ޖުޑީޝަލް ސާވިސް ކޮމިޝަން (ޖޭއެސްސީ) އިން، ކްރިމިނަލް ކޯޓުގެ ފަނޑިޔާރު ހުސައިން ފާއިޒް ރަޝާދު ފަނޑިޔާރުކަމުގެ މަގާމުން ވަކިކުރުމުގެ މައްސަލަ ދިރާސާކޮށް ގޮތެއް ނިންމުމަށް ރައްޔިތުންގެ މަޖިލީހަށް ހުށަހަޅައިފިއެވެ.
ޖޭއެސްސީގެ ރައީސް ހުސްނީ މުބާރަކް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ފޮނުވި ސިޓީގައި ވިދާޅުވެފައިވަނީ ސ.ހިތަދޫ ކޯޒީ ކޯނާ އަލީ އަންވަރު މުހައްމަދުގެ ބަންދާމެދު ގޮތެއް ކަނޑައެޅުމުގައި ގާނޫނާ ޚިލާފު އަމަލެއް ގާޒީ ފާއިޒު ކޮށްފައިވާކަން އެ ކޮމިޝަނުގެ ތަހުގީގު ކޮމިޓީއަށް ސާބިތުވެފައިވާ ކަމަށެވެ.
ފާއިޒުގެ މި އަމަލަކީ ގާނޫނުއަސާސީގެ 142 ވަނަ މާއްދާ އާއި ފަނޑިޔާރުންގެ ގާނޫނުގެ 33 ވަނަ މާއްދާގެ (ށ) އަދި ފަނޑީޔާރުންގެ ސުކޫލީ މިންގަނޑުގެ 1.1، 2.1 އަދި 3.1 ކަނޑައަޅާފައިވާ މިންގަނޑާއި ޚިލާފު އަމަލެއް ކަމަށް ޖޭއެސްސީން ވަނީ ވިދާޅުވެފައެވެ.
ގާޒީ ފާއިޒް ފަނޑިޔާރުކަމުން ވަކިކުރުމަށް މަޖިލީހަށް ހުށަހެޅުމަށް އެ ކޮމިޝަނުން ނިންމީ މި އަހަރުގެ 46 ވަނަ ޖަލްސާގައެވެ.
މި މައްސަލަ ދިރާސާކޮށް ގޮތެއް ނިންމުމަށް މަޖިލީހުގެ ޖުޑީޝަރީ ކޮމިޓީއަށް ވަނީ ފޮނުވާފައެވެ.
އީރާންގެ ބޯޓަކުން ރާއްޖެއަށް އެތެރެކުރި 70 ކިލޯގެ މަސްތުވާތަކެތީގެ މައްސަލައިގައި ހައްޔަރުކުރި އަލީ އަންވަރު މުހައްމަދު ބަންދުން ދޫކޮށްލި މައްސަލައިގައި ޖޭއެސްސީއަށް ހުށަހެޅުނު ޝަކުވާއަކާ ގުޅިގެން ފާއިޒު ދެ މަސް ދުވަހަށް ސަސްޕެންޑް ވެސް ކުރެވުނެވެ.
އެ މައްސަލައިގައި ހިމެނޭ އަންވަރު ދޫކޮށްލާފައި ހުއްޓައި މަސްތުވާތަކެތީގެ އެހެން މައްސަލައެއްގައި އަނެއްކާ ވެސް އާ އަމުރެއްގެ ދަށުން ހައްޔަރުކުރަން ފުލުހުން މަސައްކަތް ކުރިއެވެ. އެކަމަކު، އޭރު އޭނާ ވަނީ ސްރީލަންކާ އަށް ގޮސް ފިލަން މަސައްކަތްކޮށްފައެވެ. ނަމަވެސް ލަންކާ އިން އަންވަރު އަތުލައިގަތުމަށް ފަހުގައި އޭނާ ވަނީ ޑީޕޯޓްކޮށްލައިފައެވެ.
ގާޒީ ފާއިޒް މީގެ ކުރިން ވެސް ވަނީ ސަސްޕެންޑްކޮށްފައެވެ. އެގޮތުން 2021 ވަނަ އަހަރު ވެސް އޭނާ ސަސްޕެންޑް ކުރީ ދެ މަސް ދުވަހަށެވެ.
ފާއިޒް ސަސްޕެންޑް ކުރީ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ޝަރީއަތާ ގުޅޭގޮތުން ފަނޑިޔާރުންތަކެއް ދެއްކެވި ކަމަށް ބުނާ އޯޑިއޯތަކުގެ މައްސަލައެއްގައެވެ. ލީކުވި އޯޑިއޯތަކުގެ މައްސަލައިގައި ގާޒީ ފާއިޒުގެ އަޑު ދިމާނުވާތީ ސަސްޕެންޝަން އޭރު ވަނީ އުވާލައިފައެވެ.
ފާއިޒް ކްރިމިނަލް ކޯޓުގެ ފަނޑިޔާރު ކަމަށް އައްޔަން ކުރީ ފެބްރުއަރީ 2019 ގައެވެ. އޭގެ ކުރިން ސިވިލް ކޯޓުގެ ގާޒީކަމާއި ވަޒީފާއާ ބެހޭ ޓްރައިބިއުނަލްގެ ރައީސްގެ މަގާމު ވެސް އަދާކުރެއްވިއެވެ.
