މަސްތުވާތަކެއްޗާއި ދެކޮޅަށް ފުލުހުން ހިންގި އޮޕަރޭޝަން ”އަލިމަގު“ ގެ ތެރެއިން ހައްޔަރުކުރި ގިނަ މީހުންނަށް ކުށް ސާބިތުކުރެވޭ ވަރަށް ހެކި ގަރީނާ ލިބިފައިވާ ކަމަށް ފުލުހުން ބުނެފިއެވެ.
މި އޮޕަރޭޝަނާ ގުޅޭ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނީ މިއީ މަސްތުވާތަކެތީގެ ވިޔަފާރީގައި އެކި ދަރަޖައިގައި ހަރަކާތްތެރިވާ ފަރާތްތަކަށް އަމާޒުކޮށް ކުރިއަށް ގެންގޮސްފައިވާ އޮޕަރޭޝަނެއްކަމަށެވެ.
ފުލުހުން ބުނީ އޮޕަރޭޝަން އަލިމަގުގެ ތެރެއިން ހައްޔަރުކުރި ފަރާތްތަކާ ގުޅޭ ތަހުގީގު މިހާރުވެސް ކުރިއަށްދާ ކަމަށާއި، މަސްތުވާތަކެތީގެ ވިޔަފާރީގައި އެކި ލެވެލްތަކުގައި ހަރަކާތްތެރިވާ ފަރާތްތައް މި އޮޕަރޭޝަނުގެ ތެރެއިން ހައްޔަރުކޮށްފައިވާ ކަމަށެވެ. އަދި، ހައްޔަރުކުރި މީހުންގެ ތެރެއިން ބައެއް މީހުން ދޫކޮށްލާފައި ވީނަމަވެސް، އެއީ ހެކި ގަރީނާ ނެތިގެން ދޫކޮށްލި ބައެއް ނޫން ކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ، ދޫކޮށްލި މީހުން ދޫކޮށްލާފައިވަނީ ގާނޫނުގައިވާ ގޮތަށް ބަންދުގައި ބަހައްޓަން ޖެހޭ ހާލަތުގެ ތެރެއަށް ނުފެތޭތީ ކަމަށެވެ.
”ދޫކުރި މީހުންގެ ތެރޭގައިވެސް މަސްތުވާތަކެތި ގެންގުޅެ ބޭނުންކުރުމުގެ ކުށް ސާބިތުވާވަރަށް ހެކި ގަރީނާ ލިބިފައި ހުރި ފަރާތްތައް އެބަ ތިބި،“ ފުލުހުން ބުނެފައިވެއެވެ.
މީގެއިތުރުން މިވަގުތު ހައްޔަރުގައި ތިބި ފަރާތްތަކުގެ ތެރެއިންވެސް ރަނގަޅު ހެކި ގަރީނާ ލިބިފައި ތިބި ފަރާތްތައް ނިސްބަތުން ގިނަ ކަމަށް ފުލުހުން ހާމަކުރިއެވެ.
އަދި މިވަގުތު ބަންދުގައި ބައިތިއްބާފައި ތިބީ މައްސަލައިގެ ކުޑަ ބޮޑު މިނާއި ހެކިބަހަށް ނުފޫޒު ފޯރުވުމުގެ އިހުތިމާލު އޮތް ފަރާތްތަކާއި، މުޖުތަމައުގެ ސަލާމަތަށް ނުރައްކާ އޮތް ފަރާތްތައް ކަމަށް ފުލުހުން ވަނީ ބުނެފައެވެ.
