ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ނިޝާން މުލީގޭ ޝަރަފުގެ އިއްޒަތް ދަމާސްގެ ވެރިޔާ މުހައްމަދު ސޯލިހު (ޑިމްސް ސޯލިހް) އަށް އަރުވައިފިއެވެ.
އެ މަނިކުފާނަށް ދިވެހި ދައުލަތުގެ މި އިއްޒަތް އެރުވީ މިހާރު ކުރިއަށް ދަމުންދާ ޖުމަހޫރީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒެވެ. ސޯލިހަށް ދިވެހި ދައުލަތުގެ އިއްޒަތް އަރުވާފައިވަނީ ރާއްޖޭގެ ވިޔަފާރީގެ ދާއިރާ އާއި ފަތުރުވެރިކަމުގފެ ސިނާއަތުގެ އިތުރުން އިގްތިސާދު ބިނާކުރެއްވުމަށް ކުރެއްވި އަގުހުރި މަސައްކަތުގެ އަގު ވަޒަންކުރުމުގެ ގޮތުންނެވެ.
އައްޑޫ ހުޅުދު އަށް އުފަން ސޯލިހަކީ ވިޔަފާރީގެ ދާއިރާއަށް ވަދެވަޑައިގެން އެ ދާއިރާގައި ބައިގަރުނަށްވުރެ ގިނަ ދުވަހު ހިދުމަތްކުރައްވައި އަދި މިހާރުވެސް އެ ދާއިރާގައި ދެމިހުންނެވި ބޭފުޅެކެވެ.
ވިޔަފާރީގެ ދާއިރާއަށް ވަދެވަޑައިގެން މަޝްހޫރު ”ޑިމްސް“ ކުންފުނި ސޯލިހު ވުޖޫދަށް ގެނެސްފައިވަނީ 1983 ގައެވެ. މިއީ ހާޑްވެއާ އާއި، ރިސޯޓުތަކަށް ބޭނުންވާ ތަކެއްޗާއި، ޑިއުޓީ ފްރީ ޝޮޕާއި، ބޮންޑެޑް ވެއާހައުސް، އަދި ފަރުނީޗަރ ވިޔަފާރިއާއި، ޔަންމާ އިންޖީނާއި ސްޕެއަޕާޓްސް އެތެރެކޮށް ވިއްކަވައި، އިންސްޓޯލްމެންޓަށް ދޫކުރަމުން އަންނަ ކުންފުންޏެކެވެ.
މުހައްމަދު ސޯލިހު މި ކުންފުނި އުފައްދަވާ ވިޔަފާރި ކުރަން ފައްޓަވާފައިވަނީ ގާތް އެކުވެރިޔާ، ރާއްޖޭގެ ރީޓެއިލް/ހޯލްސޭލް ވިޔަފާރިއާއި ޓޫރިޒަމް ދާއިރާގައި ނަން މަޝްހޫރު އިބްރާހިމް މުހައްމަދު ދީދީ (ސިމްޑީ ޑީޑީ) އާ ދެ ބޭފުޅުން ގުޅިވަޑައިގެންނެވެ. ނަމަވެސް 17 އަހަރު ވަންދެން ޑިމްސް ކުންފުނި ހިންގުމަށް ފަހު، ސޯލިހާއި ޑީޑީ ވަކި ދެ ވިޔަފާރި ފެއްޓެވި އެވެ. އެއަށްފަހު ސޯލިހުގެ ކުންފުނީގެ ނަމަކަށް ހަމަޖެއްސެވީ ދަމާސް އެވެ.
މީގެ އިތުރުން، ސޯލިހު ވަނީ އައްޑޫ ގަމުގައި އިނގިރޭސިން ތިބި ދުވަސްވަރު އެ ގައުމުގެ ރޯޔަލް އެއާފޯސްގައި 16 ވަރަކަށް އަހަރު ވަންދެން ހިދުމަތް ކުރައްވައިފައެވެ. އޭގެ ފަހުން 1978 ގައި މާލެ ވަޑައިގެން ކާގޯ ކްލިއާ ކުރުމާއި ކޮންސްޓްރަކްޝަން ދާއިރާގައި ވެސް މަސައްކަތް ފައްޓަވައި ވިޔަފާރީގެ ތެރެއަށް ރަސްމީކޮށް ވަދެވަޑައިގެންނެވިއެވެ.
