އައްޑޫ ހައި ސްކޫލްގެ ދަރިވަރަކާއި ޓީޗަރެއްގެ ދެމެދުގައި ހިނގި ތަޅާފޮޅުމެއްގެ ވީޑިއޯ އާންމުވުމާ އެކު ބޮޑު ބަހުޘަކަށް ވިއެެވެ. ފުރަތަމަ އެވާހަކަ ނޫސްތަކުގެ ސުރުޚީއަށް އެރުމާއެކު، ޓީޗަރު ކުއްވެރި ކުރިއެވެ. ނަމަވެސްް އެޙާދިޘާގެ ވީޑިއޯ ސޯޝަލް މީޑިއާގައި އާއްމުވުމާއި އެކު ދަރިވަރުގެ އަޚުލާޤު ފެންވަރު ހާމަވެގެން ދިޔައެވެ. އެއީ ހަމަ އެކަނި އެދުވަހުގެ އެކުލާގު ޙާލަތު ނޫންކަން އެނގެއެވެ. ޓީޗަރުގެ މައްސަލަ ތަޙްޤީޤު ކުރުމަށް ހުށައަޅައިފިއެވެ. ދަރިވަރަށް މަޢާފަށް އެދެން އަންގައިފިއެވެ. ނިމުނީ ހެއްޔެވެ. މުޅި ތައުލީމ ދާއިރާގެ ހާލަތު ވަޒަން ކޮށްލާ ނުވޭތޯއެވެ. ސްކޫލުތަކުގެ ޙާލަތު ބަލާލާން ނުވޭތޯއެވެ.
މިހާދިޘާ އާއި ގުޅިގެން ބައެއް ބެލެނިވެރިންނާއި ޓީޗަރުންގެ ސުޢޫރުތަކަށް ބަލާއިރު އެއީ އެސްކޫލްގައި ހިނގި ޙާދިޘާއެއް ކަމަށްވީ ނަމަވެސް އެކަހަލަ ކުދިން ކޮންމެ ސްކޫލެއްގައި ވެސް އުޅެއެވެ. އެފަދަ ކުދިންނަށް އެނގިފައިވާ އޮންނަނީ ތިމަންނަ މިއުޅޭ ގޮތަށް ކުރެވޭނެ ކަމެއް ނޯންނާ ކަމެވެ. އެޅޭނެ ފިޔަވަޅެއް ނޯންނާނެކަމެވެ. މިފަދަ ކުދިން ޓީޗަރުންނަށާއި ދަރިވަރުންނާއި ބުލީ ކުރުމާއި ތަކެއްޗައް ގެއްލުން ދިނުމާއި އެހެން ދަރިވަރުންނަށް އުދަގޫ ކުރުން ފަދަ ޝަކުވާތަކަކީ ކޮންމެ ދުވަަހަކުވެސް ހިނގާ ކަންކަމެވެެ.
ތައުލީމީ ދާއިރާގެ ބެލެހެެއްޓުމަށް ވަކި ވުޒާރާއެއް ހައްދަވާ، އެވުޒާރާގައި ތަފާތު ސެކްޝަންތަކާއި ޔުނިޓްތައް ހައްދަވާ ކޯޑިނޭޓަރުންނާއި ޒޯން ކޯޑިނޭޓަރުންނާއި ، އަދި ސްކޫލްތަކަށް ޕްރިންސިލުންނާއި ޑެޕިއުޓީ ޕްރިންސިޕަލުންނާއި ސްޕަވައިޒަރުންނާއި ލީޑިންގ ޓީޗަަރ މިފަދަ އެތައް މަޤާމުތަކެއް ހައްދަވާ އެމަޤާމުތަކަށް ޓެކްސް ފައިސާއިން މުސާރަ ދެއްވަމުން ގެންދެއެވެ. ނަމަވެސް ސްކޫލްތަކުގައި މުދައްރިސުންނަށް ރައްކާތެރި ކަމެއް ނެތި މަސައްކަތް ކުރަން ޖެހިފަައިވާ އިރު އެކަން ހައްލު ކުރާނެ ފަރާތެއް ނެތެވެ. އަޚުލާޤު ފެންވަަރު ދަށް ދަރިވަރުންގެ ސަބަބުން، ދެން ތިބި އެހެން ދަރިވަރުންގެ ވެސް ތައުލީމީ ހަޔާތް ބަރުބާދުވަމުން ދާއިރު ހަމަ މަގަށް އެޅުވޭނެ ގޮތެއް ނެތެވެ. ޤާނޫނު ތަކާއި ޤަވާއިދުތައް އޮންނަ ވަރުގަަދަަ ކަމުންނެވެ. ކުޑަކުއްޖަކަށް ވާތީއެވެ.
