ލަންކާގައި ދިރިއުޅޭ އަދި އެގައުމަށް ދަތުރުކުރާ ދިވެހިން ސަމާލުވާން އެދިއްޖެ

ލަންކާއަށް މިހާރު ކުރަމުންދާ ބޯ ވިއްސާރައާ ގުޅިގެން އެ ގައުމުގައި ދިރިއުޅޭ، ކިޔަވާ އަދި ދަތުރުކުރާ ހުރިހާ ދިވެހިން ސަމާލުވުމަށް ސްރީލަންކާގައި ހުންނަ ދިވެހިރާއްޖޭގެ ހައިކޮމިޝަނުން އިލްތިމާސްކޮށްފިއެވެ.

އެ ކޮމިޝަނުން ނެރުނު ނޫސް ބަޔާނުގައިބުނީ، ”ދިތްވާ“ ނަމަކަށް ކިޔާ ތޫފާނެއް ސްރީލަންކާ ކައިރީގައި އުފެދިފައިވާ ކަމަށް ސްރީލަންކާގެ މޫސުމާބެހޭ އިދާރާއިން މަޢުލޫމާތު ދީފައިވާ ކަމަށެވެ. އަދި މި ތޫފާނުގެ ސަބަބުން ގަދަ ވަޔާއެކު ވާރޭވެހި، ކަނޑުގެ ލޮނުގަނޑު އުފުލި އެރުމުގެ ނުރައްކާ ބޮޑުވެފައިވާ ކަމަށެވެ.

މީގެ އިތުރުން، މިރޭ 8:30 ވުމާ ހަމައަށް މުޅި ސްރީލަންކާއަށް ބޯކޮށް ވާރޭވެހި އިތުރަށް ފެންބޮޑުވާނެ ކަމުގެ އިންޒާރެއް ވަނީ ނެރެފައިވާކަންވެސް ވަނީ ފާހަގަކޮށްފައެވެ.

ގަދަ ވަޔާއި ވިއްސާރައާ ގުޅިގެން ސްރީލަންކާ ސަރުކާރުން ވަނީ މިއަދަކީ މުހިންމު ހިދުމަތްތައް ދޭ ތަންތަން ފިޔަވައި، ހުރިހާ ސަރުކާރު އިދާރާތަކަށް ރަސްމީ ބަންދު ދުވަހެއްގެ ގޮތުގައި އިޢުލާނުކޮށްފައެވެ.

އެހެންކަމުން ސްރީލަންކާގައި ތިބި ހުރިހާ ދިވެހި ރައްޔިތުންނަށް ދިވެހި ހައިކޮމިޝަނުން ވަނީ ތިރީގައިވާ ކަންތައްތަކަށް ސަމާލުވުމަށް އިލްތިމާސްކޮށްފައެވެ.

1) ފެންބޮޑުވާ އަދި ތޫފާނުގެ ސަބަބުން ގަސްގަހާގެއްސާއި ތަކެތި ވެއްޓުމުގެ ނުރައްކާ އޮތް ސަރަހައްދުތަކަށް ދަތުރުކުރުން ހުއްޓާލުން.

2) ބޯކޮށް ވާރޭވެހި ގަދަވައިޖެހޭ ވަގުތުތަކުގައި ގޭތެރޭގައި ތިބުން.

3) ލަންކާގެ މޫސުމާބެހޭ އިދާރާ (Department of Meteorology) އާއި ގުދުރަތީ ކާރިސާތަކާބެހޭ މަރުކަޒު (Disaster Management Centre – DMC) އިން ދޭ އެންމެ ފަހުގެ މަޢުލޫމާތުތަކަށް ސަމާލުވުން.

4) ފެން، ބޭސް، މުހިންމު ލިޔެކިޔުންތައް، އަދި ޗާޖުކޮށްފައި ހުރި މޯބައިލް ފޯނުފަދަ އަސާސީ ތަކެތި އަބަދުވެސް ތައްޔާރީ ހާލަތުގައި ބެހެއްޓުން.

5) ޕާސްޕޯޓާއި ދިވެއްސެއްކަން އަންގައިދޭ ލިޔެކިޔުންތައް ސަލާމަތުން ބެހެއްޓިފައި ހުރިކަން ކަށަވަރުކުރުން.

6) ފެންގަނޑު ބޮޑުވަމުންދާތީ ކޯރުތަކާއި، ކުޅިތަކާއި، ގޮނޑުދޮށުގެ ސަރަހައްދުތަކާމެދު އިތުރަށް ސަމާލުވުން.

7) ތިރިތަންތަނުގައި ނުވަތަ ނުރައްކަލުގެ ހާލަތުގައިވާ ސަރަހައްދުތަކުގައި ދިރިއުޅެންޏާ ރައްކާތެރި ތަންތަނަށް ދިއުން.

8) އަވަސް އެހީތެރިކަމެއް ބޭނުންވެއްޖެނަމަ، ލަންކާގައި ހުންނަ ދިވެހި ހައިކޮމިޝަނުގެ ހޮޓްލައިން ނަންބަރު: 94777228800+ އަދި އީމެއިލް އެޑްރެސް: colombo.consular@foreign.gov.mv އަށް ގުޅުން

ލަންކާއަށް މިހާރު ކުރަމުންދާ ވިއްސާރާއާ ގުޅިގެން އެ ގައުމުގެ އެކި ސަރަހައްދުތަކުގައި ފެންބޮޑުވެ ގެއްލުންވެސް ވަމުން ދެއެވެ. އަދި މިދިޔަ ހަފްތާއެއްހާ ދުވަސް ތެރޭގައި 40 އަށްވުރެ ގިނަ މީހުން މަރުވެސް ވެފައި ވެއެވެ.