ރައީސްކަމުގެ މަގާމުން ވަކިވިތާ ހަތް އަހަރުވެއްޖެ ކަމަށާއި އޮފީސް ހިންގަން ސަރުކާރު ބަޖެޓުން ލޯ ލާރިއެއް ވެސް ނަގާފަ ނޯންނާނޭ ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެ އެވެ.
އެމަނިކުފާނުގެ އަގު ވައްޓާލާ ނަން ކިލަނބު ކުރުމުގެ ނިޔަތުގައި ޕީއެންސީގެ ޕީޖީ ލީޑަރު އިބްރާހިމް ފަލާހު ދެއްކެވި ދޮގު ވާހަކަތަކަށް ރައްދު ދެއްވައި ޕީއެންއެފް އިން ބޭއްވި ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ އެމަނިކުފާނަށް ރައްދުކޮށް އެފަދަ ހަގީގަތެއް ނެތް ވާހަތައް ދައްކަނީ ތަންދޮރު ނޭންގޭ ދެއުޅިއެއް ނުވާ މީހުން ކަމަށެވެ.
ކުރީގެ ރައީސުންގެ އޮފީސް ހިންގަން ދައުލަތުން މަހަކު 175،000ރ ދިނުން ހުއްޓާލުމާއި އެ ބޭފުޅުންގެ އިނާޔަތްތައް ކުޑަކުރުމާއި އެ ނޫން ވެސް ބައެއް ބަދަލުތައް ގާނޫނަށް ގެންނަން ސަރުކަރުން ހުށަހެޅި ބިލުގެ ބަހުސްގައި ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްެރާހީމް ފަލާހު، ވަނީ ކުރީގެ ރައީސް އަބްދުﷲ ޔާމީނަށް ރައްދުވާގޮތަށް ވަރުގަދަ ބަހުގެ ހަމަލާތަކެއް ދެއްވާފަ އެވެ.
ސަރުކާރުގެ ފަރާތުން ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު ހުށަހެޅުއްވި އެ ބިލަށް މަޖިލީހުގެ ޖަލްސާގައި ކުރި ބަހުސްގައި ފަލާހު ވިދާޅުވީ، ރައީސްކަން ކުރައްވާފައިވާ ބޭފުުޅުންނަށް ހިމާޔަތާއި ރައްކާތެރިކަން ދޭން ޖެހޭނެ ކަމަށާއި އެއީ ގައުމަށް ވަރަށް ބޮޑު ހިދުމަތެއް ކުރައްވާފައިވާ ބޭފުޅުން ކަމަށެވެ. ނަމަވެސް އޭނާ ތުހުމަތު ކުރެއްވީ ބައެއް ރައީސުން ވެރިކަން ކުރެއްވި އިރު ދައުލަތުގެ ހަޒާނާ އިން ވަރަށް ގިނަ އަދަދެއްގެ ”ފައިސާ ނަންގަވައިގެން“ ވަރަށް ބޮޑެތި ގެތައް އަޅުއްވާފައި އެބަހުރި ކަމަށެވެ.
”އެހެންވީމާ ހަގީގަތުގައި އެ ގޭގޭގައި ވެސް މި އިނާޔަތް ނުދިން ކަމުގައި ވިޔަސް އޮފީސް ހިންގުމަކީ ހަމަ ދައުލަތުން ފައިސާ ދީގެން އޮފީސް ހިންގުން ކަމަށް ރައްޔިތުންނަަށް ބެލެވެނީ،“ ފަލާހު ވިދާޅުވި އެވެ.
އޭނާ ތުހުމަތު ކުރެއްވި ގޮތުގައި ޔާމީންގެ ގެކޮޅުގައި ”ސިޔާސީ“ މަސައްކަތްތައް ކުރައްވާ ނަމަ އެ ކަން ޔާމީން ކުރައްވަނީ ދައުލަތުން ”ފައިސާ ލިބިގެން“ ނެވެ. އަދި އެއީ ”ނުހައްގު“ ފައިސާގެ އިމާރާތެއް ކަމުގެ ތުހުމަތު ވެސް ޔާމީންގެ ބޮލުގައި ފަލާހު އެޅުވި އެވެ.
