ރާއްޖޭގައި މަސްތުވާތަކެއްޗާ ދެކޮޅަށް ހިންގާ އެންމެ ބޮޑު އޮޕަރޭޝަން މިއަދު ކުރިއަށްދާއިރު މިހާތަނަށް 97 މީހަކު ހައްޔަރުކޮށް ގިނަ އަދަދެއްގެ މަސްތުވާތަކެތި އަތުލައިގެންފި އެވެ.
މަސްތުވާތަކެތީގެ ވިޔަފާރީގައި ބައިވެރިވާ ފަރާތްތަކާ ދެކޮޅަށް ޙާއްސަ އޮޕަރޭޝަނެއް ހިންގުމަށް ރައީސުލްޖުމްހޫރިއްޔާ އެންގެވުމުން ފުލުހުން ވަނީ ”އޮޕަރޭޝަން އަލިމަގު“ ނަމުގައި މުޅި ރާއްޖޭގައި މިއަދު ބޮޑު އޮޕަރޭޝަނެއް ފަަށާފަ އެވެ.
ފުލުހުން ދެންމެ ބުނީ އެ އޮޕަރޭޝަންގައި މިހާތަނަށް 97 މީހަކު ހައްޔަރު ކޮށްފައިވާ ކަމަށެވެ. އަދި 87 ތަނެއް ބަލާ ފާސްކޮށްފައިވާ ކަމަށެވެ.
މި އޮޕަރޭޝަންގައި ގިނަ އަދަދެއްގެ މަސްތުވާތަކެތި ވެސް ވަނީ ހޯދާފަ އެވެ. އަދި ގިނަ އަދަދެއްގެ ފައިސާ ވެސް ހޯދާފައިވެ އެވެ. އެތަކެތީގެ ބައެއް ފޮޓޯތައް ވެސް ވަނީ އާންމުކޮށްފަ އެވެ. ނަމަވެެސް ޖުމްލަ ތަފްސީލެއް ފުލުހުން ނުދެ އެވެ.
ފުލުހުން ބުނީ، މިއަދު ޚާއްސަ އޮޕަރޭޝަން ހިންގަނީ އިންޓެލިޖެންސް މައުލޫމާތަށް ބިނާކޮށް މުޅި ރާއްޖެ ހިމެނޭ ގޮތަށް ކަމަށެވެ.
މި އޮޕަރޭޝަން ފަށައިފައިވަނީ މިއަދު ހެނދުނު 05:30ގައެވެ. 500 އަށް ވުރެ ގިނަ ފުލުހުން ބައިވެރިވާ މި އޮޕަރޭޝަނުގައި ސްޕެޝަލައިޒްޑް ޑިޕާޓްމަންޓްތަކާއި ރީޖަންތަކުން ވިލަރެސްކުރެވިގެން އެކުލަވާލެވިފައިވާ ޓީމުތަކުން މުޅި ރާއްޖޭގެ 100 އަށްވުރެ ގިނަ ތަންތަނުގައި އެއްވަގުތެއްގައި ތަންތަން ބަލައި ފާސްކުރުމާއި ގާނޫނު ތަންފީޒުކުރުމުގެ އަމަލީ މަސައްކަތްތަކެއް ކުރިޔަށްގެންދާނެ ކަމަށް ފުލުހުން ބުންޏެވެ.
ފުލުހުންގެ މި ބިޔަ އޮޕަރޭޝަން ފެށުމުގެ ކުރީން ރައީސް ޑރ. މުޙައްމަދު މުޢިއްޒު ވަނީ ޕޯސްޓެއް ކުރައްވާފަ އެވެ. އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ދިވެހިރާއްޖެއަކީ ޑްރަގްގެ ވަބާއިން އެއްކޮށް ސަލާމަތްވެފައިވާ ޤައުމަކަށް ހެދުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.
