މަސްތުވާތަކެތީގެ ވިޔަފާރީގައި ހަރަކާތްތެރިިވާ މީހުން އެކަން ހުއްޓާލަން އިންޒާރު ދެއްވާ އެކަން ހުއްޓާނުލާނަމަ އުޅެން އުނދަގޫ ކުރާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެ އެވެ.
ރާއްޖޭގައި މަސްތުވާތަކެއްޗާ ދެކޮޅަށް ހިންގާ އެންމެ ބޮޑު އޮޕަރޭޝަނާއި ގުޅޭގޮތުން ވާހަކަ ދައްކަވަމުންނެވެ. ވަޒީރު ވިދާޅުވި ގޮތުގައި މިއަދުގެ އޮޕަރޭޝަނަކީ މިދިޔަ ހަ މަސް ދުވަހު އެއްކުރި މައުލޫމާތުތަކުގެ މައްޗަށް ބިނާކޮށް ހިންގާ އޮޕަރޭޝަނެކެވެ. ރާއްޖޭގެ ހުރިހާ ކަންކޮޅެއްގައި 500 ވުރެ ގިނަ ފުލުހުން ބައިވެރިވެގެން ހިންގާ މި އޮޕަރޭޝަނާއެކު މަސްތުވާތަކެތީގެ ވިޔަފާރިއަށް ނިމުން ގެންނާނެ ކަމަށް ވިދާޅުވި އެވެ.
ވަޒީރު ވަނީ މަސްތުވާތަކެތީގެ ވިޔަފާރީގައި އުޅޭ މީހުން އެކަން ހުއްޓާލަން އިންޒާރު ކޮށްފަ އެވެ. އަދި ވިދާޅުވީ އެކަން ހުއްޓާނުލައިފިނަމަ އުޅެން އުނދަގޫ ކުރާނެ ކަމަށެވެ.
”ދެން ޖެހޭނީ މިކަން [މަސްތުވާތަކެތީގެ ވިޔަފާރި] ހުއްޓާލަން. މިއަދަށް ފަހު ދެން އެ ފުރުސަތެއް ނުދޭނަން. އެދޭ އެދުމަކީ ްމިކަމުގައި އުޅޭ ކުދިންވެސް އެހެން ކަމަކާއިގެން އުޅެން ފަށަން. އެކުދިންނަށް އުޅެން އުނދަގޫކުރާނަން,“ އިހްސާން ވިދާޅުވި އެވެ.
އިހްސާން ވިދާޅުވި ގޮތުގައި މިއަދުގެ އޮޕަރޭޝަންގައި މިހާރުވެސް 90 ވުރެ ގިނަ މީހުން ވަނީ ހައްޔަރު ކޮށްފަ އެވެ. އަދި ރާއްޖޭގެ އެކި ކަންކޮޅުތަކުން ގިނަ އަދަދެއްގެ މަސްތުވާތަކެތި ވަނީ އަތުލައިގެންފަ އެވެ. އަދި ވަގު ސިނގިރޭޓާއި ވޭޕާއި ކުށްކޮށްގެން ހޯދާފައިވާ ފައިސާތައް އަތުލަމުންދާ ކަމަށް ވިދާޅުވި އެވެ.
ވަޒީރު ވިދާޅުވީ މަސްތުވާތަަކެތީގެ ވިޔަފާރިއަށް އޮންނާނީ އެންމެ ހަރުކަށި ފިޔަވަޅެވެ. އެކަމަށް ކުޑަވެސް ފުުރުސަތެއް އަދި ލުޔެއް ނޯންނާނެ ކަމަށް ވިދާޅުވި އެވެ.
”މިއަދު މި ފެށި [އަލިމަގު] އޮޕަރޭޝަން ހުއްޓާލާނީ މިކަމުގައި މަސްއޫލުވެގެން އުޅޭ މީހުން ހުއްޓާލާ ހިސާބުން. ގާނޫނުން އެެޅޭ އެންމެ ހަރުކަށި ފިޔަވަޅު އެމީހުންނާ މެދު އަޅާނަން,“ އިހްސާން ވިދާޅުވި އެވެ.
