ހުޅުމާލޭގެ ތިންވަނަ ފިޔަވަހި ހިއްކުމަށް ރާއްޖެ ގެނައުމަށް ނިންމި ދެވަނަ ޑްރެޖަރު މާލެ އައިސްފައިވާކަން ރައީސް ޑރ. މުޙައްމަދު މުޢިއްޒު އިއުލާނުކުރައްވައިފިއެވެ.
”އެކްސް“ގައި ކުރެއްވި ޕޯސްޓެއްގައި ރައީސް ވިދާޅުވީ، ހުޅުމާލެ ތިންވަނަ ފިޔަވަހި ހިއްކުމަށް ބޭނުންކުރާ ނެދަލޭންޑްސްގެ ”ޓީއެސްއެޗްޑީ ޕްރިންސް ޑާ ނެޑަލެންޑަން“ މިއަދު ރާއްޖެ އައިސްފައިވާ ކަމަށާއި، އެ ޑްރެޖަރާއި އެކު ”ޓީއެސްއެޗްޑީ އޮރަންޖީ“ ޑްރެޖަރުން އެ ބިން ހިއްކުމުގެ މަސައްކަތް ބާރަށް ކުރާނެ ކަމަށެވެ.
އަދި އެ މަސައްކަތް ކުރިޔަށްދާއިރު، ގިރާވަރުފަޅުގެ ބަންޑަލް ވޯލްގެ މަސައްކަތްތައް އީއައިއޭގެ މަސައްކަތްތައް ނިމުމުން ފަށާނެ ކަމަށް ވެސް ރައީސް ވިދާޅުވިއެވެ.
އަދި ހުޅުމާލެ ފޭސް ތިނެއް ހިއްކައި ނިމުމުން، ގިރާވަރު ހިއްކައި ނިންމަން ވެސް އެ ދެ ޑްރެޖަރު ބޭނުންކުރާނެ ކަމަށް ވެސް ރައީސް ވިދާޅުވިއެވެ.
3 ވަނަ އަހަރުގެ ސެޕްޓެމްބަރު މަހު ފުރަތަމަ ފެށި އެ މަޝްރޫއުގެ ދަށުން މިހާތަނަށް ވަނީ 24 ހެކްޓަރުގެ ބިން ހިއްކާފަ އެވެ. އެއަށްފަހު އެ މަޝްރޫއު މަޑުޖެހުނީ، ހުޅުމާލޭގެ މާސްޓަރ ޕްލޭން ރިވައިޒް ކުރުމުގެ މަސައްކަތް ކުރިއަށް ދާތީ އެވެ.
އެގޮތުން މަސައްކަތް މަޑުޖެހިފައި އޮތުމަށް ފަހު، ތިންވަނަ ފިޔަވަހިން ބާކީ 38 ހެކްޓަރުގެ ބިން ހިއްކުމުގެ މަސައްކަތްތައް އަލުން ފެށީ މި މަހުގެ 10 ވަނަ ދުވަހުއެވެ. އެ މަސައްކަތް ފަށައިފައިވަނީ ”ޓީއެސްއެޗްޑީ އޮރަންޖީ“ ގެނެސް ފެށުމުންނެވެ.
ހުޅުމާލޭ ތިންވަނަ ފިޔަވަހި ހިއްކުމުގެ މަޝްރޫއަކީ މާލޭ ސަރަހައްދުގައި ދިރިއުޅޭ ފަރާތްތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން ކުރިއަށްގެންދާ މަޝްރޫއެކެވެ. އެ މަޝްރޫއުގެ މަސައްކަތް އަވަހަށް ނިންމައި، ބޯހިޔާވަހިކަމުގެ ފުރުސަތު ވީހާ ވެސް ގިނަ ރައްޔިތުންނަށް ހޯދައިދިނުމަށް ސަރުކާރުން އަންނަނީ މަސައްކަތް ކުރަމުންނެވެ.