ފަލާހުގެ މި ވާހަކަތަކަށް ރައްދުދެއްވައި ރައީސް ޔާމީން ވިދާޅުވީ، ޕީއެންއެފްގެ ޓައުން ހޯލު ޖަލްސާއަކީ ރާއްޖޭގެ އެކި ކަންކޮޅުތަކުން ގިނަ ރައްޔިތުން ބަލަމުންދާ ޖަލްސާއެއް ކަމަށާ އެހެންކަމުން ފަލާހު އޮޅުވާލަން ކުރި މަސައްކަތް ރައްޔިތުންނަށް ހާމަކޮށްދޭން ޕީއެންއެފްގެ ޖަލްސާއަށް ވުރެ މުނާސަބަ އިވެންޓެއް ނޯންނާނެ ކަމަށެވެ.
އެގޮތުން ރައީސް ޔާމީން ވިދާޅުވީ، ރައީސްކަން ކުރައްވާ ވަކިވަޑައިގެންނެވި ފަހުން ހަތް އަހަރުގެ ދިގު މުއްދަތެއް ފަހަނަ އަޅާ ގޮސްފައިވާއިރު އެއިން އެންމެ ދުވަހެއްގައިވެސް ދައުލަތުގެ ބަޖެޓުން އެމަނިކުފާނުގެ އޮފީސް ހިންގަންވެސް އަދި އާއިލާއަށާ އަމިއްލަފުޅު ބޭސްފަރުވާއަށްވެސް ލޯލާރިއެއްވެސް ހޭދަކުރައްވާ ބިލެއް ވެސް ފޮނުވާފައި ނުވާނެ ކަމަށެވެ.
އެހެންކަމުން ފަލާހުމެން ހިތުން އެމަނިކުފާނަށް ޖެއްސުމަށް، ކުރީގެ ރައީސުންގެ އިނާޔަތްތައް އުނިކުރަން ނިންމި ނަމަވެސް އެމަނިިކުފާނަށް އެކަމުން ލިބޭނެ ގެއްލުމެއް އަދި ވާނެ ދެރައެއް ނޯންނާނެ ކަމަށެެވެ. އަދި ހަމައެހެންމ އެމަނިކުފާނުގެ އަގު ވައްޓާލުމުގެ ނިޔަތުގައި ދޮގު ފަތުރަން ކުރާ ކޮންމެ މަސައްކަތަކާ އެކު ބަރަހާނާވާނީ ފަލާހުމެންގެ ފަތިފުށާ ސަރުކާރު ކަމަށް ވެސް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން ވިދާޅުވީ ކުރީގެ ރައީސުންގެ އިނާޔަތް އުނިކުރުމުން ގެއްލުން ފަހުން ވާނީ ވެސް ފަލާހުމެންގެ ރައީސަށް ކަމަށެވެ.
”ރައީސް ކަމުން ވަކިވިތާ ހަތް އަހަރުވީއިރު ސަރުކާރުގެ ބަޖެޓުން ލޯ ލާރިއެއްވެސް ނޯންނާނެ ނަގާފައި އޮފީސް ހިންގަން. ރައީސްކަމުން ވަކިވިތާ ހަތް އަހަރުވީއިރު އަޅުގަޑެއް އަޅުގަޑުގެ އަނބިމީހާއެއް ނޯންނާނެ ޑޮކްޓަރަށް ދައްކާ އެންމެ ބިލެއްވެސް ދައުލަތަށް ފޮނުވާފައި. އިނާޔާތްތައް އުނި ކުރިޔަސް އަޅުގަޑަށް ވާނެ ގެއްލުމެއް ނޯންނާނެ، ގެއްލުން ވަންޏާ ވާނީ ފަލާހުމެންގެ ރައީސަށް ފަހުން. ރައީސް ޔާމީންއޭ ކިޔާ އަނގަފުޅާ ކުރިވަރަކަށް ބޭލޭނީ ފަލާހުމެންގެ ސޯޓު.“ ރައީސް ޔާމީން ވިދާޅުވި އެވެ.
ރައީސް ޔާމީން އިތުރަށް ވިދާޅުވީ، ރައްޔިތުންނަށް ކަންކަން އޮޅުންފިލުވަދޭން ރައީސް މުއިއްޒު ނެރޭނެ އިލްމީ ބަޔަކު ނުތިބޭނެ ކަމަށާ ރެން ޖެހޭނީ ފަލާހުމެން ކަހަލަ ކައްޓަލައިން ކަމަށެވެ.