ތައުލީމީ ދާއިރާއަށް ހޭދަ ކުރައްވާ މިންވަރު ދަނީ އެއްއަހަރުން އަނެއް އަހަރަށް އިތުރު ވަމުންނެވެ. ތައުލީމީ ވުޒާރައިން އަދާ ހަމަކޮށްފައި ވާ މައުލޫމާތަށް ބަލާއިރު 219 ސްކޫލުގައި 78ހާސް ވުރެ ގިނަ ދަރިވަރުންނަށް ކިޔަވައި ދިނުމަށް 9ހާހަށްވުރެ ގިނަ މުދައްރިސުން ހަރަކާތްތެރި ވަމުން ދެއެވެ. ދެން އޮތީ ނަތީޖާއެވެ. ރާއްޖޭގެ ދަރިވަރުން އިލްމީ ގޮތުން މަތީ ވަނަތައް ހޯދަމުން ދެއެވެ. ދުނިޔޭގެ ފެންވަރުގައި ގުނާލެވެއެވެ. ނަމަވެސް އިލްމާއެކު ދޭން ޖެހޭ އަޚުލާޤަށް އޮތީ އިސްކަން ނުދެވިފައެވެ. ކުއްޖަކު ކުރާ ކުށަކުން އެޅޭނެ ފިޔަވަޅެއްވެސް ނެތެވެ. އެކުއްޖާ ރަގަޅު ކުރުމަށް ހެދޭނެ ގޮތެއްވެސް ނެތެވެ. ކިޔަވައި ދެއްވާ މުދައްރިސުން މިޖެހެނީ ކޮންމެ ކަމެއް ކުރިއަސް ކުލާހަށް ހާޒިރުވާށެވެ. މުދައްރިސުގެ ވާހަކަ އަޑުއަހާނެ މީހަކު ނެތެވެ.
ތައުލީމާކާއި ތަރުބިއްޔަތާ ގުޅުމެއް ނެތްވާހަކަ އަކީ މިއަދުގެ ތައުލީމީ ދައިރާގެ ޙާލަތެވެ. ގްރޭޑް 10 ނިންމާ ކުއްޖަކަށްވެސް ހުރިހާ މައުލޫމާތެއް ލިބިފައި ހުރެއެވެ. މުޖުތަމައަކަށް ބޭނުން ހިފޭނެ އެންމެހާ މައުލޫމާތެއް އެދަރިވަރަކަށް ހުންނަނީ ލިބިފައެވެ. ޓެސްޓް ޕޭޕަރުން ހޯދަނީ 100އެވެ. ނަމަވެސް ތަރުބިއްޔަތާއި އޭނާގެ އަޚުލާގުން ހޯދަނީ ސުމެކެވެ. ވަކި ކަމެއްގެ ވާހަކަ ދެއްކުމުގެ ބޭނުމެއްނެތެވެ. އިހުތިރާމު ކުރުމާއި މަސައްކަތުގެ އަޚުލާގައި ދީނީ ކަންކަމަށް ދޭ ސަމާލުކަން ކުޑަ ވާހަކައަކީ އައު ވާހަކައެއް ނޫނެވެ. ވީމާ ދެވޭ ތައުލީމުގައި އިހުމާލެއް އެބައޮތް ކަމަށް ޤަބޫލު ކުރަން ޖެހެއެވެ. މިކަމުގެ ޒިންމާ ނަންގަވާނީ ތައުލީމީ ދާއިރާ ހިންގަވަން ތިބި ވެރިންްތޯއެވެ. ނުވަތަ މުދައްރިސުން ތޯއެވެ. ނުވަތަ ބެލެނިވެރިންް ތޯއެވެ.
ރާއްޖޭގެ ތައުލީމުން މިފެންނަނީ ދެވޭ ތައުލީމާ ތަރުބިއްޔަތާ ގުޅުމެއްނެތް ކަމެވެެ. ތައުލީމީ މުޤައްރަރުތަކުގައި ދަރިވަރުންގެ ކިބައިގާ ހަރުލައްވަން ޖެހޭ ސިފަތައް ފަށުއި ވެފައި ފުރިހަމައެވެ. އެސިފަތަކުން ޒީނަތްތެރި ވަމުން ނުދާކަން ހަމަ ކޮންމެ މީހަކުވެސް ޤަބޫލު ކުރާނެއެވެ. ވީމާ މިވާ ގޮތަކަކީ ޖަހާ މިއުޒިކާ ލަވަ އާއި ގުޅުމެއް ނެތީމަ ވާގޮތެވެ. މިއުޒިކުން އަޑު އިވޭނީ ދޮހޮއްކޮބޭ އަސަރުގަދަ ލަވައެއްގެ މިއުޒިކެވެ. ކިޔަނީ މިހާރުގެ ރޮކު ލަވައެކެވެ. ވީމާ އަޅުގަނޑު ކަހަލަ މީހަކަށް ވަނީ ބޮލަށް އުދަގުލެވެ.
