ރައީސް ޑރ. މުހައްމަދު މުއިއްޒު، ނިޝާން ޢަސްކަރީގެ ވެރިކަމުގެ ޢިއްޒަތް، މޭޖާ ޖެނެރަލް (ރިޓަޔާޑް) މޫސާ ޢަލީ ޖަލީލަށް އަރުވައިފި އެވެ.
ރައީސް މުއިއްޒު މި އިއްޒަތް މޫސާ ޖަލީލަށް އަރުވާފައިވަނީ ނަސްރުގެ ދުވަސް ފާހަގަކުރަން އާދިއްތަ ދުވަހުގެ ރޭ ބޭއްވި ރަސްމީ ޖަލްސާަ އެވެ.
މި ޢިއްޒަތް، މޫސާ ޖަލީލަށް އަރުވާފައިވަނީ ދިވެހި ޤައުމާއި ރައްޔިތުންގެ ސަލާމަތަށްޓަކައި ޢަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތްޕުޅުތަކާއި، ޚާއްޞަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.
މި ޢިއްޒަތް ދެއްވުމަށް ރައީސް ކަނޑައެޅުއްވީ، ޤާނޫނުއަސާސީގެ 115 ވަނަ މާއްދާއިންނާއި، ރާއްޖޭގެ ޢިއްޒަތުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުންނެވެ.
މޫސާ އަލީ ޖަލީލަކީ ނޮވެމްބަރުގެ 3ގެ ހަމަލާއިން ރާއްޖެ ސަލާމަތް ކުރުމަށް މުހިންމު ދައުރެއް އަދާކުރެއްވި ބަތަލެކެވެ.
