާއި ޒަމާންވީ ޚާރިޖީ ގުޅުންތަކަށް މި ސަރުކާރުގެ ޢަމަލުތަކުން ނޭދެވޭ އަސަރުކޮށްފައިވުމުން މި ފައިސާ ހޯދުމަށް މިހާރުވެސް ސަރުކާރު ނުކުޅެދިފައިވާކަމަށް ޝާހިދު ވިދާޅުވިއެވެ.
އަދި ހަމަ އެހެންމެ ޝާހިދުވަނީ މި ބަޖެޓަކުން އެކަމަކަށް ތަސައްލީއެއް ނުހޯދޭކަމަށްވެސް ވިދާޅުވިއެވެ.
މި ބަޖެޓުގެ ސަބަބުން އާންމު ރައްޔިތުންގެ ދިރިއުޅުމުގެ ފެންވަރު އަންނަ އަހަރު ދަށްވާނެކަމަށާއި ވިޔަފާރިތަކުގެ ފައިދާ ދަށްވެ އިޤްތިސާދީ ދުވެލި ބުރަކި ޖެހޭނެކަމަށްވެސް ޝާހިދުވަނީ ވިދާޅުވިއެވެ.
ސަރުކާރުން ދަނީ އެމްޑީޕީ ސަރުކާރުން ގެނައި ހާމަކަން ބޮޑު ދެފުށް ފެންނަ ސިޔާސަތު ބަދަލުކޮށް، ސިއްރުވެރި ވަންހަނާ ސިޔާސަތަކަށް ބަދަލުކުރަމުންކަމަށާއި ބަޖެޓުގައި އަބަދުމެ ހުންނަ ތަފްސީލުތައް ފޮރުވާފައިކަމަށާއި ބަޖެޓުގެ މުހިއްމު ތާވަލުތައް ގެއްލުވާލައިފައިވާކަމަށް ދޭހަވާ މޭރުމަކުން ޝާހިދު ކުރެއްވި ޕޯސްޓްގައިވަނީ ސަރުކާރަށް ތުހުމަތުކުރައްވާފައެވެ.
މުވައްޒަފުންގެ މުސާރަ ބެހިގެންދާ ގޮތުގެ ތަފްސީލެއް ބަޖެޓުގައި ނެތްކަން ފާހަގަކުރައްވާ ޝާހިދު ވިދާޅުވީ ދައުލަތުގެ ބަޖެޓުގެ އެންމެ ބޮޑު 2 ބަޔަކީ މުވައްޒަފުންގެ މުސާރަ އާއި ތަރައްޤީގެ މަޝްރޫޢުތައްކަމުގައެވެ.
”ތަރައްޤީ މަޝްރޫޢުތަކަށް ކަނޑައަޅާފައިވާ 12 ބިލިއަން ރުފިޔާ ޚަރަދު ކުރަނީ ކޮން ރަށެއްގެ ކޮން މަޝްރޫޢަކަށް ކަމެއް އެނގޭކަށް ނެތް… “
”މި ބަޖެޓަކީ ރައްޔިތުންގެ އުއްމީދުތަކުގައި ކޮޅުފައިން ޖަހާ ރައްޔިތުންގެ ޖީބަށް އަތް ބާނާނެ ބަޖެޓެއް“
އެމް.ޑީ.ޕީގެ ރައީސް އަބްދުއްالله ޝާހިދު ވިދާޅުވިއެވެ.
މި ބަޖެޓަކީ ރައްޔިތުންގެ އުއްމީދުތަކުގައި ކޮޅުފައިން ޖަހާ ރައްޔިތުންގެ ޖީބަށް އަތް ބާނާނެ ބަޖެޓެއްކަމަށާއި މީގެ ސަބަބުން ރައްޔިތުންނަށާއި ރައްޔިތުންގެ މަންދޫބުންނަށް ސަރުކާރު ޖަވާބުދާރީ ކުރުވުމަށް ހުރަސް އެޅި ވައްކަމާއި ފަސާދައަށް މި ބަޖެޓު ހުޅުވިގެންދާނެ ކަމަށް ޝާހިދު ވިދާޅުވިއެވެ.
