ޒުވާނުން ބާރުވެރިކުރުވުމަށް ދިމާވެފައިވާ އެންމެ ބޮޑު ގޮންޖެހުމެއް ކަމުގައިވާ ބޯހިޔާވަހިކަމުގެ މައްސަލަ ހައްލުކުރުމަށް، ރިސޯޓުތަކުގައި މަސައްކަތްކުރާ ޒުވާނުންނަށް ރިސޯޓުތަކާ ކައިރިން ގެދޮރުގެ ފުރުސަތުތައް ފަހިކޮށްދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، ޒުވާނުންގެ ހުށަހެޅުންތަކާއި އެހެނިހެން ކަންބޮޑުވުންތައް އަޑުއައްސަވައި، އެކަންކަމާ ގުޅޭގޮތުން މަޝްވަރާކުރެއްވުމަށް އަންގާރަ ދުވަހުގެ ރޭ ބޭއްވި ”ޔޫތު ކޮފީ ވިތު ޕްރެޒިޑެންޓް“ ގެ ބައްދަލުވުމެއްގައެވެ.
މި ބައްދަލުވުމުގައި ރައީސް ވަނީ ޒުވާނުންނަށް ދިމާވެފައިވާ އެންމެ ބޮޑު އެއް ގޮންޖެހުމަކީ ބޯހިޔާވަހިކަމުގެ ދަތިކަންކަން ފާހަގަކުރައްވާފައެވެ. އެމަނިކުފާނު ވިދާޅުވީ ފަތުރުވެރިކަމުގެ ދާއިރާގައި މަސައްކަތްކުރާ ޒުވާނުންނަށް އާއިލާއާ ދުރުގައި ރިސޯޓުތަކުގައި ދިރިއުޅެން ޖެހުމަކީ ބޮޑު ގޮންޖެހުމެއްކަމަށެވެ. މިގޮތަށް އާއިލާއާ ދުރުގައި ދިރިއުޅެން ޖެހުމަކީ ޒުވާނުންގެ ދިރިއުޅުމުގެ ފެންވަރަށާއި ހިތްހަމަޖެހުމަށް ނޭދެވޭ އަސަރުކުރާ ކަމެއް ކަމަށް އެމަނިކުފާނު ވަނީ ވިދާޅުވެފައެވެ.
މި މައްސަލައަށް ހައްލެއް ހޯދުމުގެ ގޮތުން، ސަރުކާރުން މިހާރު ހިންގާ ހައުސިންގ މަޝްރޫއުތަކުން ޒުވާނުންނަށް އިސްކަންދޭނެކަމަށް ރައީސް ވިދާޅުވިއެވެ. އެގޮތުން ފަތުރުވެރިކަމުގެ ދާއިރާގައި މަސައްކަތްކުރާ ޒުވާނުންނަށް އެ ރިސޯޓުތަކުގެ ކައިރިން ނުވަތަ ޓޫރިޒަމް ޒޯންތަކާ ކައިރީގައި ހުންނަ ބޮޑެތި އާބާދީތަކުގައި ބޯހިޔާވަހިކަމުގެ ޕްރޮޖެކްޓުތައް ހިންގުމަށް ސަރުކާރުން އިސްކަންދޭނެއެވެ. މިގޮތަށް ބޯހިޔާވަހިކަން ފަހިކޮށްދިނުމުގެ ސަބަބުން، ޒުވާނުންނަށް އަމިއްލަ އާއިލާއާ ގާތުގައި ތިބެގެން ވަޒީފާ އަދާކުރުމުގެ ފުރުސަތު ލިބި، ދިރިއުޅުމުގެ ފެންވަރު ރަނގަޅުވެގެންދާނެ ކަމަށް ރައީސް ފާހަގަކުރެއްވިއެވެ.
މިހާރުވެސް ރާއްޖޭގެ އެކި ރަށްރަށުގައި ހިންގުމަށް ހަވާލުކުރެވިފައިވާ 800 އަށްވުރެ ގިނަ ހައުސިންގ ޔުނިޓްތަކުގެ މަޝްރޫއުތަކަށް އިޝާރާތްކުރައްވައި ރައީސް ވިދާޅުވީ، އެ މަޝްރޫއުތަކުން ފްލެޓް ދޫކުރާއިރު ވަކި އިންސައްތައެއް ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ހާއްސަ ކުރެވޭނެ ކަމަށެވެ. މިގޮތުން، އެރަށްރަށުން ފްލެޓްތައް ދޫކުރާއިރު، ފަތުރުވެރިކަމުގެ ދާއިރާގައި މަސައްކަތްކުރާ ޒުވާނުންނަށް އިސްކަން ލިބޭގޮތަށް ޝަރުތުތައް ކަނޑައެޅޭނެ ކަމަށް ރައީސް ވަނީ ހާމަކުރައްވާފައެވެ.
ފަތުރުވެރިކަމުގެ ދާއިރާގެ އިތުރުން، މަސްވެރިކަމުގެ ދާއިރާގައި މަސައްކަތްކުރާ ޒުވާނުންނާއި އަލަށް އާއިލާއެއް ފަށައިގެން އުޅޭ ޒުވާނުންނަށް ވެސް ބޯހިޔާވަހިކަމުގެ މަޝްރޫއުތަކުގައި އިސްކަންދޭނެ ކަމަށް ރައީސް ވިދާޅުވިއެވެ. މި އުސޫލަށް ރަށްރަށުގެ އިތުރުން މާލެ ސަރަހައްދުގައި ހިންގާ މަޝްރޫއުތަކުގައި ވެސް އަމަލުކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.
